Ulu öndərin tikib-qurduğu işıqlı şəhər

Neçə ildir ki, Heydər Əliyev cismən aramızda yoxdur. Amma onun adı dillərdə, məhəbbəti könüllərdədir. Müqəddəs arzuları, ideyaları həyatından artıq sevdiyi, həmişə azərbaycanlı olmağı ilə fəxr etdiyi doğma yurdun hər tərəfində reallığa çevrilir.

Ulu öndər Azərbaycanın bütün bölgələrini çox sevirdi. Özünün də etiraf etdiyi kimi, Mingəçevirə isə xüsusi münasibəti vardı. Bu, təsadüfi deyildi. Ölkənin əsas enerji təminatçısı olan Mingəçevirin inkişaf etməsində, tikilib-qurulmasında ulu öndərin misilsiz tarixi xidmətləri vardı. Nur şəhərinin qədirbilən sakinləri isə bu böyük insanın tarixi xidmətlərini həmişə ehtiramla xatırlayırlar. Həmsöhbətim Mingəçevir ziyalıları arasında böyük nüfuz sahibi olan, şəhərin ictimai-siyasi həyatının fəal iştirakçısı Mirzə Cavadovdur. Mirzə müəllim uzun illər Mingəçevir şəhər təhsil şöbəsinə rəhbərlik edib. Yeni Azərbaycan Partiyasının I, II, III, qurultaylarının, iştirakçısı olub, ulu öndər Heydər Əliyevin Mingəçevirə səfərləri zamanı dəfələrlə onunla görüşüb. Bu gün şəhər 2 saylı məktəbə rəhbərlik edən Mirzə müəllimdə Heydər Əliyevlə bağlı çoxlu maraqlı xatirələr var.

Mirzə Cavadov deyir: "1999-cu ilin 31 avqustu idi. Prezident sarayında ölkənin qabaqcıl təhsil işçiləri ilə unudulmaz rəhbər Heydər Əliyevin görüşü keçirilirdi. Bu unudulmaz görüşdə mən də iştirak edirdim. Görüşdə ulu öndərin dərin məzmunlu çıxışı nöqtə, vergülünə kimi yaddaşıma həkk olub. Heydər Əliyevin görüşdə iştirak edən müəllimlərə verdiyi dəyərli tövsiyələr hələ də qulağımdadır. Sevimli rəhbər bizə müraciətlə deyirdi ki, əziz müəllimlər, gənc nəslə, yeniyetmələrə birinci növbədə Azərbaycan tarixini, Azərbaycan ədəbiyyatını, Azərbaycan coğrafiyasını öyrədin. Bizim başımıza gətirilən bəlaların bir əsas səbəbi də odur ki, öz tariximizi yaxşı bilmirik. Öz tarixini yaxşı bilməyən xalq isə böyük uğurlara qadir ola bilməz".

Mirzə müəllim söhbətinə davam edib deyir ki, ulu öndərin dəyərli tövsiyələri bu gün də bizim fəaliyyətimizin əsas istiqamətidir. Bütün səy və bacarığımızı sərf edərək çalışırıq ki, elmli, vətənpərvər, xalqına, vətəninə sədaqətli gənclər tərbiyə edək.

Bu gün nur şəhərinin sakinləri çox böyük ehtiramla deyirlər ki, müasir Mingəçevir Heydər Əliyev qüdrətinin, fədakarlığının məntiqi nəticəsidir. Həmişə Mingəçevirə səfərdən böyük məmnunluq duyan Heydər Əliyev 1998-ci ilin 8 oktyabrında şəhər sakinləri ilə görüşdə demişdi: "Mingəçevirin tikilməsində, qurulmasında, inkişaf etməsində vaxtilə mən çox zəhmət çəkmişəm. İndi mən buraya gəlib bu hündür binaları, gözəl küçələri, gözəl yaşıllıqları görəndə sevinirəm. Çünki 30 il bundan öncə mən Azərbaycana rəhbərliyə başlayarkən biz Azərbaycanın hər yerində quruculuq işləri aparırdıq. Ancaq Mingəçevir gənc şəhər olduğuna görə, energetiklər şəhəri olduğuna görə buraya xüsusi fikir verirdik".

Bir zamanlar yüksəlişinə, tərəqqisinə ulu öndərin böyük önəm verdiyi Mingəçevir ötən illər ərzində tanınmaz olub. Xüsusilə son illər burada həyata keçirilən möhtəşəm abadlıq, quruculuq tədbirləri şəhəri başdan-başa dəyişdirib, daha gözəl, daha yaraşıqlı edib. Tikilməsində, qurulmasında Heydər Əliyevin böyük əməyi olan Mingəçevirin işıqlı bu günü Prezident İlham Əliyevin xüsusi qayğısı və diqqəti ilə sıx bağlıdır. Ana Kürün ikiyə böldüyü bu gənclik şəhərində indi görkəmli parkların sayı-hesabı yoxdur. Mingəçevirin gecələri başqa bir aləmdir. Elə bil lacivərd göylərdən ovuc-ovuc ulduz yağıb şəhərin üstünə. Al-əlvan işıqlar qaranlıq gecələri də parlaq gündüzə çevirir...

Mingəçevirdə ulu öndərin anım gününə ciddi hazırlıq görülüb. Keçirilən ümumşəhər iməcilikləri sayəsində hər yerdə səliqə-sahman yaradılıb. Şəhər icra hakimiyyətinin hazırladığı tədbirlər planında görüləcək bütün işlər öz dəqiq əksini tapıb. Ötən illərdə olduğu kimi, şəhər əhalisi xalqımızın ümummilli lideri Heydər Əliyevin əzəmətli abidəsini ziyarət edir, önünə qızıl güllər qoyur.

Lazım QULİYEV,

Azərbaycan.-2011.-14 dekabr.-S.5.