İçərişəhərdə "Qədim şəhər gənc fotoqrafların gözü ilə" adlı fotosərgi açılmışdır

Fevralın 2-də İçərişəhərin ərazisində yerləşən Müasir İncəsənət Mərkəzində Gənclər Gününə həsr olunmuş "Qədim şəhər gənc fotoqrafların gözü ilə" adlı fotosərgi açılmışdır.

AzərTAc xəbər verir ki, sərginin açılış mərasimində İçərişəhər Dövlət Tarix-Memarlıq Qoruğu İdarəsi rəisinin müavini Samir Nuriyev çıxış edərək əlamətdar bayram münasibətilə gəncləri təbrik etmiş, bu günün ulu öndər Heydər Əliyevin Azərbaycan gəncliyinə dəyərli hədiyyəsi olduğunu diqqətə çatdırmışdır.

Təmsil etdiyi qurumun və Birləşmiş Rəssamlar Klubunun birgə təşkilatçılığı ilə keçirilən müsabiqənin məramı haqqında söz açan S.Quliyev bildirmişdir ki, əsas məqsəd gəncləri yaradıcılıq işlərinə həvəsləndirmək, onlarda zəngin mədəni irsimizin önəmli bir hissəsi olan İçərişəhərə marağın artırılmasıdır.

Sərgidə müsabiqəyə təqdim olunmuş 25 ən yaxşı iş nümayiş etdirilmişdir. Bu əsərlər münsiflər heyəti tərəfindən 200 işin arasından seçilmişdir.

Sonda 5 ən yaxşı fotoşəklin müəlliflərinə pul mükafatı və fəxri fərmanlar təqdim olunmuşdur.

Azərbaycan.- 2011.-3 fevral.- S. 5.