Bilik ocağında keyfiyyət, müasirlik və yüksək zövq vəhdət təşkil edir

Dövlətin xüsusi qayğısı sayəsində təhsil sahəsində ən diqqətçəkən nəticələr ölkədə məktəb tikintisinin geniş vüsət alması ilə bağlıdır. Bu problemin həlli - məktəblərdə əsaslı təmir-tikinti işlərinin aparılması, müasir tipli yeni təhsil ocaqlarının inşası regionların sosial-iqtisadi inkişafı dövlət proqramlarında, ölkə başçısının fərman və sərəncamlarında öz əksini tapmışdır.

Son bir neçə il ərzində Azərbaycanda 2000-dən çox yeni məktəb binası tikilmiş və əsaslı təmir edilmişdir. Nəticədə əksər məktəblərdə çoxnövbəlilik aradan qaldırılmış, beşgünlük tədris həftəsinə keçilmişdir.

Təhsil infrastrukturunun yeniləşdirilməsi sahəsində Heydər Əliyev Fondunun müstəsna xidmətləri xüsusi vurğulanmalıdır. Fondun dəstəyi ilə Ağsu rayonunun 9 kəndində yeni məktəb binası tikilib istifadəyə verilmişdir. Keçən dərs ilində V.Məmmədov adına Çiyni kənd tam orta məktəbi şagirdlərini ikimərtəbəli, müasir standartlara uyğun yeni binada qəbul etmişdir. Burada şagirdlərin biliklərə yiyələnmələri üçün hər cür şərait yaradılmışdır. Sinif otaqları, fənn kabinetləri, laboratoriyalar yeni avadanlıq və dərs ləvazimatları, əyani vəsaitlərlə təmin olunmuşdur. Geniş və işıqlı foyedə ulu öndər Heydər Əliyevin həyat və fəaliyyətinə həsr olunmuş xüsusi guşə yaradılmışdır. Zövqlə tərtib edilmiş fotostendlərdə Prezident İlham Əliyevin, Heydər Əliyev Fondunun müəllimə, gənc nəslə, ümumiyyətlə, ölkə təhsilinə və elminə göstərilən qayğı və diqqət geniş əksini tapmışdır. Məktəbin akt zalında kütləvi tədbirlərin keçirilməsi üçün də hər cür şərait var. Şagirdlər geniş zalda idmanın əksər növləri ilə məşğul olurlar. Təhsil ocağının müasir kitabxanası isə dərsliklərlə, bədii ədəbiyyatlarla təchiz edilmişdir. Məktəbdə yaradılmış şərait müəllim kollektivinin böyük sevincinə səbəb olmuşdur. Bir sözlə, bu bilik ocağında keyfiyyət, müasirlik və yüksək zövq vəhdət təşkil edir.

Azərbaycan.- 2011.-19 avqust.- S. 3.