Litva Azərbaycanla əməkdaşlığın genişləndirilməsinin tərəfdarıdır

Fevralın 8-də Milli Məclisin Sədri Oqtay Əsədov ölkəmizdə səfərdə olan Litva Seyminin sədri İrena Dequtienenin başçılıq etdiyi nümayəndə heyəti ilə görüşmüşdür.

2009-cu ildə Litva Respublikasına səfərini xatırladan parlamentin sədri bu səfərlərin Azərbaycan-Litva əlaqələrinin bütün sahələrdə inkişafına mühüm töhfə verdiyini bildirmişdir. Son illərdə iki ölkə arasında əməkdaşlıq əlaqələrinin dinamik inkişafına dövlət başçılarının qarşılıqlı səfərləri, eyni zamanda beynəlxalq təşkilatlar çərçivəsində keçirdikləri yüksək səviyyəli görüşlərin müsbət təsir göstərdiyini xüsusilə qeyd etmişdir.

Parlamentin Sədri bildirmişdir ki, Azərbaycan və Litva arasında siyasi, iqtisadi sahələrdə əməkdaşlıq əlaqələrinin daha da genişləndirilməsi üçün böyük potensial var. Ölkələrimizin malik olduğu imkanlardan daha geniş istifadə edib, iqtisadi, ticarət əlaqələrini gücləndirməliyik. Bakıda keçiriləcək Azərbaycan-Litva biznes forumu iqtisadi sahədə əməkdaşlığın yüksək səviyyəyə qaldırılmasına kömək edəcəkdir.

"Azərbaycanda əlverişli investisiya mühiti var. Neft sektoru ilə yanaşı, qeyri-neft sektoruna da böyük həcmdə investisiyalar yatırmaq olar" - deyən parlamentin sədri litvalı iş adamlarının ölkəmizdə kənd təsərrüfatı, turizm sahələrinə sərmayə yatırmaları üçün bütün imkanların yaradıldığını bildirdi.

Milli Məclisn Sədri Oqtay Əsədov Azərbaycanın üzləşdiyi ağır problemə də diqqəti cəlb etdi. Sədr Ermənistan tərəfindən torpaqlarımızın 20 faizinin işğal edildiyini, nəticədə 1 milyondan artıq soydaşımızın öz doğma yurdlarından didərgin düşdüyünü nümayəndə heyətinin diqqətinə çatdırdı. Parlamentin Sədri əlavə etdi ki, təcavüzkar Ermənistan dövləti BMT Təhlükəsizlik Şurasının, Avropa Şurası Parlament Assambleyasının və digər beynəlxalq təşkilatların qəbul etdiyi qərarlara əhəmiyyət verməyərək torpaqlarımızı hələ də işğal altında saxlamaqdadır. Azərbaycan tərəfi Ermənistan-Azərbaycan, Dağlıq Qarabağ münaqişəsinin beynəlxalq hüquq normalarına uyğun, ölkəmizin ərazi bütövlüyü çərçivəsində həllini istəyir. Litva Respublikası da Dağlıq Qarabağ münaqişəsinin Azərbaycanın ərazi bütövlüyü çərçivəsində həllinə tərəfdardır. Sədr Litva tərəfinin ATƏT-ə sədrliyi müddətində bu münaqişənin sülh yolu ilə həlli istiqamətində mühüm irəliləyişin yaranmasına ümidvar olduğunu bildirdi.

Litva Seyminin sədri xanım İrena Dequtiene Azərbaycanda böyük inkişafın şahidi olduğunu bildirdi. O, iki ölkə arasında siyasi, iqtisadi, humanitar və digər sahələrdə əməkdaşlığın genişləndirilməsinin tərəfdarı olduğunu bildirdi. Bakıda keçiriləcək biznes forumun bu baxımdan mühüm əhəmiyyət kəsb edəcəyini qeyd etdi.

Litva Seyminin sədri Ermənistan-Azərbaycan, Dağlıq Qarabağ münaqişəsinin həllində ölkəsinin tutduğu mövqeyi bir daha ifadə etdi. Bildirdi ki, Litva Azərbaycanın ərazi bütövlüyünü dəstəkləyir. Litva Seyminin yaz sessiyasında Dağlıq Qarabağ münaqişəsi ilə bağlı qətnamə layihəsinin müzakirəyə çıxarılacağını da diqqətə çatdırdı.

Sonda tərəflər qarşılıqlı maraq doğuran digər məsələlər ətrafında da fikir mübadiləsi apardılar.

Azərbaycan.- 2011.- 9 fevral.- S. 1.