Radikal müxalifətin antimilli fəaliyyəti kəskin pislənildi

Milli Məclisin iclasında

Aprelin 8-də Azərbaycan Respublikası Milli Məclisinin növbəti plenar iclası keçirildi. Gündəlikdəki məsələlərə keçməzdən əvvəl deputatlar radikal müxalifətin aprelin 2-də Bakı şəhərində icazə verilməmiş yerlərdə mitinq keçirmək və süni qarşıdurma yaratmaq cəhdinə münasibət bildirdilər.

İlk söz alan deputat Zahid Oruc bildirdi ki, aprelin 2-də baş verənlər həm də onu göstərdi ki, dini-ekstremist təmayüllü dairələr radikal müxalifətlə birləşməkdədir. Həmin icazəsiz aksiyanın keçirilməsinə cəhd eyni zamanda Azərbaycanın normal dövlət quruluşuna etiraz edənlərin, sivil, açıq dövlət modelizminə fərqli mövqedə dayananların tədbiri idi. "Necə olur ki, bütün dünyada sərbəst toplaşmaq hökumətin mövqeyinə alternativ münasibət göstərmək vasitəsi olduğu halda, bizdə sərbəst toplaşmaq sərbəst vuruşmaq, sərbəst toqquşmaq azadlığı kimi özünü təzahür edir" -deyən Zahid Orucun fikrinə görə, müxalifət üçün mitinqə nə qədər adamın gəlməsi əsas deyildi. Müxalifət üçün əsas o idi ki, bu icazəsiz aksiya və süni qarşıdurma görüntüləri xarici televiziya kanallarında göstərilsin. Zahid Oruc radikal müxalifətə bu cür biabırçı hərəkətlər etməkdənsə, süni gərginlik yaratmağa cəhd göstərməkdənsə, Dağlıq Qarabağla bağlı Horadiz şəhərində və yaxud Ergi düzündə mitinq keçirməsini məsləhət gördü. "Mənim üçün maraqlıdır, Azərbaycanın siyasi qüvvələri xarici dairələrin qarşısında hansı öhdəlikləri götürüblər?" -deyən Zahid Oruc onların öhdəlik götürmələrinə əmin olduğunu bildirdi.

Deputat Zahid Orucun fikirləri ilə razı olduğunu deyən deputat Abel Məhərrəmov çıxışı zamanı əsas diqqəti təhsil sahəsindəki bəzi məsələlərə yönəltdi. Onun sözlərinə görə, təcrübə göstərir ki, son zamanlar magistratura pilləsində təhsilin davamı ilə bağlı problemlər çıxır. Belə ki, qızlar ailə həyatı qurduqdan sonra çox zaman elm yolunu davam etdirə bilmirlər. Oğlanlar isə hərbi xidmətə yollanır və ya dövlət qulluğuna qəbul olunduqdan sonra magistratura təhsilindən uzaqlaşırlar. "Sual olunur ki, gələcəkdə elmi kim irəliyə aparmalı, elmi zirvələri kim fəth etməlidir" - deyən Abel Məhərrəmov bildirdi ki, həm hərbi xidmətə çağırılmaq, həm də dövlət qulluğuna qəbul magistrlərin ali təhsil sistemindən yayınmasına səbəb olur ki, bu da təhsil sistemində böyük deformasiyalara gətirə bilər. Çıxışının sonunda Abel Məhərrəmov bu problemə ciddi diqqət yetirilməsini vacib sayaraq müvafiq qurumlar tərəfindən bununla bağlı müzakirələr aparılmasını təklif etdi.

Radikal müxalifətin icazəsiz aksiya keçirmək və süni qarşıdurma yaratmaq cəhdini deputat Aydın Mirzəzadə də tənqid etdi. Qeyd etdi ki, əslində radikal müxalifətin son vaxtlar Azərbaycanda sabitliyi pozmaq, qarşıdurma yaratmaq cəhdlərinə əhəmiyyət verməmək də olar. Cəmi 200-300 nəfərin şəhərin mərkəzi küçələrində çığıra-çığıra hay-küy salması 9 milyonluq bir ölkə üçün böyük bir hadisə deyil. Amma diqqəti cəlb edən müxalifətin radikal qanadının şüarlarının məhz xarici ölkələrə səslənməsi və bu qanunsuz aksiyaların qısa zaman kəsiyində dünyanın bir sıra kütləvi informasiya vasitələrində işıqlandırılmasıdır. Ən qəribəsi isə xarici ölkələrin Azərbaycandakı nümayəndəliklərinin vasitəsilə onlara dəstəyin göstərilməsidir. Azərbaycan demokratik ölkədir və onun vətəndaşlarının Konstitusiya və qanunlarla müəyyən olunmuş hüquqları var. Bu baxımdan Azərbaycanda problem yoxdur. Lakin maraqlısı odur ki, müxalifətin radikal qanadı hüquqlarını bildiyi halda vəzifələrini dərk etmək istəmir. Vəzifə isə həmin qanunlara hörmət etmək, fəaliyyətlərini qanunlar çərçivəsində qurmaqdır.

Azərbaycan dövlətinin bugününün və sabahının məsuliyyətini təkcə iqtidarın daşımadığını deyən Aydın Mirzəzadənin sözlərinə görə, bu məsuliyyət yükü iqtidarla bərabər müxalifətin də çiyninə düşür: "Hazırda parlamentdə təmsil olunan müxalifət partiyaları bu məsuliyyətin bir hissəsini öz çiyinlərində daşıyırlar. Amma gəlin görək, 9 milyonluq dövlətə rəhbərlik etmək iddiasında olan radikallar bu məsuliyyəti çiyinlərində daşımaq istəyirlərmi? Onlar dövlətimizin milli maraqlarını qoruyurlarmı? Bu gün Azərbaycanın milli maraqlarını nəyəsə qurban vermələrinin fərqindədirlərmi? Bunlar Azərbaycanı nəyə çəkirlər? Onların məqsədi hakimiyyət naminə bütün Azərbaycanı satmaqdır".

Aydın Mirzəzadə onu da əlavə etdi ki, bu gün radikal müxalifətə qarşı mübarizədə ictimai fikir də böyük rol oynayır. Bu məsələlərə ziyalıların münasibət bildirməsi olduqca təqdirəlayiq haldır. Ayrı-ayrı ictimai təşkilatların, sosial təbəqələrin münasibət bildirməsi müxalifətə qarşı çox ciddi ictimai narazılığın olduğunu göstərir. Bu baxımdan dövlətin də bu məsələlərdə prinsipial mövqeyi başadüşüləndir və qəbulediləndir. "Çox istərdim ki, bu gün siyasi fəaliyyətdə olan, Azərbaycanın adından danışmaq iddiasına düşən kəslər öz fəaliyyətlərinin nəyə gətirib çıxardığını, şəxsi mənafeləri üçün cəmiyyətin, dövlətin, xalqın mənafeyini güdaza vermək istəklərinin fərqində olsunlar. Bir qrup insan Azərbaycanın ziyanına istədikləri addımı atmağa çalışır. Lakin cəmiyyət bunun qarşısını qətiyyətlə alacaq və radikal müxalifətin xarici sifarişlə dövlətin və xalqın əleyhinə hər hansı bir addımı atmasına imkan verməyəcək" -deyə Aydın Mirzəzadə bildirdi.

Həmkarlarının radikal müxalifətin qanunsuz hərəkətləri ilə bağlı tənqidi fikirlərini dəstəkləyən Fəzail Ağamalı bu gün ölkəmizdə süni qarşıdurma yaratmağa çalışanları məsuliyyətli olmağa, ölkəmizdə əldə edilmiş uğurların əleyhinə yönələn və antimilli xarakter daşıyan layihələrin reallaşmasından uzaq durmağa çağırdı. Fəzail Ağamalı Abel Məhərrəmovun qaldırdığı məsələnin də çox aktual olduğunu diqqətə çatdıraraq bununla bağlı qanunvericilikdə dəyişikliklərin edilməsini vacib saydı.

Deputat Fəzail Ağamalı erməni separatçılarının Xankəndidə hava limanı açmaq istəmələrinə də münasibət bildirdi. Qeyd etdi ki, Azərbaycan dövlətinin ciddi fəaliyyəti nəticəsində bu məsələyə aydınlıq gətirildi və Ermənistan tərəfi bu limanın açılmasını təxirə saldı. "Azərbaycan dövlətinin bu istiqamətdə ortaya qoyduğu siyasi iradə davam etdirilməli, heç bir halda Xankəndidə Ermənistanın müxtəlif məqsədlər üçün istifadə edəcəyi hava limanının açılmasına imkan verməməlidir" - deyən deputat bu məsələdə ABŞ-ın Azərbaycandakı səfiri Mətyu Brayzənin də mövqeyini ciddi tənqid etdi. ABŞ səfirinin Xankəndidəki hava limanı ilə bağlı vermiş olduğu açıqlamalarda Ermənistanın mövqeyini müdafiə etdiyini deyən Fəzail Ağamalı bunun təəssüf hissi doğurduğunu, lakin Mətyu Brayzənin bundan sonrakı fəaliyyətində bu cür səhvlərə və qeyri-obyektivliklərə yol verməyəcəyinə ümidvar olduğunu dedi.

Deputat Musa Qasımlı bildirdi ki, bütün siyasi partiyalar ölkəmizin taleyi üçün məsuliyyət daşıyırlar. Respublikamız sınaq meydanına çevrilməməlidir. Hər bir siyasi partiya ölkəmizin demokratik yolla inkişafına çalışmalıdır.

Müxalifətin icazəsiz aksiyalar keçirmək cəhdinə münasibət bildirən deputat Azay Quliyev dedi ki, hər bir hərəkət qanun çərçivəsində olmalıdır. Qanunu pozan hər hansı bir əmələ və yaxud da cəhdə icazə verilməməlidir. Təəssüflər olsun ki, bu gün beynəlxalq təşkilatlar tərəfindən bu məsələyə də fərqli münasibət ortaya qoyulur. Azay Quliyevin bildirdiyinə görə, ATƏT-in hazırkı sədri deyib ki, guya Azərbaycan "Sərbəst toplaşmaq azadlığı haqqında" qanuna əməl etmir, müəyyən məhdudiyyətlər qoyur. "Bu cür düşünmək yanlışlıqdır" - deyən Azay Quliyevin sözlərinə görə, heç bir halda müxalifətin mitinqlə bağlı müraciətinə "yox" cavabı verilməyib. Sadəcə olaraq, radikal müxalifətin istədiyi yerdə deyil, Bakı Şəhər İcra Hakimiyyətinin müvafiq bildiyi yerdə mitinqin keçirilməsinə icazə verilib. Ona görə beynəlxalq təşkilatlar məsələyə yanlış yanaşmalarını aradan qaldırmalıdırlar.

Azay Quliyev magistratura ilə bağlı məsələyə də münasibət bildirərək Abel Məhərrəmovun qaldırdığı problemin çox aktual olduğunu söylədi. Qeyd etdi ki, təhsilin pillələri arasında əlaqəni qırmamaq, davamiyyəti təmin etmək üçün magistratura ilə bağlı yeni bir yanaşma ortaya qoyulmalıdır.

Azay Quliyev onu da bildirdi ki, Azərbaycan ermənilərin Xankəndidə hava limanı açmaq istəmələrinə adekvat münasibət ortaya qoydu. Deputat qeyd etdi ki, bununla belə ABŞ-ın Azərbaycandakı səfirliyinin Xankəndidə hava limanının açılması ilə bağlı ortaya qoyduğu münasibət çox təəssüfləndiricidir. Dağlıq Qarabağ Azərbaycanın Ermənistan tərəfindən işğal olunmuş ərazisidir. İşğal altında olan bir əraziyə beynəlxalq qanunvericiliyə zidd olaraq Ermənistandan hava reyslərinin təşkil edilməsi və ABŞ-ın buna dəstək nümayiş etdirməsi çox böyük yanlışlıqdır.

İclasda radikal müxalifətin icazəsiz aksiya cəhdləri ilə bağlı səslənən tənqidi fikirlərə Milli Məclis Sədrinin müavini Bahar Muradova da münasibətini bildirdi. Qeyd etdi ki, əgər mitinqin keçirilməsi zamanı qanunun tələbləri gözlənilsəydi, ona Milli Məclisdə münasibətin bildirilməsinə də ehtiyac qalmazdı. "Amma mitinq adına Azərbaycanda ictimai asayişin pozulmasına cəhdlər edilir. Bu cəhdləri də stimullaşdıran xarici dairələr var. Həmin dairələr bu cəhdlərin reallığa çevrilməsi üçün maksimum səy göstərirlər. Ortada olan budur. Qanun çərçivəsində mitinq keçirməyin şərtləri var. Bu çərçivədə mitinq keçirsinlər ki, insanlar da onları tənqid etməsinlər. Yox, əgər, mitinq adına küçələrə çıxıb insanların mülkiyyətinə, əmlakına, mənəviyyatına zidd olan hərəkətlərə yol verəcəklərsə, bu, hər kəsin ciddi qınağına və məsuliyyətə səbəb olacaq. Bugünkü səslənən fikirlərdə də əsas tələb ondan ibarətdir ki, hər kəs qanunla müəyyənləşdirilmiş hüquqlarını məhz qanun çərçivəsində reallaşdırsın" - deyə Bahar Muradova bildirdi.

Daha sonra Bahar Muradova televiziya və mətbuatda Azərbaycan dilinin işlənilməsi qaydaları ilə bağlı fikirlərini bölüşdürdü. Ümummilli lider Heydər Əliyevin "Azərbaycan dili bu gün dərin fikirləri ən incə çalarlarınadək olduqca aydın bir şəkildə ifadə etmək qüdrətinə malik dillərdəndir" kəlamını diqqətə çatdıran Bahar Muradovanın sözlərinə görə, bu, həqiqətən də belədir. Çünki əsrlər, minilliklər boyu xalqımız öz mədəniyyətini, tarixini inkişaf etdirdiyi kimi dilini də yüksək səviyyədə inkişaf etdirib. Bu gün Azərbaycan dili ölkədə və dünyada ən dəqiq fikirləri incəliklərinə qədər ifadə etmək qüdrətinə malikdir. Bu, bizim əldə etdiyimiz çox böyük nailiyyətdir. Bu nailiyyətin əksər hissəsi də məhz XX əsrdə bizim bir çoxlarımızın iştirakı ilə əldə olunmuşdur. Lakin çox təəssüf ki, ötən əsrin sonlarından və bu əsrin əvvəllərindən biz Azərbaycan dilinə müxtəlif zərbələrin vurulması ilə bağlı tendensiyaları müşahidə edirik.

Bahar Muradova əlavə etdi ki, çox zaman bunu sakit şəkildə müşahidə edirik, lakin Azərbaycan qanunvericiliyinə əsasən mülkiyyət formasından asılı olmayaraq Azərbaycan Respublikasının ərazisində fəaliyyət göstərən, dövlət dilində yayımlanan bütün televiziya və radioların aparıcıları bu dili mükəmməl bilməli və səlis danışıq dilinə malik olmalıdırlar. Amma bu tələb bu gün lazım olduğu qədər yerinə yetirilmir. Dilin ifadə formasından, intonasiyadan düzgün istifadə olunmalıdır. Azərbaycanın dövlət televiziyasından və radiosundan bu sahədə çox böyük örnək götürmək olar. Bu işi yaxşı yerinə yetirən digər televiziya kanalları da var. Amma dilin işlənmə və intonasiya qaydalarına ən yaxşı Azərbaycan televiziyası və radiosunda əməl olunur. Əsrlər boyu dil sahəsində qazandığımız nailiyyətlər burada qorunur. Bu nümunə kimi istifadə olunmalıdır". Bəzi televiziya kanallarının ana dilimizin tələblərini pozması ilə bağlı narazılığını diqqətə çatdıran Bahar Muradova onu da bildirdi ki, hətta həmin televiziya və radio kanallarının rəhbərliyi ilə əlaqə saxlayaraq buna etirazını da bildirib. Konkret olaraq "Xəzər" televiziyasını misal göstərən Bahar Muradovanın sözlərinə görə, indiyə qədər bir neçə dəfə bu telekanalın rəhbərliyinə etirazını bildirsə də, xeyri olmayıb. Bu kanalın xəbərlər proqramında kadrarxası danışıqlar xüsusilə qəbuledilməzdir. Heç bir dildə bu cür intonasiya tərzi yoxdur. İntonasiyada yalnız aqresiya müşahidə olunur. Elə bir hay-həşir qopardılır ki, elə bil dünya dağılır. Səsin özündəki intonasiya tərzi insanı dəhşətə gətirir.

Bahar Muradova Azərbaycan dilinin tətbiqi qaydalarına riayət edilməməsi ilə bağlı məsuliyyətin formalarının müəyyənləşdirilməsi üçün Milli Məclisin müvafiq komitələrinə, parlament aparatının şöbələrinə araşdırmalar aparmaqla bağlı tapşırıq verilməsini təklif etdi. "Azərbaycan dilinin intonasiyasını pozmağa heç kimin ixtiyarı yoxdur. Bu dili səlis və gözəl edən onun intonasiyasıdır, vurğuların yerində işlənməsidir. Dilçi alimlər, ziyalılar, dilimizin incəliklərini bilən insanlar, müvafiq qurumlar bu məsələyə çox ciddi diqqət yetirməli və Azərbaycan dilini gözümüzün qarşısında öz gözəlliklərini itirməsinə biganə qalmamalıdırlar. Dövlətimizin və xalqımızın qarşısında dayanan hədəflərdən biri də məhz budur ki, mədəniyyətimizi və dilimizi qorumalı, onu olduğu kimi gələcək nəsillərə ötürməliyik"- deyə Bahar Muradova bildirdi.

Deputat Elman Məmmədov çıxışında bir məsələyə aydınlıq gətirdi. Bildirdi ki, Xankəndi şəhərində heç vaxt hava limanı olmayıb. Bu gün də yoxdur. Dağlıq Qarabağda yeganə hava limanı Xocalıda olub. Bu gün ermənilərin açmaq istədiyi hava limanı da həmin hava limanıdır. Ermənilər şəhərin ərazisi hesabına hava limanını genişləndiriblər.

İclasda Milli Məclisin Sədri Oqtay Əsədov da radikal müxalifətin aprelin 2-də cəhd etdiyi qanunsuz aksiyalara münasibət bildirdi. Spiker bildirdi ki, vaxtilə SSRİ-nin xüsusi xidmət orqanları tərəfindən təşkil olunan Sumqayıt hadisələrində əsas məqsəd Azərbaycan xalqının dünya ictimaiyyətində mənfi obrazını yaratmaq olmuşdur. Axşam baş verən Sumqayıt hadisələri barədə səhəri gün saat 12-də İngiltərədə və digər ölkələrdə televiziya ilə məlumat verildi. Yəni Sumqayıt hadisələri əvvəlcədən qurulmuş ssenari əsasında həyata keçirildi. Əfsuslar olsun respublikamızı dünyada nüfuzdan salmaq istəyən, Azərbaycanın inkişafına xəbis gözlə baxan bəzi ölkələr radikal müxalifət partiyalarının dəstəyi ilə eyni ssenarini aprelin 2-də həyata keçirməyə cəhd göstərdilər. Parlamentin Sədri Oqtay Əsədov qeyd etdi ki, şəhərin küçələrinə çıxan 200-300 nəfərin əsas məqsədi pozuculuq və süni qarşıdurma yaratmaq və bunun xarici kütləvi informasiya vasitələrində nümayiş etdirilməsi idi.

Milli Məclisin Sədri onu da bildirdi ki, icazəsiz aksiya bir daha sübut etdi ki, radikal müxalifətin sosial bazası tükənib: "Mən inanmıram ki, belə bir biabırçı təşkil olunmuş mitinqdən sonra bunlar yenidən mitinq keçirmək istəsinlər. Azərbaycanda bu cür qarışdırıcı məsələlərə, belə mitinqlərə yer yoxdur. Mitinqlər bir daha sübut etdi ki, radikal müxalifətin sosial bazası yoxdur".

Deputatlardan Fazil Mustafa, İqbal Ağazadə, Elmira Axundova da çıxış edərək bəzi məsələlərlə bağlı qənaətlərini bölüşdülər.

İclasda 1992-ci il aprel ayının 8-də ermənilərin Kəlbəcər rayonunun Ağdaban kəndinə hücumu zamanı qətlə yetirilmiş soydaşlarımızın xatirəsi sükutla yad edildi.

Sonra gündəlikdəki məsələlərin müzakirəsi başladı. Milli Məclisin Hüquq siyasəti və dövlət quruculuğu komitəsinin sədri Əli Hüseynli "Azərbaycan Respublikasında 2011-ci ilin "Turizm ili" elan edilməsi ilə əlaqədar Azərbaycan Respublikasına gələn turistlərə viza rəsmiləşdirilməsi qaydalarının sadələşdirilməsi məqsədi ilə "Ölkədən getmək, ölkəyə gəlmək və pasportlar haqqında" Azərbaycan Respublikasının Qanununda dəyişikliklər edilməsi barədə" Azərbaycan Respublikası qanununun layihəsini müzakirəyə təqdim etdi. Dəyişikliklərə əsasən, qanunun 13-cü maddəsinin ikinci hissəsi üçüncü hissə hesab edilir və maddəyə bu məzmunda ikinci hissə əlavə olunur: "Turistlərə birdəfəlik giriş-çıxış üçün vizalar verilir. Belə vizalarda ölkədə qalma müddəti 30 günədək müəyyən edilir". Digər dəyişikliklərə əsasən, viza almaq üçün əcnəbilər gəlişin məqsəd və müddətini göstərməklə, viza verilməsi haqqında ərizə ilə (şəxsən və ya nümayəndəsi vasitəsilə) ölkəsində və ya üçüncü ölkələrdə Azərbaycan Respublikasının səfirliklərinə və konsulluqlarına, müvafiq icra hakimiyyəti orqanı tərəfindən müəyyən edilmiş hallarda isə birbaşa müvafiq icra hakimiyyəti orqanına müraciət edərək tələb olunan sənədləri və viza verilməsi üçün dövlət rüsumunun ödənilməsi barədə qəbzi ərizəyə əlavə etməlidirlər. Viza rəsmiləşdirilməsi "Giriş-çıxış və qeydiyyat" idarələrarası avtomatlaşdırılmış məlumat-axtarış sistemi vasitəsilə həyata keçirilir.

Qanuna edilən digər dəyişikliklərə əsasən, turistlər viza almaq üçün turizm şirkətləri vasitəsilə müraciət edirlər. Turizm şirkətləri turistlərə viza almaq üçün elektron qaydada müraciət edə bilərlər. Turistlərə viza almaq üçün turizm şirkətləri şəxsin sənədlərini həmçinin poçt vasitəsilə Azərbaycan Respublikasının səfirliklərinə və konsulluqlarına göndərə bilərlər. Sənədlər daxil olduqdan sonra onlara qanunvericiliklə müəyyən edilmiş qaydada və müddətdə baxılır və viza rəsmiləşdirilərək şəxsin pasportu və digər sənədləri poçt vasitəsilə turizm şirkətlərinə qaytarılır. Viza verilməsindən imtina etdikdə sənədlər müvafiq məqsədlə geri qaytarılır. Dəyişikliklərə əsasən, turistlərə viza verilməsi haqqında ərizələrə müraciət edildiyi gündən ən geci 15 iş günü keçənədək baxılır.

Müzakirələr zamanı Milli Məclisin Sosial siyasət komitəsinin sədri Hadi Rəcəbli, deputatlardan Azay Quliyev, Çingiz Qənizadə, Hikmət Atayev layihə ilə bağlı fikirlərini bildirdilər. Qanun layihəsi səsə qoyulub təsdiq olundu.

Milli Məclisin Hüquq siyasəti və dövlət quruculuğu komitəsinin sədri Əli Hüseynli "Azərbaycan Respublikasının 2009-cu il 4 dekabr tarixli 930-IIIQ nömrəli qanunu ilə təsdiq edilmiş "Miqrasiya orqanlarında qulluq keçmə haqqında Əsasnamə"də dəyişiklik edilməsi barədə" qanunun layihəsi barədə məlumat verdi. Bildirdi ki, dəyişikliyə əsasən, layihəyə bu məzmunda 90-1-ci maddənin əlavə edilməsi nəzərdə tutulur: "Miqrasiya sahəsində qanunvericiliyin pozulmasına görə miqrasiya orqanları tərəfindən Azərbaycan Respublikasının İnzibati Xətalar Məcəlləsinə əsasən tətbiq edilən cərimələrdən toplanan vəsaitin 25 faizi miqrasiya orqanları işçilərinin sosial müdafiəsini gücləndirmək və maddi təminatı yaxşılaşdırmaq məqsədilə müvafiq icra hakimiyyəti orqanının hesabına keçirilir. Bu vəsaitdən istifadə qaydası müvafiq icra hakimiyyəti orqanı tərəfindən müəyyən edilir". Qısa müzakirədən sonra bu qanun layihəsi də qəbul olundu.

İclasda "İcbari sığortalar haqqında" Azərbaycan Respublikasının qanun layihəsi (ikinci oxunuş) müzakirə olundu. Layihə ilə bağlı Milli Məclisin İqtisadi siyasət komitəsinin sədri Ziyad Səmədzadə məlumat verdi. Qeyd edək ki, bu qanunun qəbulunda məqsəd Azərbaycan Respublikasında icbari sığorta sahəsində sığortaçılar, sığortalılar, sığorta olunanlar və faydalanan şəxslər arasında hüquqi və iqtisadi münasibətləri tənzimləməklə onların hüquq və mənafelərinin qorunması məqsədilə Azərbaycan Respublikasında icbari sığortaların həyata keçirilməsinin ümumi əsaslarını, həmçinin ayrı-ayrı icbari sığorta növlərinin qaydalarını və şərtlərini müəyyən etməkdir. Qanun layihəsi ümumi və xüsusi hissədən ibarətdir. Layihədə daşınmaz əmlakın icbari sığortası, nəqliyyat vasitəsi sahiblərinin mülki məsuliyyətinin icbari sığortası, daşınmaz əmlakın istismarı ilə bağlı mülki məsuliyyətin icbari sığortası və sərnişinlərin icbari fərdi sığortası ilə bağlı müddəalar öz əksini tapıb.

Qanun layihəsi ilə bağlı münasibətini bildirən Milli Məclisin Sosial siyasət komitəsinin sədri Hadi Rəcəbli belə bir qanunun qəbul edilməsinin mühüm əhəmiyyət kəsb etdiyini bildirdi. Qeyd etdi ki, sosial müdafiənin əsas tələblərindən biri insanların sığorta olunmasıdır.

Deputatlardan Əli Məsimli, Elmira Axundova, Musa Quliyev, Leyla Abdullayeva və İlham Məmmədov layihə ilə bağlı fikirlərini bildirdilər. Qanun layihəsi ikinci oxunuşda qəbul olundu.

İclasda "Azərbaycan Respublikasının Milli Məclisinin parlamentlərarası əlaqələr üzrə işçi qruplarının rəhbərlərinin seçilməsi haqqında" məsələ də müzakirəyə çıxarıldı və təsdiq olundu.

Azərbaycan.- 2011.-9 aprel.- S. 2.