Bakıda Qara Qarayev adına IV Beynəlxalq müasir musiqi festivalı açılmışdır

Aprelin 2-də Müslüm Maqomayev adına Azərbaycan Dövlət Filarmoniyasında Qara Qarayev adına IV Beynəlxalq müasir musiqi festivalının təntənəli açılış mərasimi keçirilmişdir.

Təbdirdə Mədəniyyət və Turizm Nazirliyinin incəsənət şöbəsinin müdiri Fərəh Əliyeva çıxış edərək bildirmişdir ki, Qara Qarayevin adını daşıyan müasir musiqi festivalı ilk dəfə Bakıda bəstəkarın vəfatından 4 il sonra, 1986-ci ildə dirijor Rauf Adullayev, bəstəkarlar Qleq Felzer və Fərəc Qarayevin təşəbbüsü ilə təşkil edilmişdir. Daha sonra festival 1988-ci və 1990-cı illərdə keçirilmişdir. Bu festivallarda sovet dövründə səslənməyən əsərlər ifa edilmiş, müasir musiqinin ən müxtəlif və qabaqcıl təmayüllərinə yer verilmişdir. 1990-cı ilin dekabrından bəri bu festival indi - 20 illik fasilədən sonra yenidən bərpa edilir. Builki festivalın proqramı olduqca zəngindir. Proqrama elmi konfransın keçirilməsi, dünyanın tanınmış musiqiçilərinin konsertlərinin təşkili daxil edilmişdir.

Bildirilmişdir ki, böyük Azərbaycan bəstəkarı, Sosialist Əməyi Qəhrəmanı Qara Qarayevin adını daşıyan festivalda 10-dan çox ölkəni təmsil edən musiqi qrupları bir həftə ərzində paytaxtımızda geniş konsert proqramları ilə çıxış edəcəklər. Konsert proqramlarına Azərbaycanla yanaşı Almaniya, Fransa, Rusiya və digər ölkələrdən 50-dək bəstəkarın əsəri daxil edilmişdir. Bu bəstəkarların sırasında sənətdə ilk addımlarını atan gənclər də vardır. Festival konsertlərində yalnız müasir musiqinin səslənməsi əsas məqsəd kimi qarşıya qoyulmuşdur.

Məlumat verilmişdir ki, festival bundan sonra iki ildən bir keçiriləcəkdir.

Gecədə Ü.Hacıbəyli adına Azərbaycan Dövlət simfonik Orkestrinin konserti olmuşdur. Orkestrin bədii rəhbəri və baş dirijoru Xalq Artisti, professor Rauf Abdullayevdir. Solistləri Nino Jvania (Gürcüstan) və Aleksandr İvaşkin (Böyük Britaniya) olan konsertdə Anton Vebernin, Arif Məlikovun, Olivier Messiaenin, Vladimir Tarnopolskinin və Vitold Lutoslavskinin əsərləri səsləndirilmişdir.

Festival aprelin 8-dək davam edəcəkdir.

AzərTAc

Azərbaycan.- 2011.- 3 aprel.- S. 5.