Azərbaycan bizim həyatımızın bir hissəsidir

Azərbaycan bizim həyatımızın bir hissəsidir. Humanitar Əməkdaşlıq üzrə Birinci Azərbaycan-Rusiya Forumunun iştirakçıları ilə AzərTAc-da keçirilmiş görüşün leytmotivi məhz bu sözlər oldu.

Ölkəmizin əsas informasiya agentliyinin qonaqları arasında Moskva Jurnalistlər İttifaqının birinci katibi Lyudmila Şerbina, "İzvestiya" qəzetinin baş redaktoru Vitali Abramov, "Kommersant" qəzetinin baş redaktoru Azər Mürsəliyev, MDB İşləri, Xaricdə Yaşayan Həmvətənlər və Beynəlxalq Humanitar Əməkdaşlıq üzrə Federal Agentliyin rəhbərinin müavini Yevgeni Kojokin də vardı. Səmimi dostluq şəraitində keçən söhbət zamanı qonaqlar etiraf etdilər ki, onların hər biri Bakı ilə, Azərbaycanla bu və ya digər şəkildə bağlıdır.

"Kommersant" qəzetinin baş redaktoru Azər Mürsəliyev dedi:

- Bu qədər geniş və nüfuzlu nümayəndə heyətinin tarixi Vətənimə gəlməsi mənə çox xoşdur. Ən əhəmiyyətlisi isə odur ki, onlar buraya məmnunluqla, böyük həvəslə gəlirdilər. Qeyd etməliyəm ki, Bakı ilə Moskvanı, Azərbaycan ilə Rusiyanı ən azı kütləvi informasiya vasitələri, mədəniyyət və incəsənət sahəsində bir-birinə bağlayan cəhətlər çoxdur. Rusiya nümayəndə heyətinin tərkibində Bakı üçün doğma və yaxın olan adamlar az deyildir. Bu forum adətən belə tədbirlərə xas olan rəsmiyyətçilikdən uzaq oldu, yəni, heç kəs standart ibarələrlə danışmırdı. Burada hər şey çox səmimi alındı. Mənə belə gəlir ki, Bakıya ilk dəfə gələnlər hökmən və dəfələrlə buraya qayıdacaqlar. Hətta həmkarlarımın ilk fürsət tapan kimi Bakıya gəlmək barədə razılaşdıqlarını özüm eşitdim. Məncə bu, imzalanmış saziş və öhdəliklərdən daha vacibdir. İnsani münasibətlər həmişə daha əhəmiyyətli olur, axı hər iş bu cür münasibətlər üzərində qurulur.

"İzvestiya" qəzetinin baş redaktoru Vitali Abramov fikirlərini bizimlə bölüşərək dedi:

- Rusiyada əslən Azərbaycandan olan jurnalist çoxdur: Azər Mürsəliyev, Elmar Hüseynov, Rafael Hüseynov və başqaları. Bizim ən məşhur bakılılar isə Qusman qardaşlarıdır. Mən əslən Həştərxandanam. Sovet dövründə Bakıya tez-tez gələrdim. Burada mənim dostlarım yaşayır. Onlarla görüşmək mənim üçün maraqlı idi. Bunlar, necə deyərlər, subyektiv məsələlərdir, obyektiv amillər isə göz qabağındadır. İş burasındadır ki, MDB ölkələrindən bir neçəsi ilə bizim çox səmimi dostluq münasibətlərimiz vardır. Azərbaycan da həmin ölkələr sırasındadır.

Bizi qəbul edən Azərbaycan Prezidenti dedi ki, biz qardaş kimi yaşayırıq. Həqiqətən Moskvada xeyli azərbaycanlı yaşayır, onlar ictimai həyatın bütün səviyyələrində təmsil olunmuşlar. Bu mehribanlıq o qədər təbiidir ki, adama elə gəlir Sovet İttifaqı hələ də mövcuddur. Biz keçmiş SSRİ-nin başqa bir respublikasına getmiş olsaydıq, bəlkə də başqa hisslər keçirərdik. Bundan əlavə, digər keçmiş sovet respublikalarından fərqli olaraq Azərbaycan ilə Rusiya arasında çox sıx iqtisadi əlaqələr vardır. Forumun açılış mərasimi səmimi və sanballı oldu. Orada dostluq və mehriban qonşuluq haqqında söhbətlərlə yanaşı, kəskin sözlər də deyildi. Məsələn, sizin yazıçı Anar yaxşı çıxış etdi və incikliklər haqqında danışdı. Bizdə isə heç də elə təəssürat yaranmadı ki, bu incikliklər əsassızdır. Bu, qarşılıqlı etimadın əlaməti və bizim buraya gəlməyimizin səbəblərindən biridir.

MDB İşləri, Xaricdə Yaşayan Həmvətənlər və Beynəlxalq Humanitar Əməkdaşlıq üzrə Federal Agentliyin rəhbərinin müavini Yevgeni Kojokin ölkəmizdə baş verən mühüm dəyişiklikləri vurğulayaraq dedi:

- Son illərdə Azərbaycan iqtisadi baxımdan çox dinamik inkişaf edir və bu, Bakıda xüsusilə hiss edilir. Bakı yaxşılığa doğru sürətlə dəyişir, burada çoxlu postmodernist binalar tikilir və insan özünü dinamik inkişaf edən varlı şəhərdə hiss edir. Buraya gəlmək maraqlıdır. Buraya gələndə başa düşürsən ki, bu şəhər gələcəyə can atır. Hərçənd, 90-cı illərin əvvəlində bu şəhərin ensiz küçələri və çox maraqlı qədim binaları da yadımdadır. Mənim üçün Azərbaycan həyatımın bir hissəsidir. Ola bilsin ki, bu sözlər həyatımın ən işıqlı dövrünə aid deyil, çünki 1990-cı ilin yanvarında Rusiyada demokratik hərəkat komissiyasının üzvü kimi mən Bakının, ölkənin üzləşdiyi bu faciənin təfərrüatını aydınlaşdırmaq üçün buraya gəlmişdim. Həqiqəti maksimum öyrənmək üçün hospitalda yaralılarla, Xalq Cəbhəsinin fəalları ilə, şəhər komendantı ilə də söhbət edirdik. Bu da mənim həyatımın bir hissəsidir. Bu diyar, bu insanlar mənim üçün əzizdir. Mən belə hesab edirəm ki, biz - ruslar və azərbaycanlılar bir çox problemləri birlikdə həll etməliyik.

Qonaqlar jurnalist peşəsini istehkamçının işi ilə müqayisə etdilər. Onlar vurğuladılar ki, burada əsas məsələ təhrikçi olmamaqdır, hər hansı materialın dərc edilməsinin effektinə gəldikdə isə, bunu həyat göstərər.

AzərTAc

Azərbaycan.- 2010.- 29 yanvar.- S. 4.