Ölkəmiz Avropa ideallarına sadiqliyini real addımlarla nümayiş etdirir

Fevralın 3-də Milli Məclisin Sədri Oqtay Əsədov Avropa Şurası Parlament Assambleyasının təşkilata üzv dövlətlər tərəfindən öhdəliklərin yerinə yetirilməsi üzrə Komitəsinin (Monitorinq Komitəsi) Azərbaycan üzrə həmməruzəçiləri Pedro Aqramunt Font de Moranı və Cozef Debono Qrexi qəbul etmişdir.

Qonaqları salamlayan Oqtay Əsədov qeyd etdi ki, ölkəmiz Avropa Şurası və onun Parlament Assambleyası ilə əməkdaşlığın inkişafına böyük önəm verir. Biz Azərbaycanda demokratik təsisatların inkişafında və demokratik proseslərin dərinləşməsində AŞ PA-nın rolunu əhəmiyyətli hesab edirik.

Söhbət zamanı Milli Məclisin Sədri Oqtay Əsədov bildirdi ki, bu il ölkəmiz Avropa Şurasına üzv olmasının 10 illiyini qeyd edir. Ötən dövrdə Azərbaycan Avropa ideallarına sadiqliyini real addımlarla nümayiş etdirmişdir. İndiyədək ölkəmiz Avropa Şurasının 49 sənədinə qoşulmuş və onları milli qanunvericilik sisteminə daxil etmişdir. Azərbaycan təşkilat qarşısında götürdüyü öhdəliklərə həmişə hörmətlə yanaşmış və onları sistemli şəkildə həyata keçirmişdir. Bu öhdəliklərin böyük əksəriyyəti artıq yerinə yetirilmişdir.

Oqtay Əsədov bildirdi ki, Azərbaycan gələcəkdə də təşkilatın müvafiq qurumları ilə əlaqələrini davam etdirmək niyyətindədir. İnanırıq ki, AŞ PA-nın Monitorinq Komitəsinin həmməruzəçilərinin ölkəmizə budəfəki səfəri Azərbaycan haqqında ədalətli və qərəzsiz fikrin formalaşmasına öz müsbət təsirini göstərəcəkdir.

Səmimi qəbul üçün minnətdarlığını bildirən Pedro Aqramunt Font de Mora nümayəndə heyətinin üzvləri barədə Milli Məclis Sədrinə məlumat verdi. Qeyd edildi ki, Azərbaycana səfərin məqsədi ölkədəki ictimai-siyasi vəziyyəti yerində öyrənmək, ölkəmiz haqqında obyektiv informasiya almaq üçün maraqlı tərəflərlə fikir mübadiləsi aparmaqdır.

Qonaq Azərbaycandakı inkişafı yüksək qiymətləndirərək təmsil etdiyi təşkilatın ölkəmizdə demokratik təsisatların daha da möhkəmlənməsi işinə dəstək vermək niyyətində olduğunu vurğuladı.

Görüşdə ölkəmizdə demokratik proseslərin daha da dərinləşməsi, Dağlıq Qarabağ münaqişəsinin ədalətli həlli və tərəfləri maraqlandıran digər məsələlər ətrafında geniş fikir mübadiləsi aparıldı, qonaqları maraqlandıran suallara cavablar verildi.

Qəbulda Milli Məclis Aparatının rəhbəri Səfa Mirzəyev, parlamentin AŞ PA-dakı nümayəndə heyətinin rəhbəri Səməd Seyidov iştirak edirdilər.

Azərbaycan.- 2011.- 4 fevral.- S. 1.