Müdafiə Nazirliyində

Bakıda səfərdə olan Amerika Birləşmiş Ştatları Silahlı Qüvvələrinin nəqliyyat komandanı Uilyam Freyzer dekabrın 12-də Azərbaycan Respublikasının müdafiə naziri general-polkovnik Səfər Əbiyevlə görüşmüşdür. Müdafiə Nazirliyinin mətbuat xidmətindən AzərTAc-a bildirmişlər ki, görüşdə regiondakı vəziyyət, ABŞ - Azərbaycan hərbi-siyasi əlaqələrinin mövcud durumu və inkişaf perspektivləri barədə müzakirələr aparılmışdır.

Antiterror əməliyyatları və Ermənistan - Azərbaycan, Dağlıq Qarabağ münaqişəsi də görüşün əsas müzakirə mövzularından olmuşdur.

Dekabrın 12-də Azərbaycan Respublikasının müdafiə naziri general-polkovnik Səfər Əbiyev ölkəmizdə səfərdə olan Türkiyə Silahlı Qüvvələrinin Baş Qərargahının baş plan və prinsiplər idarəsinin rəisi korpus generalı Mehmet Emin Alpmanla görüşmüşdür.

Müdafiə Nazirliyinin mətbuat xidmətindən AzərTAc-a bildirmişlər ki, görüşdə Türkiyə ilə Azərbaycan arasındakı hərbi əməkdaşlıq əlaqələrinin inkişaf perspektivləri, bölgədəki hərbi-siyasi vəziyyət ətrafında fikir mübadiləsi aparılmışdır.

Azərbaycan.-2011.-13 dekabr.-S.7.