Zaqatala Olimpiya İdman Kompleksində çempionlar yetişir

Dövlət qayğısı sayəsində ölkəmizdə idmanın kütləviliyi ilbəil artır. Bir zamanlar adlı-sanlı idmançılar əsasən paytaxt Bakını və digər iri şəhərləri təmsil edirdilərsə, indi istənilən bölgədə Azərbaycanın bayrağını beynəlxalq yarışlarda yüksəklərə qaldırmağı bacaran idmançılar yetişir. Şübhəsiz, bu məsələdə dövlət qayğısı, özəlliklə də Prezident İlham Əliyevin idmana yüksək diqqəti mühüm rol oynayır.

Regionların sosial-iqtisadi inkişafına dair dövlət proqramlarında idmanın inkişafı ilə bağlı nəzərdə tutulan tədbirlərin uğurlu icrası, rayonlarda müasir standartlara uyğun olimpiya idman komplekslərinin, stadionların tikilib istifadəyə verilməsi peşəkar idmançıların yetişməsinə, müxtəlif idman sahələri üzrə yüksək göstəricilərin qazanılmasına zəmin yaradır.

Ölkə idmanına tanınmış isimlər bəxş edən rayonlardan biri də Zaqataladır. Burada idmanın inkişafı üçün yüksək şərait yaradılıb. Rayondakı Olimpiya İdman Kompleksi hər cür təminatı ilə yeniyetmə və gənclərin, həmçinin bütün idman həvəskarlarının sevimli məkanına çevrilib.

Ölkə Prezidenti İlham Əliyev 2006-cı il aprelin 12-də Zaqatala rayonuna səfəri çərçivəsində kompleksin açılışında iştirak edib və stadionun tikintisinə baxış keçirib. 2008-ci ilin 18 sentyabrında isə dövlət başçısı stadionun açılışına xeyir-dua verib.

Direktor Arif Ramazanovdan aldığımız məlumata görə, stadionla birgə kompleksin 6 hektar ərazisi var. 3500 tamaşaçı tutumuna malik stadion beynəlxalq standartlara uyğun inşa edilib. Burada süni örtüklü əsas meydança və təbii örtüklü yardımçı meydança fəaliyyət göstərir. Zaqatalanın "Simurq" futbol klubu 2005-ci ildə yaradılıb. 2008-2009-cu illər mövsümündə klub ölkə çempionatını üçüncü yerdə bitirib və Avropa liqasında iştirak edib.

Stadiondan "Simurq"un əsas və əvəzedici heyətləri, 17 yaşlılar və aşağı yaş qrupları istifadə edir. Ümumilikdə burada 150-200 nəfər idmanla məşğul olur. Məşqçi Şaban Şirdanovun rəhbərliyi ilə qızlardan ibarət "Zaqatala" futbol komandası ölkə üzrə üçüncü yeri tutub. Bundan əlavə, Zaqatala qızları ölkə kubokunun finalına yüksələrək gümüş medala sahib olublar.

Burada AFFA-nın xətti ilə bölgələrdən yığmalara oyunçular hazırlamaq məqsədilə perspektivli uşaqlardan ibarət qruplar da məşq edir.

Kompleksdə ümumilikdə 500-ə yaxın gəncin məşğul olduğu üzgüçülük, sərbəst güləş, cüdo, boks, kyokuşin karate, futzal, basketbol, voleybol və digər bölmələr fəaliyyət göstərir. Trenajor zalı da həmişə "səs-küylü" olur. İki böyük tennis kortunda isə respublika əhəmiyyətli təlim-məşq toplanışları keçirilir. Bundan əlavə, boks, sərbəst güləş, basketbol, cüdo, voleybol üzrə milli komandaların da burada təlim-məşq toplanışları olur. Kompleksdə 3 il dalbadal respublika üzrə 300 iştirakçının qatıldığı şahmat olimpiadası keçirilib.

2009-cu ildə cüdo üzrə Fransa və Azərbaycan yığmalarının kompleksdə birgə təlim-məşq toplantısı keçirilib. Məşqlərə digər ölkələrdən də qatılanlar olub.

Onu da qeyd etmək lazımdır ki, kompleksin ərazisində ümumilikdə 85 nəfərlik tutumu olan 11 kottec idmançıların və məşqçilərin xidmətindədir.

Peşəkar idmançıların yetişməsi üçün respublikanın əməkdar məşqçisi Saleh Seyidəliyev (cüdo), məşqçi Elman Osiyev (cüdo), sərbəst güləş üzrə məşqçilər Mütəllib Məmmədov və Nurəddin Qasarayev bütün səy və bacarıqlarını sərf edirlər. Digər bölmələrin məşqçiləri də çalışırlar ki, yetirmələrinin sorağı zirvələrdən gəlsin.

Kompleksin direktoru Arif Ramazanov bildirir ki, cüdo idman növü Zaqatala üçün daha xarakterikdir. Cüdo üzrə yeniyetmələr və gənclər arasında Avropa və dünya mükafatçısı, Universiada qalibi Ramin Qurbanov, gənclər arasında Avropa birinciliyinin bürünc mükafatçısı Oruc Vəliyev, Avropa birinciliklərinin istirakçısı Dilqəm Əliyev və beynəlxalq turnirlərin qalibi və mükafatçısı, milli komandanın üzvü Orxan Hacıağalı və digərlərinin sorağı hər bir zaqatalalını sevindirir. Sərbəst güləşçilərdən Hacı Əlicanov və Gözəl Zutova da bir çox uğurlara imza atıblar. Hər ikisi milli komandanın üzvüdür. Gözəl Zutova bir çox beynəlxalq turnirlərin mükafatçısı olmaqla yanaşı, universal döyüş növü üzrə ikiqat dünya çempionudur.

T.NƏZƏRLİ,

Azərbaycan.-2011.-20 dekabr.-S.5.