Sahibkarlığın inkişafına dövlət dəstəyi gücləndirilir

Məlum olduğu kimi, "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrasının ikinci ilinin yekunlarına həsr edilmiş konfransda dövlət başçısı İlham Əliyev respublikamızda özəl sektorun, kiçik və orta sahibkarlığın inkişafına bundan sonra da xüsusi diqqət göstəriləcəyini bir daha bildirmişdir.

Bu da təsadüfi deyil. Son illər Azərbaycanın sürətli iqtisadi inkişafında kənd təsərrüfatının, onun əsas hərəkətverici qüvvəsi olan özəl sektorun, kiçik və orta sahibkarlığın rolu böyükdür. Təkcə bu faktı qeyd etmək kifayətdir ki, son iki ildə Azərbaycan iqtisadiyyatı 15 faiz artıb. Bu artıma, ilk növbədə, regionların sosial-iqtisadi inkişafı dövlət proqramlarının düzgün icrası sayəsində nail olunub. İqtisadiyyatın hər bir sahəsi, xüsusilə kiçik və orta sahibkarlıq inkişaf etdikcə, ölkədə sənayeləşmə prosesi sürətlənib. Bütün bunlar həm də onu göstərir ki, ölkə başçısı tərəfindən görülən tədbirlər öz bəhrəsini verməkdədir.

Konfransda belə bir fikir də səsləndi ki, son ildə investisiyaların böyük əksəriyyəti özəl sektorlar tərəfindən qoyulan daxili investisiyalardır. Bu həm də onu göstərir ki, Azərbaycan dövlətinin gücü artıb, özəl sektor ölkəmizdə gedən uğurlu proseslərdən bəhrələnir. Prezident İlham Əliyev həmin konfransda bununla bağlı demişdir: "Biz bundan sonra da dövlət investisiya proqramlarını icra edəcəyik. Hər il dövlət büdcəsindən böyük məbləğdə vəsait ayrılır. Amma mən çox istərdim ki, özəl sektor daha da böyük həcmdə investisiyalar qoysun, həm öz imkanlarını genişləndirsin, eyni zamanda, ölkənin inkişafı üçün də bunun böyük əhəmiyyəti vardır".

Azərbaycan hökumətinin dəstəyi ilə bu il Sahibkarlığa Kömək Milli Fondunun xətti ilə özəl sektora 127 milyon manat güzəştli kredit verilməsi nəzərdə tutulub. Beləliklə, verilən kreditlərin məbləği hər il artır və qayıdan vəsait yenidən kreditləşməyə yönəldiləcəkdir. Dünya praktikasından məlumdur ki, özəl sahibkarlığın inkişafı ölkələrin ümumi inkişafını təmin edir. Odur ki, Azərbaycan hökuməti də özəl sektora əlverişli kreditlər verilməsi üçün sahibkarlara hərtərəfli kömək edib, ölkə iqtisadiyyatının sürətli və etibarlı inkişafına zəmin yaradır. Nəticədə özəl sektorun maraqları ilə dövlətin maraqları üst-üstə düşür, ölkə iqtisadiyyatı çoxşaxəli şəkildə inkişaf edir, özəl sektor güclənir.

Dövlət Proqramında nəzərdə tutulduğu kimi, özəl sektor, kiçik və orta sahibkarlıq, sadəcə olaraq, biznes mühitini yaxşılaşdırmaq, yeni iş yerləri yaratmaq üçün deyildir. Sahibkarlığın inkişafı, əslində, çox böyük islahat deməkdir. Bu islahat ölkə başçısı İlham Əliyevin fərman və sərəncamlarına əsasən Azərbaycanda uğurla aparılır. Nazirlər Kabinetinin 2011-ci ilin birinci rübünün sosial-iqtisadi inkişafının yekunlarına həsr olunmuş iclasında deyildiyi kimi, islahatlar və güzəştli kreditlər hesabına regionlarda yeni texnologiyaların tətbiqinə əsaslanan tutumu 29,5 min ton olan 5 soyuducu anbar kompleksi, illik istehsal gücü 78,1 min ton olan 5 çörək istehsalı müəssisəsi, illik istehsal gücü 13 milyon yumurta, eləcə də illik istehsal gücü 6 min ton olan 3 quşçuluq (broyler) təsərrüfatı, illik istehsal gücü 19,8 min ton olan 2 ət kəsimi fabriki, 500 başlıq cins iribuynuzlu heyvandarlıq kompleksi və digər müəssisələr yaradılmış və ya yenidən qurulmuşdur. Çoxşaxəli islahatlar modelinə əsasən həyata keçirilən yeni tədbirlər ölkə iqtisadiyyatının liberallaşmasına, özəl sektorun daha da güclənməsinə gətirib çıxaracaq, insanlar daha yaxşı yaşayacaq, onların sosial-rifah halı yüksələcək, yeni iş yerləri və yerli sənaye obyektləri yaranacaqdır. Artıq bunun ilkin variantları yaradılaraq inkişaf etdirilir. Təsadüfi deyildir ki, bu gün Azərbaycan iqtisadiyyatının 80 faizdən çoxu özəl sektorda cəmləşib. Dünya standartlarına cavab verən, beynəlxalq sertifikatlara layiq görülmüş fabriklər, zavodlar fəaliyyətdədir.

"Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrasının ikinci ilinin yekunlarına həsr olunmuş konfransda ölkə rəhbəri onu da qeyd etmişdir ki, sahibkarlığın inkişafı üçün vacib olan şərtlərdən biri də Azərbaycanda korrupsiya və rüşvətxorluğa qarşı mübarizəni gücləndirməkdir: "Bu barədə mən öz sözümü ilin əvvəlində Nazirlər Kabinetinin iclasında demişəm, müvafiq göstərişlər verilibdir. İndi deyə bilərəm ki, ölkəmizin bütün yerlərində bu məsələ ilə bağlı ciddi proseslər gedir. Biz ilkin müsbət nəticələri görürük və elə etməliyik ki, bu nəticələr daha da gözəgörünən, daha da təsirli olsun".

Dövlət başçısı onu da bildirib ki, bu proses birillik, ya ikiillik proses deyil və bu, kampaniya xarakteri daşımır, bizim şüurlu seçimimizdir. "Korrupsiya və rüşvətxorluq böyük bəladır, böyük yaradır və bizim üçün böyük ləkədir. Elə etməliyik ki, bütün sahələrdə şəffaflıq təmin edilsin. Burada, əlbəttə ki, inzibati tədbirlər görülür və görüləcəkdir. Cəza tədbirləri görülür və görüləcəkdir. Eyni zamanda, biz struktur islahatlarını elə aparmalıyıq ki, korrupsiya, rüşvətxorluq tamamilə aradan götürülsün. Son günlər mənim tərəfimdən hazırlanmış sərəncamlar bu məqsədi güdür. Yəni, biz struktur islahatlarından, müəyyən metodlardan korrupsiyaya və rüşvətxorluğa qarşı mübarizəni gücləndirmək üçün istifadə etməliyik. Ancaq əlbəttə ki, təkcə struktur islahatları aparmaqla biz istədiyimiz nəticəyə nail ola bilməyəcəyik. Ona görə bütün dövlət qurumları, bütün dövlət şirkətləri, yerli icra orqanları, mərkəzi icra orqanları bilməlidir ki, hər bir məmur işində elə işləməlidir ki, həmişə üzüağ olsun, alnıaçıq olsun".

Ölkədə ictimai sabitlik və bolluq yaratmaq, habelə əhalinin ərzaq məhsullarına tələbatını tam ödəmək üçün aqrar sektora dövlət qayğısının daha da artırılması məqsədilə fermer təsərrüfatlarına kreditlərin verilməsi, lizinq xidmətinin yaxşılaşdırılması, kənd təsərrüfatı texnikasının və aqrokimyəvi maddələrin alınması üçün "Aqrolizinq" Açıq Səhmdar Cəmiyyətinə 14 milyon manat, kənd təsərrüfatı istehsalçılarına kreditlərin verilməsi üçün respublika Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyinə 4,5 milyon manat vəsait yönəldilmişdir...

Məlumdur ki, bu gün Azərbaycanda güclü sahibkarlar sinfi formalaşıb. Kənd təsərrüfatının inkişafı üçün kompleks tədbirlər görülür, müasir texnika alınır, lizinqlər, aqroservislər yaradılır, subsidiyalar, güzəştli şərtlərlə gübrə və yanacaq verilir. Kənd təsərrüfatının, özəl sektorun, kiçik və orta sahibkarlığın inkişafına dövlət dəstəyi bundan sonra da gücləndiriləcəkdir. Dövlət də, insanlar da sahibkarlardan aparılan işlərin keyfiyyətli görülməsinə, istehsalın həcminin və keyfiyyətinin dünya standartlarına uyğun olmasına daha böyük ümidlər bəsləyir.

Rəhman SALMANLI

Azərbaycan .- 2011.- 25 avqust.- S.3.