Mədəniyyətlərarası Dialoq Forumunun bir qrup iştirakçısı Astarada olmuşdur

Ümumdünya Mədəniyyətlərarası Dialoq Forumunun bir qrup iştirakçısının Astarada olması rayonun tarixində parlaq səhifə kimi yaddaşlarda qalacaqdır. Qonaqların Astara Pedaqoji Kollecində tələbə və müəllim kollektivi ilə səmimi görüşü, onların qarşısında aktual mövzularla çıxış etməsi, forumun məqsəd və məramı barədə fikirləri respublikanın 30-dan artıq şəhər və rayonundan gəlmiş gənclərin qəlbində silinməz izlər buraxacaqdır.

Qonaqlar ulu öndər Heydər Əliyevə böyük ehtiram əlaməti olaraq onun abidəsini ziyarət etmiş və təzə-tər çiçək dəstələrini abidənin önünə qoymuşlar. Heydər Əliyev Mərkəzində şəkil, stend və eksponatlara baxan qonaqlar Mərkəzə xeyli sayda kitab hədiyyə etmişlər. Astara Rayon İcra Hakimiyyətinin başçısı M.Quliyev qonaqları qəbul etmiş və rayona gəldiklərinə görə onlara öz minnətdarlığını bildirmişdir.

Qonaqların Astarada olduğu günlərdə rayonumuzun, eləcə də Cənub zonasının tarixi, mədəniyyət abidələri ilə tanışlığı, təbii mənzərəli yerlərini gəzmələri, füsunkar təbiətimizin canlı nümunələrinə və xalqımızın adət-ənənələrinə, hədsiz qonaqpərvərliyinə, istiqanlılığına yaxından bələdçilikləri onlarda bütövlükdə Azərbaycan haqqında olan fikirlərin yeniləşməsinə gətirib çıxaracaqdır. Qədim Azərbaycan torpağı olan Astara rayonunun Miki kəndində uzun əsrlərin sınağından keçib bu günə qədər gəlib çıxan maddi-mənəvi abidələrlə tanişlıq onlarda daha dərin təəssürat oyatdı. Qonaqlar sərhəd xəttində də olmuş, Astara Gömrük İdarəsinin iş fəaliyyətini yaxından izləmişlər.

Astara Pedaqoji Kollecində qonaqlarla tələbə və müəllim kollektivinin görüşü keçirilmişdir. Tələbə və müəllimlər qarşısında çıxış edən qonaqlar Azərbaycan xalqına, dövlətinə öz isti münasibətlərini bildirdilər. Söylədilər ki, mədəniyyətlərarası dialoq insanları bir-birlərinə yaxınlaşdırır və bu beynəlxalq forumun Azərbaycanda keçirilməsi təsadüfi deyil. Bu günsə Beynəlxalq Forum Astarada - Astara Pedaqoji Kollecində davam edir. Görüşdə kollecin direktoru Ə.Həmzəyev, qonaqlar çıxış etdilər. Kollecin müəllimlərindən şöbə müdirləri Nəsir Süleymanov, Əliheydər Həmzəyev və musiqi müəllimi Aybəniz Dadaşova qonaqları hərarətlə salamladı, onlara kollecə gəldiklərinə görə minnətdarlıq etdilər.

Tədbirdə Bakı şəhərində keçirilmiş Ümumdünya Mədəniyyətlərarası Dialoq Forumunun təkcə region üçün deyil, həm də bütün dünya üçün böyük əhəmiyyətə malik olduğu xüsusi vurğulandı. Forumun yüksək səviyyədə təşkili və keçirilməsi bir daha sübut etdi ki, Azərbaycan Respublikasının paytaxtı Bakı şəhəri həqiqətən dünyanın mədəniyyət mərkəzlərindən biridir. Belə görüşlərin keçirilməsi çox faydalıdır və müasir dünya üçün lazımlıdır. Həqiqətən də insanların daha çox ünsiyyət qurması və bir-birini daha yaxından tanımaları zəruridir.

Qonaqlar çıxışlarında birmənalı olaraq vurğuladılar ki, onlar ölkəmizdə gördüklərini bütün dünyaya yayacaq və Azərbaycan həqiqətlərini hər yerdə obyektiv olaraq təbliğ edəcəklər. Qeyd etdilər ki, bugünə qədər Azərbaycan haqqında indiki qədər biliyə malik deyildilər. Belə tədbirlər dünyanın Azərbaycanı həqiqətdə olduğu kimi tanımasına böyük töhfələr verir.

Azad ABDULLAYEV

Azərbaycan.- 2011.- 22 aprel.- S. 7.