«New-York Times» azərbaycanlı diplomatın

etiraz məktubunu dərc etmişdir

"New-York Times" qəzeti dekabrın 16-da Azərbaycanın ABŞ-dakı səfirliyinin müşaviri Nəsimi Ağayevin ötən həftə qəzetdə Dağlıq Qarabağ bölgəsi ilə bağlı verilən qərəzli məqaləyə etiraz məktubunu dərc etmişdir. Azərbaycanlı diplomat məktubunda bildirmişdir ki, ölkəmizin Dağlıq Qarabağ bölgəsini "mübahisəli ərazi" və ya "respublika" adlandırmaq həqiqətə uyğun deyil. Beynəlxalq icma tərəfindən Azərbaycanın tərkib hissəsi kimi tanınan Dağlıq Qarabağ bölgəsini Ermənistan işğal etmişdir. Bu işğal faktı və zəbt edilmiş ərazilərdən 750 min nəfər Azərbaycan vətəndaşının zorla qovulması bütün dünyaya məlumdur və BMT Təhlükəsizlik Şurası tərəfindən pislənilmişdir.

Nəsimi Ağayev qəzetin qərəzli məqaləsində göstərilmiş işğal altında olan Dağlıq Qarabağ bölgəsində həyata keçirilən "uşaq doğumunun həvəsləndirilməsi proqramı"na da toxunaraq qeyd etmişdir ki, bu bölgədə doğulan uşaqların təhlükəsiz və firavan gələcəyinin təmin olunması bölgənin demoqrafiyasını süni şəkildə dəyişdirilməsindən deyil, Ermənistan-Azərbaycan, Dağlıq Qarabağ münaqişəsinin həllindən keçir.

Şəfəq AKİFQIZI,

AzərTAc-ın xüsusi müxbiri

Vaşinqton

Azərbaycan.-2011.-18 dekabr.-S.8.