Avropa Parlamentinin üzvləri Ağdam rayonunda olmuşlar

Avropa Parlamentinin üzvləri Dominik Rike və Filip Bulan Azərbaycana səfərləri çərçivəsində dekabrın 10-da Ağdam rayonunda olmuşlar.

AzərTAc xəbər verir ki, Ağdam Rayon İcra Hakimiyyətində Avropa Parlamentinin üzvləri ilə görüş keçirilmişdir. Rayon icra hakimiyyəti başçısının birinci müavini Zülfü Qasımov qonaqlara Ermənistanın Azərbaycana qarşı hərbi təcavüzü nəticəsində doğma yurd-yuvalarından didərgin düşmüş azərbaycanlıların problemləri barədə ətraflı məlumat vermişdir. Bildirilmişdir ki, Ermənistan silahlı qüvvələri tərəfindən 1993-cü ildə Ağdam rayonunun 73,4 faizi - Ağdam şəhəri, bir qəsəbə və 82 kənd işğal edilərək talan edilmişdir. Rayonun 180 min əhalisindən 155 mini məcburi köçkün kimi respublikamızın 62 rayonunda məskunlaşmışdır. Məcburi köçkünlərin ən böyük arzuları doğma yurd-yuvalarına qayıtmaqdır.

Qeyd olunmuşdur ki, Azərbaycan dövləti öz imkanları hesabına qaçqın və məcburi köçkünlərin həyat şəraitinin yaxşılaşdırılması istiqamətində genişmiqyaslı tədbirlər həyata keçirmişdir. Təkcə Ağdamda məcburi köçkünlər üçün 17 qəsəbə salınmışdır. Hazırda rayon ərazisində 90 min əhali yaşayır ki, onun 55 mini məcburi köçkündür.

Z.Qasımov BMT Təhlükəsizlik Şurasının Azərbaycanla bağlı qəbul etdiyi dörd qətnaməsinin hələ də kağız üzərində qalmasını xatırladaraq beynəlxalq təşkilatlardan ədalətin təmin olunmasını istəmişdir.

Səmimi qəbula görə təşəkkürünü bildirən qonaqlar ATƏT-in Minsk qrupunun indiyədək Ermənistan-Azərbaycan, Dağlıq Qarabağ münaqişəsinin həlli ilə bağlı heç bir iş görə bilməməsindən təəssüfləndiklərini bildirmişlər.

Avropa Parlamentinin üzvlərinə Ağdamın işğaldan əvvəlki və sonrakı görüntülərini əks etdirən "Qafqaz Xirosiması" filmi təqdim olunmuş, fotoalbom və filmin diski verilmişdir.

Sonra Avropa Parlamentinin üzvləri 2010-cu ilin noyabrında Quzanlı qəsəbəsi ərazisində məcburi köçkünlərin istifadəsinə verilmiş 689 mənzilli qəsəbədəki 18 nömrəli məktəbə gəlmişlər. Ağdam Rayon Təhsil Şöbəsinin müdiri Elmira Şükürova qeyd etmişdir ki, 480 şagirdin təhsil aldığı məktəbdə tədrisin yüksək səviyyədə təşkili üçün dövlət tərəfindən lazımi şərait yaradılmışdır.

Avropa Parlamentinin üzvləri jurnalistlərə müsahibəsində Dağlıq Qarabağ probleminin tezliklə ədalətli həllinin tərəfdarı olduqlarını bildirmişlər. Qeyd etmişlər ki, münaqişə, məcburi köçkünlərin problemləri haqqında Avropada az məlumatlıdırlar. Bizim də səfərimizin məqsədi məcburi köçkünlərin problemləri haqqında daha ətraflı məlumatlanmaqdır.

Azərbaycan.-2011.-11 dekabr.-S.8.