Katarijna Pisarska: "Polşa Azərbaycanı Avropanın ayrılmaz parçası hesab edir"

Ölkəmizdə səfərdə olan Polşanın Avropa Diplomatiya Akademiyasının direktoru, xanım Katarijna Pisarska Azərbaycan Respublikasının Prezidenti yanında Strateji Araşdırmalar Mərkəzində (SAM) olmuşdur.

SAM-dən AzərTAc-a bildirmişlər ki, elmi heyətlə görüşdə K.Pisarska rəhbərlik etdiyi Avropa Diplomatiya Akademiyasının fəaliyyəti, tədqiqat sahələri barədə geniş məlumat vermişdir. Qonaq ölkəmizə səfərinin əsas məqsədlərindən birinin Azərbaycanın "beyin mərkəzləri" ilə münasibətlərin yaradılması və əməkdaşlıq perspektivlərini müzakirə etməkdən ibarət olduğunu vurğulamışdır.

Ölkələrimiz arasında münasibətlərdən danışan K.Pisarska, rəsmi Varşavanın Azərbaycanı Avropanın ayrılmaz parçası hesab etdiyini bildirmişdir. O, 2011-ci ilin iyulunda Polşanın Avropa İttifaqına sədrliyi dövründə "Şərq tərəfdaşlığı" proqramı çərçivəsində Cənubi Qafqaz regionu, xüsusilə də, Azərbaycan ilə münasibətlərin inkişafının prioritet olacağını xüsusi vurğulamışdır.

Qonağa SAM-in fəaliyyəti, ölkəmizin iqtisadi inkişafı, həyata keçirilən demokratik quruculuq prosesləri, Ermənistan-Azərbaycan, Dağlıq Qarabağ münaqişəsinin nizamlanmasına dair Azərbaycanın mövqeyi barədə məlumat verilmişdir.

Görüşdə regional və beynəlxalq, eləcə də qarşılıqlı maraq doğuran məsələlər ətrafında geniş fikir mübadiləsi aparılmışdır.

Azərbaycan.- 2011.-5 fevral.- S. 4.