Konqres başa çatmışdır

Bakıda keçirilən Sivilizasiyaların İttifaqı Uğrunda Qlobal Gənclər Hərəkatının (SİQGH) birinci konqresi aprelin 10-da başa çatmışdır. Qırx ölkədən 100-dən çox gəncin iştirak etdiyi konqresdə hərəkatın fəaliyyət mexanizmləri, beynəlxalq təşkilatlarla əməkdaşlıq, xüsusilə mədəniyyətlərarası fobiya zəminində baş verən münaqişələrin həllinə yönəlmiş mexanizmləri özündə əks etdirən Nizamnamə, Bakı Bəyannaməsi və Fəaliyyət Planı qəbul olunmuşdur.

AzərTAc xəbər verir ki, tədbirin bağlanış mərasimində Dialoq və Əməkdaşlıq Uğrunda İslam Konfransı Gənclər Forumunun baş katibi Elşad İsgəndərov, Avropa Şurasının gənclər və idman departamentinin direktoru Ralf-Rene Vaynqartner, BMT-nin Sivilizasiyaların İttifaqı gənclər proqramının əlaqələndiricisi İzabella Leqare, Gənclər Təşkilatları Milli Şurasının sədri, Milli Məclisin deputatı Fuad Muradov, Gənclər və İdman Nazirliyinin gənclərlə iş şöbəsinin müdiri Fərhad Hacıyev iki gün ərzində görülmüş işlərdən danışmış, mədəniyyətlərarası əlaqələrin inkişafında yeni təsis edilmiş hərəkatın əhəmiyyətini vurğulamışlar.

Böyük Britaniyada yaşayan tanınmış tədqiqatçı və iş adamı Əziz İbrahim sivilizasiyaların yaxınlaşması prosesi barədə xüsusi məruzə ilə çıxış etmişdir.

Sonra layihənin təşkilatçıları mətbuat konfransı keçirmişlər. Bildirilmişdir ki, hərəkat dünyanın müxtəlif mədəniyyətlərini təmsil edən gəncləri vahid təşkilatda birləşdirərək onların səslərinin bəyan edilməsinə imkan yaradacaqdır. SİQGH dünya gənclərinin fəaliyyətinin genişləndirilməsinə, sivilizasiyaların ittifaqında rolunun artırılmasına təkan verəcəkdir.

Sonda iştirakçılar tədbirin yüksək səviyyədə təşkilinə görə Heydər Əliyev Fonduna, Dialoq və Əməkdaşlıq Uğrunda İslam Konfransı Gənclər Forumuna, Gənclər və İdman Nazirliyinə minnətdarlıq etmişlər.

Azərbaycan.- 2011.- 12 aprel.- S. 7.