Xalqa layiqli xidmət

Prezident İlham Əliyev bu missiyası ilə Azərbaycan vətəndaşlarının alternativsiz etimad və ümid ünvanıdır

Müasir Azərbaycanın əsas xarakterik xüsusiyyətlərindən olan sürətli inkişafın ən mühüm cəhətlərindən biri yaşanan tərəqqinin hər bir vətəndaşın, ailənin həyatında da öz əksini tapmasıdır. Bu, Prezident İlham Əliyev tərəfindən həyata keçirilən sosial-iqtisadi siyasətin əsas məqsədlərindən biri kimi çıxış edir. Elə bunun nəticəsidir ki, son bir neçə ildə əhalinin həyat səviyyəsi davamlı olaraq yüksəlib, insanların maddi gəlirləri mütəmadi artıb. Göstərilən sosial və digər xidmətlər müsbət istiqamətdə əsaslı kəmiyyət və keyfiyyət dəyişikliyinə məruz qalıb. Təsadüfi deyil ki, BMT İnkişaf Proqramının 2010-cu il İnsan İnkişafı Hesabatında Azərbaycan bu göstərici üzrə dünyada böyük müvəffəqiyyətlərə imza atmış dövlətlərdən biri kimi təqdim edilir. Həmçinin ölkəmiz insan inkişafı indeksi üzrə MDB məkanındakı ölkələr arasında son 10 il ərzində aparıcı dövlət kimi qəbul olunur.

Xalq və iqtidar arasında daim güclənən birlik

Bütün bunlar Azərbaycan Prezidentinin həyata keçirdiyi sosial-iqtisadi siyasətin uğurlu nəticələrini konkret misallar əsasında təsdiqləyən mühüm faktorlardır. Lakin Azərbaycan daim irəliyə baxan, inkişaf etmiş ölkələr sırasına daxil olmağı qarşıya əsas məqsədlərdən biri kimi qoyan dövlət olduğundan əldə edilən nəticələrlə kifayətlənmək niyyətində deyil. Mövcud olduğu regionda əsas tərəqqi parametrləri üzrə lider dövlət olan Azərbaycan bu statusunu davamlı olaraq möhkəmləndirmək, qazandığı nailiyyətlərin miqyasını daha da genişləndirmək üçün məqsədyönlü siyasət həyata keçirməkdədir. Bu mənada ölkəmizin inkişafını daha sürətli hala gətirəcək konkret sahələri əhatə edən yeni-yeni proqramların qəbulu, digər zəruri tədbirlərin görülməsi tamamilə təbii xarakter daşıyır.

Qeyd edilənlər həm də 20 il öncənin və günümüzün Azərbaycanı arasında kəskin bir fərqin yaşanmasının göstəricisi kimi çıxış edir. Dövlət müstəqilliyinin əldə olunduğu ilk illərdə ağır sosial-iqtisadi məşəqqətlər, mövcud olan xaos və anarxiya, bütün sahələr üzrə yaşanan böhran indi öz yerini sarsılmaz özüllər üzərində qurulan sabitliyə, dinamik inkişafa, parlaq intibaha verib. Bu həm də ümummilli lider Heydər Əliyevin inkişaf strategiyasının nə dərəcədə uğurlu olduğunun, kifayət qədər dəqiqlik və uzaqgörənliklə müəyyən edildiyinin bariz göstəricisidir.

İndi yüksək templərlə müşayiət olunan inkişaf dövrünü yaşayan Azərbaycanın əldə etdiyi nailiyyətlər, aparılan daxili və xarici siyasətin gətirdiyi müvəffəqiyyətlər ölkəmizin beynəlxalq hüquq məkanında öz müstəqil yeri və mövqeyi olan dövlətə çevrilməsində də mühüm rol oynayıb. Bu kontekstdə Azərbaycanın həyata keçirdiyi müstəqil siyasət milli maraqların qorunmasını təmin edir, xalqın mənafeyi ilə tam uzlaşır. Elə bunun nəticəsidir ki, indi Azərbaycan iqtidarı və xalqı arasında sarsılmaz birlik, monolitlik mövcuddur. Əslində, ölkəmizin dinamik inkişafının kökündə dayanan əsas məqamlardan biri elə xalq və iqtidar arasında yaşanan birlik və bu birliyin kifayət qədər möhkəm zəminə söykənməsi, əsaslı bazis üzərində qurulmasıdır. Bu da həm Azərbaycanın tərəqqisinin qarşıdakı dövr ərzində yenə dinamizmə əsaslanacağını, həm də ölkənin zamanın tələblərinə, dövrün çağırışlarına hazır olacağını özündə şərtləndirməkdədir. Prezident İlham Əliyev bununla bağlı bildirmişdir: "Həyat yerində durmur, ölkə qarşısında yeni vəzifələr çıxır, yeni çağırışlarla üzləşirik və biz hazır olmalıyıq. Bunu etmək üçün güclü iqtisadiyyat və güclü siyasi sistem olmalıdır. Azərbaycanda vətəndaş cəmiyyətinin formalaşması prosesi uğurla gedir, xalqla iqtidar arasında birlik vardır. Bütün təşəbbüslərimiz xalq tərəfindən dəstəklənir, əks təqdirdə, biz bu inkişafa nail ola bilməzdik".

Sosial-iqtisadi inkişaf sahəsində özünəməxsus uğurlu modelin əsasını qoymuş Azərbaycan bundan sonra da qət edəcəyi inkişaf yolunun yenə möhtəşəm uğurlarla müşayiət olunmasına zəmin yaradacaq uğurlu bir bazis formalaşdırıb. Təkcə bir faktı qeyd etmək kifayətdir ki, regional sabitlik və inkişaf amilinə çevrilən Azərbaycan Cənubi Qafqazda bütün əsas inkişaf göstəriciləri üzrə nəinki birinciliyini saxlayır, həm də yeni müfəqqiyyətlər hesabına onu daha da gücləndirir. Məsələn, bu gün Cənubi Qafqaz iqtisadiyyatının 75 faizi Azərbaycanda formalaşır və bu göstəricinin perspektivdə daha yüksək rəqəmlərlə ifadə olunması istisna edilmir. Çünki təxminən 3 il öncə region iqtisadiyyatının yalnız 65 faizi Azərbaycanın payına düşürdü və indi bu göstərici qeyd olunduğu kimi əhəmiyyətli dərəcədə artıb. Yaşanan inkişaf isə təkcə sosial-iqtisadi sferanı əhatə etməyərək ən müxtəlif sahələri, o cümlədən demokratiyanı, siyasi və mədəni həyatı, eləcə də digərlərini özündə ehtiva edir. Həmin kateqoriyalar üzrə də qazanılan uğurlar baxımından Azərbaycan MDB, Şərqi Avropa kimi böyük bir coğrafi məkanda liderlər cərgəsində yer alır.

Prezidentin məmurlardan dəyişməz tələbi

İnkişafın Azərbaycan modelinin ən qabarıq xüsusiyyətlərindən biri isə bu tərəqqiyə mane ola biləcək mənfi halların aradan qaldırılması üçün ən yüksək səviyyədə siyasi iradənin meydana qoyulmasıdır. Burada əsas məqsəd xoşagəlməz halların birdəfəlik ləğvi, eyni zamanda qanunun aliliyi, sosial ədalət prinsipinin gözlənilməsidir. Qeyd edilənlərə konkret misal kimi korrupsiyaya və rüşvətxorluğa qarşı mübarizənin yeni mərhələsini göstərmək mümkündür. Azərbaycanda bu qəbildən olan problemlərin birdəfəlik həlli cənab İlham Əliyevin həyata keçirdiyi inkişaf strategiyasının əsas məqsədidir. Ölkə Prezidenti bu istiqamətdə konkret addımlar atmaqla bərabər, bütün vətəndaşların problemlərin həllinə öz töhfəsini verməsini istəyir.

Bu məqsədlə dövlət başçısı sadə vətəndaşlarla görüşündə bu və digər qəbildən olan problemlərlə üzləşən şəxsləri birbaşa ona, digər müvafiq rəsmi qurumlara müraciət etməyə səsləyir. Özü də bu gün hər bir şəxsin Azərbaycan Prezidentinə müraciət etməsi olduqca asan və sadədir. Yəni istənilən şəxs dövlət başçısının elektron ünvanına öz istək və arzularını, problemlərini çatdıra bilir. Eləcə də başqa formalardan istifadə etməklə dövlət başçısı ilə təmaslar yaratmaq mümkündür. Prezident İlham Əliyevin hər hansı problemi olan şəxsi birbaşa ona və digər aidiyyəti qurumlara müraciət etməyə dəvət etməsi bir daha dövlət başçısının sadə vətəndaşın yanında olduğunu, onun səsini hər zaman eşitdiyini aydın nümayiş etdirir. Nizami rayonunun Keşlə qəsəbə sakinləri ilə görüşündə Prezident İlham Əliyev qeyd edilən məqamla bağlı bildirir: "Mən dəfələrlə müraciət etmişəm, bir də müraciət etmək istəyirəm. Harada ki, işlər yaxşı getmir, qüsurlar, çatışmayan cəhətlər vardır, məlumat verin, məktub göndərin. İndi elektron poçt vardır. Məktubla müraciət edin. Biz bilməliyik. İndi korrupsiyaya qarşı qurumda "qaynar xətt" yaradılıbdır. Zənglər, müraciətlər gəlir. Onlara operativ şəkildə münasibət bildirilir, məsələlər araşdırılır, cəza tədbirləri görülür. Biz bütün xoşagəlməz halları Azərbaycanda aradan götürməliyik. Sosial ədalət prinsipləri tam bərqərar olunmalıdır. İnsanların yaşaması, işləməsi üçün bütün şərait olmalıdır və biz bunu etmək üçün çalışırıq".

Bu gün sadə vətəndaşın qayğıları ilə yaşayan, onu duyan və həlli istiqamətində konrket addımlar atan ölkə Prezidenti bununla həm də insanlar tərəfindən alqışlanaraq təqdir olunan gözəl bir nümunəyə hər zamankı sadiqliyini nümayiş etdirir. Vətəndaş görürür ki, onun səsini daim eşidəcək, hüquqlarını müdafiə edəcək Prezidenti var. Cənab İlham Əliyevin əsas məqsədlərindən biri tutduğu vəzifədən asılı olmayaraq hər bir dövlət məmurunun eyni nümunə sərgiləməsi, vətəndaşa həssas münasibət, insanlara qayğı göstərməsidir. Məhz bu səbəbdən dövlət başçısı xüsusi olaraq vurğulayır ki, bütün vəzifəli şəxslər, məmurlar vətəndaşlara ləyaqətlə xidmət etməli, onlara kömək göstərməli, qayğıları ilə yaşamalıdırlar. Sözügedən prinsip cənab İlham Əliyevin dövlət başçısı seçildiyi ilk gündən özünü aydın göstərir. Bu gün də cənab İlham Əliyevin məmurlardan dəyişməz tələbi bütün vəzifəli şəxslərin xalqa ləyaqətlə və layiqli şəkildə xidmət göstərməsi, insanların qayğılarını hiss etmələri, mövcud problemlərinin həlli istiqamətində müvafiq addımlar atmalarıdır.

Prezident problemləri vətəndaşdan birbaşa öyrənir

Hər bir azərbaycanlının Prezidenti olaraq cənab İlham Əliyev paytaxtda, eləcə də ölkənin müxtəlif bölgələrində insanlarla təmasa daim xüsusi önəm verir. Bu zaman dövlət başçısını maraqlandıran əsas məsələlərdən biri vətəndaşın ölkədə yaşanan inkişafa, müxtəlif hadisələrə münasibətidir. Bununla yanaşı, bu səpkili görüşlərdə sadə insanların hansı problemlərlə üzləşməsi də dövlət başçısını daim yaxından maraqlandırır. Belə problemlər olduğu təqdirdə onun elə yerindəcə həllinə dair Prezident tərəfindən müvafiq göstərişlərin verilməsi artıq xoş bir ənənə halını alıb. Elə cənab İlham Əliyevin son günlərdə Bakıətrafı qəsəbələrdə keçirdiyi görüşləri xatırlatmaq kifayətdir. Buna dair nə qədər konkret misallar gətirmək mümkündür.

15 min əhalinin yaşadığı Əhmədli qəsəbəsinin sakinləri ilə görüşündə də Prezident İlham Əliyevin xüsusi diqqət yetirdiyi məsələlərdən biri sakinlərin hansı problemlərlə üzləşmələri oldu. Sakinlər dövlət başçısına qəsəbə küçələrinin işıqlandırılması, yeni xəstəxanaya, kitabxanaya ehtiyac duymaları barədə məlumat verdilər. Vəziyyətlə yerində tanış olan Prezident məsələnin həlli üçün sakinlərə söz verdi və vədinə sadiqliyini də aydın göstərdi. Belə ki, Əhmədli qəsəbəsində yeni xəstəxananın tikintisinə başlanılması üçün Azərbaycan Respublikasının 2011-ci il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan 1,5 milyon manat məbləğində Xətai Rayon İcra Hakimiyyətinə vəsait ayrılması barədə aprelin 1-də müvafiq sərəncam imzaladı.

Eləcə də digər Bakıətrafı qəsəbələrdə yaşanan problemlərin həlli istiqamətində artıq dövlət başçısı tərəfindən müvafiq göstərişlər verilib. Məsələn, Keşlə qəsəbəsində 640 şagirdlik yeni ümumtəhsil məktəbi binasının tikintisi üçün Azərbaycan Respublikasının 2011-ci il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Nizami Rayon İcra Hakimiyyətinə 2 milyon manat, Bülbülə qəsəbəsində 640 şagirdlik yeni ümumtəhsil məktəbi binasının tikintisi üçün Suraxanı Rayon İcra Hakimiyyətinə eyni miqdarda vəsait ayrılmasına dair Prezident İlham Əliyev tərəfindən müvafiq sərəncamlar verilib. Qeyd edilənlər dövlət başçısının vətəndaşlar tərəfindən qaldırılan problemlərə nə dərəcədə həssaslıqla yanaşmasının daha bir real göstəricisidir.

Prezident İlham Əliyev Suraxanı rayonunun Bülbülə kəndində olarkən qəsəbə sakinlərinin əsas istəklərindən biri Bakı-Aeroport yolu çəkilərkən "Komsomol dairəsi" adlandırılan yerdən Bülbüləyə girən və Əmircandan çıxan yolun kəsilməsi ilə bağlı oldu. Yaranan vəziyyətdə bütün avtobuslar, yük və minik maşınları Bakı-Aeroport yoluna çıxmaq üçün Bülbülənin daxili yollarından keçmək məcburiyyətindədir. Problem barədə Bülbülə sakinləri tərəfindən Prezidentə məlumat verildikdən sonra dövlət başçısı məsələnin həlli üçün çəkiləcək yeni yolun keçəcəyi əraziyə, qəsəbədaxili vəziyyətə yerindəcə şəxsən diqqət yetirdi. Artıq Bülbülə sakinləri yaxşı bilirlər ki, üzləşdikləri bu problem yaxın vaxtlarda öz həllini tapacaq.

Bununla yanaşı, Bakıətrafı qəsəbələrin yollarının abadlaşdırılması, su və kanalizasiya xətlərinin yenidən çəkilməsi, bərpası, işıq dirəklərinin quraşdırılması da belə yaşayış məskənlərinin daha da müasirləşməsinə, gözəlləşməsinə səbəb olur.

Prezident əhalinin su borclarını da siləcək

Bu gün dövlətin sosial siyasətinin əsas istiqamətləri vətəndaşların Azərbaycan Respublikasının Konstitusiyası ilə müəyyənləşdirilmiş hüquq və azadlıqlarının təmin edilməsinə, aztəminatlı insanların sosial müdafiəsinin təşkil edilməsinə yönəlib. Həmçinin sosial yardım sistemində ünvanlılıq prinsiplərinin gücləndirilməsi və cəmiyyətdə mövcud olan sosial münasibətlərin tənzimlənməsi də sosial siyasətin əsas məqsədləri sırasında yer alır. Ölkəmizdə formalaşmış sosial müdafiə modeli artıq dövlət quruculuğu fəlsəfəsində aparıcı elementlərdən biri kimi çıxış edir.

Azərbaycan iqtisadiyyatının inkişaf konsepsiyasının mühüm tərkib hissəsi olan sosial siyasət Prezident İlham Əliyevin daim xüsusi diqqət mərkəzindədir. Bu mənada təsadüfi deyil ki, dövlət başçısının imzaladığı sərəncam və fərmanlarda, təsdiq etdiyi sənədlərdə çoxlu sayda yeni iş yerlərinin açılmasına şərait yaradılması, sahibkarlığın inkişaf etdirilməsi, sosial xidmətlərin həcminin, keyfiyyətinin və ünvanlılığının əhəmiyyətli dərəcədə artırılması, yoxsulluğun azaldılması kimi vəzifələr daim yer alır. Əsas məqsəd isə cəmiyyətin və ayrılıqda hər bir vətəndaşın rifahının yüksəldilməsi, onların sosial müdafiəsinin və layiqli həyat səviyyəsinin təmin olunması, şəxsiyyətin azad inkişafı üçün bərabər imkanların yaradılmasıdır.

Dövlət başçısı tərəfindən əhalinin sosial maraqlarına hesablanan və əsas etibarı ilə aztəminatlı insanların rifahını yaxşılaşdırmağı özündə ehtiva edən müxtəlif sərəncamlar, fərmanlar, eləcə də digər sənədlər sosial təminat sahəsində böyük əhəmiyyətə malikdir. Buna misal olaraq "Əhalinin təbii qazdan istifadəsi üzrə yaranmış borclarının silinməsi tədbirləri barədə" Prezident İlham Əliyevin 29 dekabr 2009-cu il tarixli fərmanını göstərmək olar. Əhalinin sosial müdafiəsinin gücləndirilməsi və istehlak edilmiş təbii qazın dəyərinin ödənilməsində yaranmış vəziyyətin tənzimlənməsi məqsədi ilə dövlət başçısının qərarına əsasən, əhalinin 1 oktyabr 2009-cu il tarixinə Azərbaycan Respublikası Dövlət Neft Şirkətinin "Azəriqaz" İstehsalat Birliyinə yaranmış 327 milyon manat məbləğində borcları silinib. Əhalinin borclarının silinməsi ilə əlaqədar Azərbaycan Respublikasının Dövlət Neft Şirkətinə silinmiş borcların məbləği həcmində Azərbaycan Respublikasının 2009-cu il dövlət büdcəsindən təzminat verilib.

İndi isə əhalinin su borclarının silinməsi istiqamətində müvafiq addımların atılması üçün Prezident tərəfindən Nazirlər Kabinetinə müvafiq göstəriş verilməsi insanlar tərəfindən təqdir olunur. Prezident İlham Əliyev Zabrat qəsəbəsinin 7500-dən artıq sakininin məskunlaşdığı "Teplitsa" adlandırılan yaşayış sahəsində olarkən bununla bağlı bildirib: "İçməli su ilə bağlı keçmişdən yığılmış borclar vardır. Mən bilirəm ki, o borcların ödənilməsində müəyyən problemlər vardır. Çünki bəzi hallarda o borclar düzgün hesablanmayıb və əhaliyə tətbiq olunan cərimələr də bəzi hallarda əsassızdır. Ona görə mən Nazirlər Kabinetinə göstəriş vermişəm ki, məsələyə baxsınlar və biz əvvəlki dövrdə yaranmış borcları silək".

Bütün bunlar bir daha Prezidentin əhalinin sosial durumuna nə dərəcədə həssas yanaşdığının real göstəricisi kimi çıxış edir.

Prezident: mən xalqın xidmətçisiyəm

Vətəndaşların istək və arzularına, problemlərinə yüksək diqqətlə yanaşan Azərbaycanın dövlət başçısının sadə insanlarla qurduğu münasibətlər sözün həqiqi mənasında gözəl bir nümunədir. Hər dəfə dövlət başçısı ilə görüşən insanlarda belə bir əminlik daha da dərinləşir ki, onlar seçimlərində nə qədər düzgün bir mövqe tutublar. Çünki bu gün Azərbaycanı daha sürətli inkişafa və işıqlı gələcəyə aparan yeganə, alternativsiz qüvvə məhz cənab İlham Əliyev hakimiyyətidir.

Daim xalqın xidmətində olan dövlət başçısı hər zaman elə lideri olduğu xalqa arxalandığını böyük qürur hissi ilə bəyan edir. Nizami rayonunun Keşlə qəsəbəsində sakinlərlə görüşən Prezident İlham Əliyev bir daha bu məsələyə toxunaraq bildirmişdir: "Mənim işim ondan ibarətdir ki, xalqa xidmət etməliyəm. Onu da edirəm və bundan sonra da edəcəyəm. Bütün işlərimdə mən xalqa arxalanıram. Yəni, əgər təşəbbüslərimiz xalq tərəfindən dəstəklənməsəydi, bütün bu işləri görmək mümkün olmazdı".

Bu gün həqiqətən də Azərbaycan xalqı və onun lideri arasında sıx və daim güclənən birlik mövcuddur. Qeyd olunduğu kimi, məhz bu birlik Azərbaycanın sürətli inkişafını şərtləndirən əsas amillərdən biridir. Günümüzün Azərbaycanında yaşanan sürətli sosial-iqtisadi inkişaf isə bilavasitə əhalinin maddi rifah halının yüksəlməsində öz əksini tapır. Həyata keçirilən irimiqyaslı iqtisadi islahatlar, maliyyə vəziyyətinin sabitləşməsi, iqtisadiyyata cəlb olunan investisiyaların həcminin ildən-ilə artması isə inkişaf prosesini sürətləndirən önəmli faktorlar kimi çıxış edir. Bununla yanaşı, Azərbaycanda iqtisadi və siyasi, demokratik inkişaf paralel şəkildə həyata keçirilir və son nəticə olaraq ölkənin tərəqqisi kompleks xarakter alır. Belə vəziyyət Azərbaycanın bir dövlət, cəmiyyət olaraq daha sürətli inkişafını təmin edən əsas məqamlardan biri kimi çıxış edir və azad vətəndaş - güclü dövlət konseptinin uğurla reallaşdığını göstərir.

Ölkə hakimiyyətinin, onun həyata keçirdiyi inkişaf strategiyasının xalq tərəfindən tam dəstəklənməsi isə Azərbaycanın bundan sonra da daha böyük nailiyyətlərə imza atacağını, yeni uğurların müəllifi kimi çıxış edəcəyini qətiyyətlə deməyə əsas verir.

Rasim BAYRAMOV

Azərbaycan.- 2011.-3 aprel.- S. 2.