Əhalinin sosial müdafiəsi gücləndirilir

Son illər Prezident İlham Əliyevin rəhbərliyi ilə respublikamızda sosial islahatlar genişlənir, əhalinin rifah halının yaxşılaşmasına diqqət artırılır. Bu mənada, minumum əməkhaqqının ardıcıl şəkildə artırılması intensiv xarakter daşımaqdadır.

Belə ki, 2004-2010-cu illər ərzində ümumi daxili məhsul (ÜDM) təxminən 3,2 dəfə, dövlət büdcəsinin gəlirləri 5 dəfə, orta aylıq əməkhaqqı 3,5 dəfə yüksəlmiş minimum əməkhaqqının artım tempi 6,5 dəfədən çox olmuşdur. Bunun nəticəsidir ki, ölkəmizdə vətəndaşların illik gəlirlərində hər il 15 faizə yaxın artım qeydə alınır.

Aztəminatlı ailələrin sosial müdafiəsinin gücləndirilməsi, onların mövcud problemlərinin aradan qaldırılması, bu sahədə dünya praktikasına söykənən islahatların aparılması da xüsusi qeyd olunmalıdır. Bütün bunlar onu göstərir ki, Azərbaycan dövləti qarşıya qoyulan vəzifələri həyata keçirmək, əhalinin maddi-rifah halının yaxşılaşdırılması üçün güclü maliyyə imkanları ilə yanaşı, bu istiqamətdə islahatları daha da dərinləşdirmək gücünə malikdir.

Nəzərə alsaq ki, qarşıdakı illərdə Azərbaycanın iqtisadi inkişafı daha da sürətlənəcək, respublikamızın maliyyə imkanları yaxşılaşacaq və valyuta gəlirləri artacaqdır - bunun özlüyündə vətəndaşların rifah halının daha da yaxşılaşmasına gətirib çıxaracağı şəksizdir. Sosial infrastrukturun yüksək səviyyədə yenidən qurulması, yeni iş yerlərinin açılması, ünvanlı yardımların göstərilməsi də gələcəkdə böyük vüsət alacaqdır. Minimum əməkhaqqının artırılması qarşıdakı illərdə də davam etdiriləcəkdir.

İqtisadi İnkişaf Nazirliyinin məlumatlarına əsasən, ilin sonuna kimi orta aylıq əməkhaqqı 379 manat, 2012-ci ilin sonuna 431 manat, 2013-cü ilin sonuna 485 manat, 2014-cü ilin sonuna 551 manat səviyyəsinə çatacaqdır. 2011-ci ildə əhalinin real pul gəlirlərinin 6,5 faiz, 2012-ci ildə 10,2 faiz, 2013-cü ildə 8,5 faiz, 2014-cü ildə isə 8,3 faiz səviyyəsində olacaqdır. Bu artımı tezliklkə hər bir ailə gündəlik həyatında hiss edəcəkdir. Azərbaycanın dövlət siyasətinin əsas prioritetlərindən biri də məhz ölkədə sosial rifahlı cəmiyyət quruculuğuna nail olmaqdır.

Azərbaycan Prezidenti İlham Əliyevin dekabrın 1-də "Minimum aylıq əməkhaqqının artırılması haqqında" imzaladığı növbəti sərəncam da ölkə əhalisinin maddi güzəranının yaxşılaşdırılması, sosial müdafiəsinin gücləndirilməsi istiqamətində atılam mühüm bir addımdır. Bu sərəncama əsasən, 2011-ci il dekabrın 1-dən ölkədə minimum əməkhaqqının məbləği 93,5 manat müəyyən edilib.

Göründüyü kimi, son illər Azərbaycan dövlətinin imkanlarının getdikcə genişlənməsi sosial sferada bir sıra uğurlu addımların reallaşdırılmasına imkan yaradır. Bunun nəticəsi olaraq son illər yoxsulluq səviyyəsi 45 dəfə azalıb. Dövlət başçısının sərəncamı ilə minimum əməkhaqqı və pensiyaların artırılması da bu sahədə atılan daha mühüm bir addımdır.

Azərbaycan.- 2011.- 6 dekabr.- S.1.