Azərbaycan-Fransa parlamentlərarası əlaqələr dinamik inkişaf edir

Aprelin 18-də Milli Məclisin Sədri Oqtay Əsədov ölkəmizdə səfərdə olan Fransa-Qafqaz dostluq qrupunun sədri, senator Ambruaz Düponun başçılıq etdiyi nümayəndə heyəti ilə görüşmüşdür.

Parlamentin Sədri senator Ambruaz Düponun ölkəmizə yenidən səfər etməsindən məmnunluğunu ifadə etdi. Ötən beş il ərzində Ambruaz Düponla üçüncü dəfə görüş keçirdiyini xatırladan O.Əsədov qarşılıqlı səfərlərin əməkdaşlıq əlaqələrinin inkişafına böyük töhfə verdiyini bildirdi. Azərbaycan dövləti Fransa ilə əlaqələrin inkişaf etdirilməsində maraqlıdır. Azərbaycan Prezidentinin Fransaya səfərləri və ən müxtəlif sahələrə dair imzalanan sənədlər ölkələrimiz arasında əməkdaşlığın genişləndirilməsinə müsbət təsir göstərir.

Milli Məclisin Sədri Azərbaycan-Fransa parlamentlərarası əlaqələrin də dinamik inkişaf etdiyini bildirdi. Parlamentlərarası dostluq qruplarının bu sahədə gördüyü işləri təqdir etdi. O.Əsədov əlavə etdi ki, deputat Mehriban xanım Əliyeva Azərbaycan-Fransa parlamentlərarası dostluq qrupuna sədr seçilib və əminliklə bildirdi ki, ölkələrimiz arasında əməkdaşlıq bundan sonra daha da inkişaf edəcəkdir. Bu baxımdan Fransada keçiriləcək sərgi də əməkdaşlığın yüksək səviyyədə olduğunu bir daha göstərir.

O.Əsədov Azərbaycanın son illərdə iqtisadi sahədə əldə etdiyi uğurlardan danışdı. Ölkəmizin davamlı inkişaf yolunda olduğunu və Avropa strukturlarına sıx inteqrasiya etdiyini bildirdi. Parlamentin Sədri ölkəmizin üzləşdiyi ən ağrılı problemə də diqqəti cəlb etdi. Bildirdi ki, Ermənistan-Azərbaycan, Dağlıq Qarabağ münaqişəsi nəticəsində torpaqlarımızın 20 faizi işğal olunmuş, 1 milyondan artıq soydaşımız öz doğma yurdlarından didərgin düşmüşdür. ATƏT-in Minsk qrupunun həmsədr ölkələrindən olan Fransa dövləti bu münaqişənin ölkələrin ərazi bütövlüyü çərçivəsində həllinə tərəfdardır. Hesab edirik ki, Fransa dövləti münaqişənin sülh yolu ilə həll edilməsi istiqamətində öz səylərini artıracaqdır.

Fransa-Qafqaz dostluq qurupunun sədri, senator Ambruaz Düpon bu səfəri zamanı da Bakıda böyük inkişafın şahidi olduğunu və dəyişikliklərin onda dərin təəssürat yaratdığını bildirdi. Dostluq qrupunun sədri ölkəmizə ilk səfərini və ümummilli lider Heydər Əliyev ilə görüşünü məmnunluqla xatırlatdı. Ümummilli liderlə görüşün onda böyük təəssürat yaratdığını deyən qonaq ölkəmizə həmin səfərindən sonra Azərbaycanı daha yaxından tanımağa başladığını bildirdi.

Sonda tərəflər qarşılıqlı maraq doğuran digər məsələlər ətrafında da fikir mübadiləsi apardılar.

Azərbaycan.- 2011.-19 aprel.- S. 3.