Azərbaycanla Avropa Şurası arasında sıx əməkdaşlıq mövcuddur

Fevralın 3-də Milli Məclisdə təmsil olunan bir sıra partiyalar və bitərəf deputatlarla Avropa Şurası Parlament Assambleyasının (AŞ PA) üzv dövlətlər tərəfindən öhdəliklərin yerinə yetirilməsi üzrə komitəsinin (Monitorinq Komitəsi) həmməruzəçiləri Pedro Aqramunt Font de Mora və Cozef Debono Qrex ilə görüş keçirildi. Həmməruzəçiləri Azərbaycan parlamentində görməkdən məmnunluq ifadə edən Milli Məclisin deputatı, Yeni Azərbaycan Partiyası (YAP) icra katibinin müavini Mübariz Qurbanlı ölkəmizlə Avropa Şurası arasında sıx əməkdaşlıq qurulduğunu bildirdi: "Cari ilin yanvarında Azərbaycanla Avropa Şurası arasında əməkdaşlığın 10 illiyi qeyd olundu. Bu məqsədlə Strasburqda keçirilən tədbirdə Azərbaycanın AŞ PA-dakı nümayəndə heyəti fəal iştirak etdi".

Daha sonra Mübariz Qurbanlı ötən il noyabrın 7-də keçirilən seçkilərdən sonra Milli Məclisin formalaşmış yeni tərkibi barədə məlumat verdi. Qeyd etdi ki, hazırda Milli Məclisdə 10-a qədər siyasi partiya təmsil olunur. Həmçinin Milli Məclisdə ayrıca qrup kimi bitərəf deputatlar fəaliyyət göstərir. Mübariz Qurbanlı Milli Məclisin tərkibində yer alan siyasi partiyaların hansı sayda deputatla qanunverici orqanda təmsil olunması barədə də həmməruzəçilərə məlumat verdi. Bildirdi ki, Milli Məclisin siyasi tərkibi Azərbaycanın siyasi palitrasını tam şəkildə özündə əks etdirir.

Görüş üçün təşəkkürünü bildirən Pedro Aqramunt Font de Mora Azərbaycanda siyasi, iqtisadi, sosial vəziyyət barədə fikirlərlə tanış olmaq üçün burada olduqlarını qeyd etdi. Həmməruzəçilər onları maraqlandıran məsələlər, o cümlədən Azərbaycanın Avropa Şurasına üzv olarkən üzərinə götürdüyü öhdəliklərin icrası ilə bağlı görüşdə iştirak edən deputatlara suallar ünvanladılar. Görüşdə tərəfləri maraqlandıran məsələlər ətrafında fikir mübadiləsi aparıldı.

* * *

Dünən AŞ PA-dakı Azərbaycan nümayəndə heyətinin üzvləri ilə də qurumun Monitorinq Komitəsinin həmməruzəçiləri Pedro Aqramunt Font de Mora və Cozef Debono Qrexin görüşü keçirildi. Qonaqları Azərbaycanda salamladığını bildirən AŞ PA-dakı Azərbaycan nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bir neçə gün əvvəl həmməruzəçilərlə Strasburqda keçirilən AŞ PA-nın qış sessiyası çərçivəsində bir arada olduqlarını xatırlatdı: "AŞ PA-nın qış sessiyası Azərbaycan üçün xüsusi əhəmiyyətli oldu. İlk növbədə ona görə ki, Azərbaycanın Avropa Şurasına üzv olmasının 10 illiyi qeyd olundu, 2005-ci ildə qəbul olunan 1416 saylı qətnaməyə müvafiq olaraq AŞ PA-da Dağlıq Qarabağ üzrə Alt komitənin fəaliyyəti bərpa olundu. Bundan başqa, ötən il noyabrın 7-də Azərbaycanda keçirilən parlament seçkilərinin də əks olunduğu məruzə dinlənildi".

Səməd Seyidov həmməruzəçilər tərəfindən Azərbaycan üzrə obyektiv, qərəzsiz məruzənin hazırlanaraq Avropa Şurasına çatdırılması üçün hər cür imkanlar olduğunu bildirdi. Bu işdə AŞ PA-dakı Azərbaycan nümayəndə heyətinin həmməruzəçilərə hər cür yardım göstərməyə hazır olduğunu qeyd etdi. Diqqətə çatdırdı ki, ölkəmizdə 7 noyabr parlament seçkilərindən sonra AŞ PA-dakı Azərbaycan nümayəndə heyətinin yeni tərkibi formalaşıb.

Pedro Aqramunt Font de Mora Azərbaycana səfərlərinin təşkili üçün AŞ PA-dakı Azərbaycan nümayəndə heyətinə təşəkkürünü bildirdi. Ölkəmizə gəlişlərindən məmnun olduqlarını diqqətə çatdırdı. Daha sonra görüşdə tərəfləri maraqlandıran digər məsələlər barədə fikir mübadiləsi aparıldı.

Azərbaycan.- 2011.- 4 fevral.- S. 2.