Bakıda V Beynəlxalq Mstislav Rostropoviç

festivalının təntənəli açılış mərasimi keçirilmişdir

Dekabrın 4-də Heydər Əliyev Sarayında V Beynəlxalq Mstislav Rostropoviç festivalının təntənəli açılış mərasimi keçirilmişdir.

Heydər Əliyev Fondunun, Mədəniyyət və Turizm Nazirliyinin və Mstislav Rostropoviç Fondunun birgə təşkilatçılığı ilə keçirilən festivalın bədii rəhbəri Olqa Rostropoviçdir.

Festivalın açılış mərasimində Azərbaycan Respublikasının mədəniyyət və turizm naziri Əbülfəs Qarayev və festivalın bədii rəhbəri, Rostropoviç Fondunun prezidenti Olqa Rostropoviç çıxış etmişlər.

Əbülfəs Qarayev demişdir ki, festivalın əsas məqsədi M.Rostropoviçin vətənində dünyanın tanınmış incəsənət ustalarının çıxışlarını təşkil etməkdir.

Nazir bildirmişdir ki, Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın təşəbbüsü ilə bu beynəlxalq festival hər il dekabr ayında ölkəmizin paytaxtında əsl musiqi bayramı kimi təşkil edilir. Yeddi gün davam edəcək festivalda dünyanın məşhur musiqiçiləri və musiqi kollektivləri iştirak edəcəklər.

Rostropoviç Fondunun prezidenti Olqa Rostropoviç demişdir ki, Bakıda beynəlxalq musiqi festivallarının keçirilməsi atasının arzusu olmuşdur və o, 2006-cı ildə Dmitri Şostakoviçin 100 illiyinə həsr olunmuş festivalı təşkil etməklə bu gözəl ənənənin bünövrəsini qoymuşdur.

Mstislav Rostropoviç festivalı Bakıda 2007-ci ildən ən yaxşı teatr və konsert zallarında keçirilir və ənənəvi olaraq dünyanın müxtəlif ölkələrindən görkəmli ifaçıları öz ətrafında toplayır. Festivalın əsas konsepsiyası hər bir ifanın yüksək keyfiyyətidir.

Olqa Rostropoviç demişdir: "Mən Azərbaycan Prezidenti İlham Əliyevə və Heydər Əliyev Fondunun prezidenti Mehriban xanım Əliyevaya həmişə minnətdar olacağam. Çünki atamın xatirəsinə həsr olunmuş ilk festival məhz Bakıda keçirilmişdir".

Qeyd edilmişdir ki, Bakı festivalının daha bir ənənəsi böyük Mstislav Rostropoviçin davamçıları olan istedadlı gənclərin çıxışlarıdır.

Diqqətə çatdırılmışdır ki, festival Lourens Fosterin dirijorluğu ilə dünyanın ən yaxşı musiqi kollektivlərindən olan Paris Kamera Orkestri solistlərinin konserti ilə yekunlaşacaqdır.

Festivalın açılış mərasimində Flamand Operasının Simfonik Orkestrinin ifasında dünya klassiklərinin əsərlərindən parçalar səsləndirilmişdir. Orkestrin bədii rəhbəri və baş dirijoru Dmitri Yurovski, solisti isə Georq Niql (Avstriya) olmuşlar.

Konsert çox böyük maraqla qarşılanmışdır.

AzərTAc

Azərbaycan.- 2011.- 6 dekabr.- S.7.