Jurnalistlər arasında "De-institusionalizasiya" mövzusunda müsabiqə elan edilmişdir

Avqustun 27-də "İrəli" İctimai Birliyi və "Dünyaya Baxış" təşkilatı "De-institusionalizasiya ilə bağlı ictimai məlumatlılığın artırılması" layihəsi çərçivəsində elan olunmuş müsabiqə ilə bağlı seminar keçirmişlər.

AzərTAc xəbər verir ki, tədbir iştirakçılarına jurnalistlər arasında elan olunmuş müsabiqə ilə bağlı ətraflı məlumat verilmişdir. Eyni zamanda, iştirakçılar "Azərbaycan Respublikasında dövlət uşaq müəssisələrindən uşaqların ailələrə verilməsi (De-institusionalizasiya) və alternativ qayğı Dövlət Proqramı (2006-2015-ci illər)" çərçivəsində görülmüş işlər, proqramın həyata keçirilməsində qeyri-hökumət təşkilatlarının rolu barədə ətraflı məlumatlandırılmışlar.

Uşaqların rifahının yüksəldilməsi ilə bağlı məsələlərin Azərbaycan hökumətinin daim diqqət mərkəzində olduğunu söyləyən natiqlər vurğulamışlar ki, 1992-ci ildə ratifikasiya edilmiş Uşaq Hüquqları Konvensiyasından irəli gələn vəzifələri həyata keçirmək məqsədilə ölkədə uşaq hüquqları ilə bağlı müxtəlif qanunlar qəbul edilmişdir. Konvensiyadan irəli gələn tələblərə əsasən, dövlət uşaq müəssisələrindən uşaqların bioloji və digər alternativ ailələrə verilməsi, bu uşaqların hüquqlarının qorunması hər zaman diqqət mərkəzində olmalıdır.

Vurğulanmışdır ki, 10 illik dövrü əhatə edən Dövlət Proqramının məqsədi uşaq şəxsiyyətinin tam və ahəngdar inkişafı üçün onun ailə mühitində xoşbəxtlik, məhəbbət və anlaşma şəraitində böyüməsinin zəruriliyi nəzərə alınaraq dövlət uşaq müəssisələrindəki uşaqların ailələrə verilməsi və alternativ qayğının təşkili mexanizmlərinin yaradılması, səmərəli işləməsinin təmin edilməsidir.

Diqqətə çatdırılmışdır ki, Dövlət Proqramı qarşısında duran əsas vəzifələrdən biri də De-institusionalizasiya ilə bağlı əhalinin məlumatlandırılması və təbliğatın aparılmasıdır. Bu işlərin həyata keçirilməsində jurnalistlərin üzərinə böyük məsuliyyət düşür.

Bu məqsədlə də jurnalistlər arasında keçirilən "De-institusionalizasiya" mövzusuna həsr edilmiş müsabiqə böyük əhəmiyyət daşıyır.

Bildirilmişdir ki, müsabiqəyə təqdim olunacaq materiallar "De-institusionalizasiya nədir və nə üçün lazımdır?", "De-institusionalizasiya və alternativ qayğı sahəsində görülən işlər, mövcud problemlər və onların həll yolları", "Müəssisədə yaşayan uşaqların ailələrə verilməsi və alternativ qayğıya cəlb edilməsi" kimi məsələləri əhatə etməlidir.

Maraqlananlar 10 nominasiya üzrə keçirilən müsabiqə ilə bağlı geniş məlumatı www.ireli.az saytının elanlar bölməsindən əldə edə bilərlər.

Azərbaycan.- 2011.- 28 avqust.- S. 7.