Oqtay Əsədov: TürkPA-nın yaradılması müasir dünyanın çağırışları qarşısında xalqlarımızın qüvvələrini birləşdirmək üçün atılan uğurlu addım olmuşdur

Azərbaycan Milli Məclisinin Sədri Oqtay Əsədovun rəhbərlik etdiyi nümayəndə heyəti TürkPA-nın Astanada keçirilən ikinci plenar iclası çərçivəsində Qazaxıstan parlamenti Məclisinin rəhbəri Ural Muxamedcanov ilə görüşmüşdür.

U.Muxamedcanov qonaqları salamlayaraq bildirmişdir ki, Prezident Nursultan Nazarbayevin Azərbaycana, Prezident İlham Əliyevin isə Qazaxıstana qarşılıqlı səfərləri ölkələrimiz arasında münasibətlərin daha da inkişafına təkan vermişdir. Türkdilli ölkələrin dövlət başçılarının zirvə görüşləri zamanı əldə edilmiş razılaşmalar parlamentlərarası əlaqələrin inkişafına zəmin yaratmışdır. Naxçıvanda keçirilmiş zirvə görüşündə qəbul olunmuş mühüm qərarlar əlaqələrin möhkəmlənməsində mühüm mərhələ olmuşdur.

Qazaxıstan parlamenti Məclisinin rəhbəri demişdir ki, TürkPA-nın, Astanada Türk Akademiyasının yaradılması ilə əlaqədar məhz Naxçıvan zirvə görüşündə qərarlar qəbul edilmişdir.

O.Əsədov vurğulamışdır ki, TürkPA-nın Astanada keçiriləcək toplantısında aparılacaq fikir mübadiləsi, qəbul olunacaq qərarlar təşkilatın müasir tələblərə uyğun fəaliyyət göstərməsinə töhfəsini verəcəkdir.

Milli Məclisin Sədri demişdir: "Hesab edirəm ki, TürkPA-nın yaradılması müasir dünyanın çağırışları qarşısında xalqlarımızın qüvvələrini birləşdirmək üçün atılan uğurlu addım olmuşdur. Bu baxımdan 2009-cu ilin sentyabrında TürkPA-nın Bakıda keçirilmiş ilk plenar iclası böyük əhəmiyyət kəsb edir. Həmin iclasda qəbul edilmiş qərarlar təşkilatın güclənməsi və inkişaf etməsi üçün möhkəm təməl yaratmışdır. Bakıda Assambleyanın katibliyinin fəaliyyətə başlaması isə TürkPA-nın fəaliyyətinə dinamizm gətirmişdir".

O.Əsədov əmin olduğunu bildirmişdir ki, qısa müddətdən sonra TürkPA dünyanın ən nüfuzlu beynəlxalq təşkilatları sırasına daxil olacaqdır.

Azərbaycan.- 2011.-28 aprel.- S. 2.