Ümumdünya Mədəniyyətlərarası Dialoq Forumu çərçivəsində “Dialoq - dünya dinləri arasında və onların sırasında” mövzusunda ikinci paralel seminar

 

Aprelin 8-də Ümumdünya Mədəniyyətlərarası Dialoq Forumu çərçivəsində “Dialoq - dünya dinləri arasında və onların sırasında” mövzusunda ikinci seminar keçirilmişdir.

AzərTAc xəbər verir ki, seminara Azərbaycan Respublikasının Dini Qurumlarla İş üzrə Dövlət Komitəsinin sədri Hidayət Orucov və Avropa Şurasının Şimal-Cənub Mərkəzinin icraçı direktoru Denis Huber həmsədrlik etmişlər.

Hidayət Orucov demişdir ki, keçən əsrin totalitar rejimlərinin təqdim etdikləri mədəniyyətlər və xalqların qardaşlıq dialoqu sünilikdən başqa bir şey deyildi və həmin təcrübənin bəşəriyyətə necə başa gəldiyini hamımız yaxşı xatırlayırıq. Bu gün Ermənistan Respublikası adlanan işğalçı dövlətin Azərbaycana təcavüzü həmin süniliyin bariz nümunəsidir.

Natiq vurğulamışdır ki, əsrlər boyu respublikamızda çoxsaylı etnosların yaşamasına və dini tərkibin müxtəlif olmasına baxmayaraq, hər etnos milli-mədəni kimliyini qoruyub saxlayıb, bu zəmində heç bir vətəndaş qarşıdurması baş verməmişdir. Azərbaycanın təcrübəsi göstərir ki, hər mədəniyyətdə ilk baxışda yad görünə biləcək başqa bir mədəniyyətin izini tapmaq və buna söykənərək planetimizi yeni dəyərlərlə zənginləşdirmək mümkündür.

Avropa Şurasının Şimal-Cənub Mərkəzinin icraçı direktoru Denis Huber, Birləşmiş Krallığın Üç Din Forumunun prezidenti Markus Breybrok, ABŞ-ın Avrasiya Siyasəti Mərkəzinin keçmiş direktoru xanım Zeyno Baran, Anna Linq Fondunun Portuqaliya şəbəkəsinin rəhbəri Francisco Veiga xalqlar arasında dini dözümlülük və tolerantlıq mühitinin formalaşmasında Bakı Forumunun əhəmiyyətini yüksək qiymətləndirmişlər.

Bildirilmişdir ki, belə tədbirlər müxtəlif dinlər arasında anlaşmaya və daha yaxşı bilik, təcrübə qazanmağa, ən əsası isə qarşılıqlı hörmət münasibətlərinin get-gedə daha da möhkəmlənməsinə təkan verəcəkdir.

Seminarda Qafqaz Müsəlmanları İdarəsi sədrinin birinci müavini hacı Salman Musayev, Bakı və Xəzəryanı Yeparxiyanın yepiskopu Aleksandr, dağ yəhudiləri icmasının sədri Semyon İxiilov və başqaları çıxış edərək mədəni dəyərlərlə dini dəyərlərin vəhdət təşkil etməsindən, bu dəyərlərin bir-biri ilə qarşılıqlı şəkildə bağlılığından danışmışlar.

 

 

Azərbaycan.- 2011.- 9 aprel.- S. 4.