Prezident İlham Əliyev Astarada Dövlət Bayrağı Meydanı ilə tanış olmuş, Gənclər evinin açılışında iştirak etmişdir

Aprelin 15-də Prezident İlham Əliyev Astarada Gənclər evinin açılışında iştirak etmişdir.

Əvvəlcə Prezident İlham Əliyev Astara şəhərinin Heydər Əliyev prospektində yaradılmış Dövlət Bayrağı Meydanı ilə tanış oldu. Meydanda 65 metr hündürlüyündə Dövlət Bayrağı ucaldılmışdır. Ətrafda ən müasir tələblərə cavab verən park salınmış, müasir işıqlandırma sistemi qurulmuş və abadlıq işləri görülmüşdür.

Dövlət başçısı Gənclər evinin açılışını bildirən lenti kəsdikdən sonra ümumi sahəsi 900 kvadratmetr olan ikimərtəbəli bina ilə tanış oldu. Bildirildi ki, burada gənclərin istirahəti və dincəlməsi üçün hər cür şərait yaradılmışdır. Gənclər internet klubda kompüterlə işləmək vərdişlərinə yiyələnəcəklər. Şahmat klubunda isə yeniyetmə və gənclər bu qədim oyunun sirlərinə yiyələnə, Dövlət Bayrağı Muzeyində Azərbaycan tarixinin şanlı səhifələri ilə tanış ola biləcəklər. Muzeydə 1918-ci ildən bəri Azərbaycanda mövcud olan dövlət bayraqlarının nümunələri təqdim edilir, bununla yanaşı, qədim pullar, medallar və digər tarixi eksponatlar nümayiş olunur. Muzeydə Azərbaycanın hərb tarixinə dair eksponatlara və ordu zabitlərinin geyim formalarına da geniş yer verilmişdir.

Prezident İlham Əliyev görülmüş işləri yüksək qiymətləndirdi.

AzərTAc

Azərbaycan.- 2011.-16 aprel.- S. 3.