Azərbaycan-NATO Beynəlxalq Məktəbinin növbəti qış sessiyası başa çatmışdır

Azərbaycan Xarici İşlər Nazirliyi və NATO İctimai Diplomatiya İdarəsinin dəstəklədikləri Azərbaycan-NATO Beynəlxalq Məktəbinin (NİSA) növbəti qış sessiyası fevralın 6-da başa çatmışdır.

AzərTAc xəbər verir ki, yanvarın 31-dən başlamış sessiyada NATO-nun yeni strateji konsepsiyalarına tarixi yanaşma və onların qiymətləndirilməsi, NATO və tərəfdaşlıq münasibətləri müzakirə olunmuşdur.

Tədbirdə Azərbaycan dövlət və hökumət rəsmilərinin, Almaniyanın Avropa Beynəlxalq və Təhlükəsizlik Məsələləri üzrə Marşal Mərkəzinin, NATO-ya üzv və tərəfdaş ölkələrin, həmçinin alyansın müvafiq strukturlarının nümayəndələrinin məruzələri dinlənilmişdir.

Çıxışlarda Azərbaycan və NATO arasında əməkdaşlığın inkişafı, əlaqələrin dərinləşməsi baxımından tədbirin əhəmiyyəti yüksək qiymətləndirilmişdir.

Sessiyada dünyanın 20-dən çox ölkəsindən ekspertlər, Avropanın, ABŞ-ın nüfuzlu universitetlərinin nümayəndələri, diplomatlar, KİV nümayəndələri, yerli mütəxəssislər iştirak etmişlər.

Azərbaycan.- 2011.-8 fevral.- S. 1.