Azərbaycanın və Türkiyənin müdafiə nazirinin görüşü

Azərbaycan Respublikasının müdafiə naziri general-polkovnik Səfər Əbiyevin başçılıq etdiyi nümayəndə heyəti Türkiyə Respublikasının müdafiə naziri Vəcdi Gönülün dəvəti ilə Ankarada səfərdədir. Türkiyə Müdafiə Nazirliyində Səfər Əbiyevin və Vəcdi Gönülün görüşü olmuşdur. Vəcdi Gönül bildirmişdir ki, ulu öndər Heydər Əliyevin söylədiyi kimi "Bir millət, iki dövlət" olan ölkələrimiz arasında əməkdaşlıq yüksək səviyyədədir. Azərbaycan çox sürətlə inkişaf edən, böyük uğurlara imza atan və regionun həm iqtisadi, həm siyasi, həm də hərbi baxımdan aparıcı dövlətinə çevrilmişdir. Görüşdə ikitərəfli məsələlər və Dağlıq Qarabağ problemi müzakirə edilmişdir.

Səfər Əbiyev Türkiyənin bütün məsələlərdə Azərbaycanı dəstəklədiyini vurğulamış və qardaş ölkə xalqına bunun üçün təşəkkürünü bildirmişdir. Torpaqlarımızın 20 faizinin Ermənistanın işğalı altında olduğunu xatırladan müdafiə naziri demişdir ki, biz torpaqlarımızın bir qarışını da kimsəyə verməyəcəyik. Azərbaycan bütün gücünü səfərbər edərək, Silahlı Qüvvələri gücləndirərək lazım olan anda öz torpaqlarını azad edəcəkdir. Bizim mövqeyimiz qətidir. Ermənistan torpaqlarımızı qeyd-şərtsiz azad etməlidir.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2011.- 9 aprel.- S. 2.