Frilanserlərin internet saytı təqdim olunmuşdur

Aprelin 17-də Müasir İncəsənət Muzeyində Azərbaycan Respublikasının Prezidenti yanında Dövlət İdarəçilik Akademiyası tələbələrinin azad sahibkarlıqda "SİFE" qrupu www.azfreelance.net internet saytını təqdim etmişdir.

AzərTAc xəbər verir ki, bu münasibətlə keçirilən mərasimdə "SİFE" tələbə təşkilatının nümayəndəsi Heydər Quliyev qurumun fəaliyyəti, həyata keçirdiyi layihələr haqqında məlumat vermişdir. Bugünkü tədbirin məqsədi isə təşkilatın saytını və Azərbaycanda frilanser mədəniyyətini geniş ictimaiyyətə tanıtmaqdır. Frilanserlərin sifarişçilər üçün müəyyən işlər görən peşə sahibi olduqlarını deyən natiq diqqətə çatdırmışdır ki, təşkilat işçiləri, işəgötürənləri və şirkət rəhbərlərini online sistem vasitəsilə əlaqələndirir. O, xidmətin geniş auditoriyası sayəsində sifarişçilərin qısa müddətə peşəkar dizaynerlər, proqramçılar, tərcüməçilər və başqaları ilə əlaqə yarada biləcəyini vurğulamışdır.

Tədbirdə Gənclər və İdman Nazirliyinin, "İrəli" İctimai Birliyinin, Xalq Bankın və bir sıra şirkətlərin nümayəndələri də iştirak etmişlər.

Sonda saytla bağlı videoçarx nümayiş olunmuşdur.

Azərbaycan.- 2011.- 19 aprel.- S. 4.