Ekologiya mövzusu məktəbli fırçasında

 

ARDNŞ-in "Azərikimya" İstehsalat Birliyinin əsas binasında Sumqayıt məktəblilərinin ekologiya mövzusuna həsr olunmuş rəsmlərindən ibarət sərgi təşkil edilib.

Foyedə nümayiş etdirilən rəsmlər ötən il Beynəlxalq Dəniz günündə "Azərikimya"nın təşəbbüsü və dəstəyi ilə "Planetimizi tullantılardan təmizləyək! Sumqayıtı ekoloji təmiz şəhərə çevirək!" devizi altında keçirilmiş geniş ekoloji təmizlik aksiyası çərçivəsində çəkilib. Əslində, bunlar həmin münasibətlə çəkilmiş və Sumqayıt şəhər rəsm qalereyasında nümayiş etdirilmiş yüzlərlə işin arasından seçilib. Burada təbiətə diqqət və qayğının həyati vacibliyini əks etdirən, həmçinin bəzi məqamlarda həyəcan təbili təsiri bağışlayan 20-dək rəsm toplanıb. Bu rəsmləri işləmiş məktəblilər öz tablolarında yalnız yaradıcılıq istedadlarını deyil, həm də ana təbiətə, Vətənə məhəbbətlərini, bütövlükdə dünyanın bugünü və sabahı ilə bağlı arzu və istəklərini, eyni zamanda, planetin ekoloji tarazlığını pozanlara qarşı münasibətlərini əks etdirməyə çalışıblar.

 

 

Azərbaycan.- 2011.- 5 aprel.- S. 7.