Əlillərin və şəhid ailələrinin mənzil şəraitinin yaxşılaşdırılması diqqət mərkəzindədir

Vətəndaşların sosial təminat məsələləri Azərbaycanda dövlət siyasətinin başlıca istiqamətlərindən biridir. Elə buna görə də artıq necə illərdir geniş miqyasda həyata keçirilən sosial müdafiə tədbirləri hətta dünya iqtisadiyyatının böhranlı günlərində də davam etdirildi. Aztəminatlı əhaliyə ünvanlı sosial yardımların verilməsindən tutmuş, əlillərin, müharibə veteranlarının, qaçqın və məcburi köçkünlərin həyat şəraitinin yaxşılaşdırılmasına, yoxsulluğun azaldılmasına qədər bütün sosial müdafiə tədbirləri uğurla həyata keçirildi.

Başa çatmaqda olan 2011-ci il iqtisadi sahədə artımla yanaşı, sosial sferada qazanılan uğurlarla əlamətdardır. Həyata keçirilən inkişaf strategiyası sosial problemlərin aradan qaldırılmasına xidmət edən kompleks tədbirlərin işlənib hazırlanması və reallaşması ilə paralellik təşkil edir. Dərindən düşünülmüş sosial siyasət nəticəsində bu il də əhalinin rifahının yüksəldilməsinə, xüsusən aztəminatlı vətəndaşların sosial müdafiəsinin gücləndirilməsinə xidmət edən çoxsaylı tədbirlər həyata keçirilib. Bu mənada Azərbaycanda 2011-ci ilin reallıqları həm də ondan ibarətdir ki, davamlı inkişaf dövlətin sosial siyasətinin yüksək səviyyədə həyata keçirilməsini təmin edib. Nazirlər Kabinetinin 2011-ci ilin 9 ayının sosial-iqtisadi inkişafının yekunlarına həsr olunmuş iclasında Prezident İlham Əliyev bu barədə deyib: "2011-ci ildə sosial sahədə də çox yaddaqalan hadisələr baş vermişdir. Bu hadisələr, bu addımlar bir də onu göstərir ki, siyasətimiz sosialyönümlüdür. Biz bazar iqtisadiyyatı prinsiplərinə sadiqik və sadiq qalacağıq. Ancaq biz bununla bərabər, aztəminatlı təbəqəni sosial cəhətdən daha da yaxşı müdafiə etmək üçün konkret addımlar atırıq. Bu addımlar sadəcə olaraq, proqramların qəbulu, hansısa bəyanatların verilməsi ilə məhdudlaşmır, bu proqramlar konkret xarakter daşıyır".

Ölkəmizin sosial inkişaf strategiyasına əsasən pensiyaların baza hissəsinin mütəmadi olaraq artırılması qarşıya qoyulan əsas vəzifələrdir. Sosial siyasətin əsas tərəflərindən biri məhz budur. Bu il vətəndaşların sosial müdafiəsinin daha da yaxşılaşdırılması sahəsində ən yaddaqalan tədbirlərdən biri məhz pensiyaların artımıdır. Bu il pensiya təyinatında tətbiq olunan yeni qaydalar əsasında 2006-cı ilə qədər qazanılmış bütün pensiya hüquqları yenidən hesablanıb və təxminən 845 min nəfərin pensiyası təqribən 40 faiz artırılıb. Bununla yanaşı, elmi dərəcəsi olan əmək pensiyaçılarının da sosial müdafiəsi möhkəmləndirilib. Elmi dərəcəsi olan, işləməyən və azı 25 il elmi-pedaqoji fəaliyyəti olan əmək pensiyaçılarının pensiyasının baza hissəsinin üzərinə elmlər doktoru elmi dərəcəsinə görə 200 manat, fəlsəfə doktoru elmi dərəcəsinə görə 120 manat məbləğində əlavə hesablanır.

2011-ci il ərzində ünvanlı sosial yardımların verilməsi də uğurla davam etdirilib. Hazırda ünvanlı sosial yardım proqramı 113 min ailəni əhatə edir. 500 mindən bir qədər artıq insan dövlətdən hər ay vəsait alır. Orta hesabla hər bir ailə 102 manat, təqribən haradasa 130 dollar səviyyəsində dövlətdən bu yardımı alır.

Əhalinin sosial müdafiəsinin gücləndirilməsinə dövlət qayğısını əks etdirən göstəricilərə nəzər salarkən diqqəti çəkən əsas məqamlardan biri də sosial müdafiəyə ehtiyacı olan şəxslərin maddi durumunun yaxşılaşdırılmasına yönəldilən tədbirlərlə yanaşı, onların digər tələbatlarının ödənilməsi üçün dövlət büdcəsindən ayrılan vəsaitlərin miqdarının ildən-ilə artırılmasıdır. Bunun nəticəsidir ki, son illərdə qaçqın və məcburi köçkünlər, müharibə əlilləri, şəhid ailələri üçün yaşayış evlərinin tikintisi sürətlənib. Görülən tədbirlər nəticəsində 2000-2010-cu illər ərzində ölkənin ayrı-ayrı şəhər və rayonlarında qaçqın və məcburi köçkün ailələri üçün 67 yeni qəsəbə salınıb. Qəsəbələrdə 20 min mənzil, 100 minlərlə kilometr su, elektrik, qaz xətti, yollar çəkilib. Vaxtilə çadırlarda yaşamış insanlar rahat fərdi evlərlə, mənzillərlə təmin ediliblər. Hazırkı mərhələdə yataqxanalarda, hərbi hissələrdə, məktəblərdə məskunlaşmış məcburi köçkünlərin mənzil problemini həll etmək üçün Bakıda və regionlarda yaşayış binaları inşa olunur.

Azərbaycan Respublikasının ərazi bütövlüyü uğrunda döyüşlərdə fiziki sağlamlıqlarını itirərək əlil olmuş vətəndaşların və şəhid ailələrinin mənzil-məişət şəraitinin yaxşılaşdırılması daim ölkə rəhbərinin diqqətindədir. Bu kateqoriyalardan olan vətəndaşlar üçün 2008-ci ildə 396 mənzil istifadəyə verilmişdirsə, 2009-cu ildə 707 mənzilin tikintisi başa çatdırılıb. Hazırda bu təbəqələrdən olan insanlar üçün ildə 700-dən artıq mənzil inşa olunur.

"Bu siyasət Azərbaycanda uzun illərdir ki, aparılır. Qarabağ əlilləri, şəhid ailələri üçün həm Bakıda, həm müxtəlif bölgələrdə binalar tikilir. Bu proses çox geniş vüsət almışdır və ümid edirəm ki, növbəti bir neçə il ərzində bütün problemlər öz həllini tapacaqdır. Bu günə qədər 5 minə yaxın Qarabağ müharibəsi əlili və şəhid ailəsi gözəl mənzillərlə təmin edilmişdir. Növbədə isə 3 mindən bir qədər çox ailə vardır. Onların da problemləri həll olunacaqdır. İndi biz templəri də artırmışıq, dövlət vəsaitinin həcmi də artıbdır və təsadüfi deyil ki, il ərzində ölkəmizin müxtəlif şəhərlərində belə gözəl binalar tikilir". Bu fikirləri noyabrın 17-də Qəbələ rayonunda Qarabağ müharibəsi əlilləri və şəhid ailələri üçün tikilmiş 36 mənzilli binanın istifadəyə verilməsi mərasimində söyləyən Prezident İlham Əliyev Azərbaycanda bütün sahələrdə olduğu kimi, sosial sahədə də böyük işlərin görüldüyünü bildirib. Dövlət başçısı bir daha bəyan edib ki, pensiyalar və bütün sosial ödəmələr artacaq.

Noyabrın 29-da isə Ağcabədi və Yevlax rayonlarında hər biri 4 mərtəbəli 36 mənzilli olan müasir tələblərə uyğun iki yaşayış binası əlil və şəhid ailələrinə təqdim olunub. Mənzillərin təqdim olunması mərasimində iştirak edən əmək və əhalinin sosial müdafiəsi naziri Fizuli Ələkbərov əlil və şəhid ailələrinin yeni mənzillərlə təminatı işlərinə ulu öndər Heydər Əliyev tərəfindən başlanıldığını və Azərbaycan Prezidenti İlham Əliyevin xüsusi diqqət və qayğısı sayəsində bu sahədə işlərin ilbəil yüksələn templə davam etdirildiyini vurğulayıb.

Bütövlükdə, 2011-ci ilin ötən dövründə də müxtəlif bölgələrdə yeni çoxmənzilli və fərdi yaşayış binaları istifadəyə verilmişdir. Bu ilin sonunadək Quba, Göygöl, Samux rayonlarında hər biri 4 mərtəbəli 36 mənzilli və müxtəlif bölgələrdə 10 ədəd fərdi ev bu təbəqələrdən olan insanların istifadəsinə veriləcək. 2012-ci ildə isə Suraxanı, Sabunçu rayonlarında və Gəncə şəhərində hər biri 9 mərtəbəli 81 mənzilli, Sumqayıt şəhərində 12 mərtəbəli 96 mənzilli yaşayış binalarının inşası başa çatacaq. Yaxın günlərdə isə Şəki və Şəmkir rayonlarında əlil və şəhid ailələri üçün hər biri 36 mənzilli, gözdən əlillər üçün Bakının Nərimanov rayonunda 12 mərtəbəli 132 mənzilli yaşayış binalarının tikintisinə başlanacaq.

Azərbaycan.- 2011.- 6 dekabr.- S.1.