Gəncədə görkəmli alim və yazıçı Mir Cəlal Paşayevin xatirəsi yad edilmişdir

Görkəmli alim və yazıçı Mir Cəlal Paşayevin anadan olmasının 108 illiyi vaxtilə təhsil aldığı və işlədiyi Gəncədə qeyd edilmişdir.

Bu münasibətlə ədibin ev-muzeyində keçirilən xatirə gecəsində iştirak edən şəhər ictimaiyyətinin nümayəndələri, alimlər, vaxtilə onun dərs dediyi tələbələri çıxış edərək onun bir müəllim, yazıçı və görkəmli elm xadimi kimi xidmətlərindən, Gəncə dövrü ilə bağlı yaradıcılığının əsas xüsusiyyətlərindən, eləcə də onun Azərbaycan elminə və ədəbiyyatına bəxş etdiyi ölməz irsindən danışmışlar.

Sonra görkəmli ədibin ad günü münasibətilə şəhər məktəbliləri arasında keçirilən inşa müsabiqəsinin qaliblərinin adları açıqlanmış və onlara yazıçının seçilmiş əsərləri təqdim olunmuşdur.

Xatirə gecəsi şəhərin incəsənət ustalarının ifasında səslənən musiqi nömrələri ilə başa çatmışdır.

AzərTAc

Azərbaycan.- 2011.-27 aprel.- S. 5.