Azərbaycan ilə Latviya arasında hüquqi əməkdaşlıq genişlənir

Ədliyyə naziri, Məhkəmə-Hüquq Şurasının sədri Fikrət Məmmədov Azərbaycanda səfərdə olan Latviyanın ətraf mühitin mühafizəsi və regional inkişaf naziri Raymonds Veyonisin rəhbərlik etdiyi nümayəndə heyəti ilə görüşmüşdür.

Ədliyyə Nazirliyinin mətbuat xidmətindən AzərTAc-a bildirmişlər ki, görüşdə Azərbaycan ilə Latviya arasında dostluq münasibətlərinin və əməkdaşlığın dinamik inkişafı barədə fikir mübadiləsi aparılmışdır.

F.Məmmədov dövlətlərimizin başçılarının qarşılıqlı səfərlərinin əhəmiyyətindən, ölkələrimiz arasında geniş müqavilə hüquq bazasının mövcudluğundan, Azərbaycanda demokratik hüquqi dövlət quruculuğunda əldə olunmuş nailiyyətlərdən, yerli özünüidarənin inkişafı istiqamətində görülən işlərdən, bələdiyyə assosiasiyaları arasında səmərəli əlaqələrdən danışmışdır.

Latviyalı nazir oxşar tarixi olan ölkələrimiz arasında ikitərəfli əlaqələrin dərinləşməsi üçün geniş imkanların olduğunu vurğulamış, Latviya Bələdiyyələr İttifaqı ilə Azərbaycan Bələdiyyələrinin Milli Assosiasiyaları arasında əməkdaşlığı yüksək qiymətləndirmiş, rast gəlinən problemlərin həlli üzrə qarşılıqlı təcrübə mübadiləsinin əhəmiyyətini qeyd etmişdir.

Söhbət zamanı Ermənistanın işğalçı qüvvələrinin Azərbaycan torpaqlarının 20 faizini işğal etməsi, bir milyon soydaşımızın qaçqın və məcburi köçkün vəziyyətinə düşməsi faktları qonaqların diqqətinə çatdırılmışdır.

Görüşdə, həmçinin bələdiyyələrin fəaliyyətinə inzibati nəzarətin həyata keçirilməsi, bu işdə regional ədliyyə şöbələrinin rolu, ədliyyə və məhkəmə sahəsində islahatlar və qarşılıqlı maraq doğuran digər məsələlər ətrafında səmərəli fikir mübadiləsi aparılmış, əlaqələrin keyfiyyətcə yeni mərhələyə yüksəlməsi üçün təkliflər irəli sürülmüşdür.

Qonaqlar nazirlikdə Heydər Əliyev və Ədliyyə tarixi muzeyləri ilə tanış olmuşlar.

Azərbaycan.- 2011.-5 fevral.- S. 3 .