Azərbaycan Milli Məclisinin Sədri Oqtay Əsədov Qazaxıstan parlamenti Senatının sədri Kayrat Mami ilə görüşmüşdür

Astanada keçiriləcək TürkPA-nın ikinci plenar iclası çərçivəsində Qazaxıstan parlamenti Senatının sədri Kayrat Mami Azərbaycan Milli Məclisinin Sədri Oqtay Əsədovun rəhbərliyi ilə nümayəndə heyəti ilə görüşmüşdür.

Kayrat Mami Azərbaycan nümayəndə heyətini salamlayaraq əmin olduğunu bildirmişdir ki, TürkPA-nın Astanada keçiriləcək ikinci plenar iclasında bu quruma sədrlik Azərbaycandan Qazaxıstana keçəcəkdir.

Oqtay Əsədov Qazaxıstan parlamenti Senatının sədri seçilməyi münasibətilə Kayrat Mamini təbrik etmiş, bu məsul işdə ona uğurlar arzulamışdır. Milli Məclisin Sədri əmin olduğunu bildirmişdir ki, Astanada keçiriləcək ikinci plenar iclasın nəticələri ölkələrimizin parlamentlərarası əməkdaşlığını yüksək səviyyəyə qaldıracaqdır.

Oqtay Əsədov demişdir: "İkitərəfli əlaqələrimizin dinamik inkişafı üçün ortaq dəyərlərimiz vardır. Bunlar bizim ortaq köklərimiz, ümumi dilimiz və tariximizdir. Qeyd etmək xoşdur ki, bu gün Azərbaycan Prezidenti İlham Əliyevin və Qazaxıstanın dövlət başçısı Nursultan Nazarbayevin səyləri nəticəsində ölkələrimiz arasında münasibətlər çox yüksək səviyyədədir".

Milli Məclis Sədri demişdir ki, TürkPA çərçivəsində əlaqələrimiz səmərəli inkişaf edir, bu, dövlətlərimizin və xalqlarımızın daha da yaxınlaşmasına kömək göstərir. O.Əsədov qeyd etmişdir ki, TürkPA parlamentlərarası əməkdaşlığın dərinləşdirilməsi, xalqlarımız üçün ümumi olan problemlərin açıq müzakirə edilməsi üçün əlverişli siyasi dialoq forumu rolunu oynayır.

Görüşdə Azərbaycanın Qazaxıstandakı səfiri Zakir Həşimov iştirak etmişdir.

Azərbaycan.- 2011.-28 aprel.- S. 2.