Azərbaycanın Qarsdakı baş konsulluğu Ramazan bayramı münasibətilə şəhid ailələri və yoxsullara yardım etmişdir

Azərbaycanın Qarsdakı baş konsulluğu müqəddəs Ramazan bayramı ərəfəsində bu vilayətdəki şəhid ailələri və yoxsullara 306 qutu ərzaq yardımı göstərmişdir.

Baş konsulluğumuzun əməkdaşları yardım paketlərini Qars Sosial Xidmətlər İdarəsinə təhvil vermişlər. Şəhid ailələri və yardıma ehtiyacı olanların siyahısı isə Qars valisi Əhməd Qaranın nəzarəti altında tərtib olunmuş və diplomatik nümayəndəliyimizə təqdim edilmişdir.

Qars əhalisinə bayram təbriklərini çatdıran baş konsul Ayxan Süleymanov bildirmişdir ki, bu yardım Azərbaycan xalqının qardaş türk xalqına müqəddəs Ramazan bayramı töhfəsidir. Qars vilayətində diplomatik nümayəndəliyimizin fəaliyyətə başladığı gündən bu yardımlar göstərilir. Biz bayram yardımını Şəhid Ailələri və Qazilər Dərnəyinə də təqdim etmişik.

Qars Sosial Xidmətlər İdarəsinin müdiri Akın Oktay və Şəhid Ailələri və Qazilər Dərnəyinin sədri Muhsin Ağçay baş konsula təşəkkürlərini bildirmiş, dost və qardaş Azərbaycan xalqının yardımlarının ünvanlarına çatdırıldığını söyləmişlər.

Oqtay BAYRAMOV,

AzərTAc-ın xüsusi müxbiri

Azərbaycan.- 2011.- 28 avqust.- S. 7.