Litva Azərbaycanla bütün sahələrdə, o cümlədən enerji sahəsində əməkdaşlıqda maraqlıdır

Litva Azərbaycanla bütün sahələrdə, o cümlədən enerji sahəsində əməkdaşlıqda maraqlıdır. Bu fikir fevralın 10-da Azərbaycanın Sənaye və Energetika Nazirliyində (SEN) ölkəmizdə rəsmi səfərdə olan Litva Seyminin sədri xanım İrena Dequtienenin başçılıq etdiyi nümayəndə heyəti ilə keçirilmiş görüşdə səsləndirilmişdir.

SEN-in mətbuat xidmətindən AzərTAc-a bildirmişlər ki, görüşdə iki ölkə arasında qarşılıqlı maraq doğuran məsələlər geniş müzakirə olunmuşdur. Azərbaycanın qazandığı sosial-iqtisadi nailiyyətlər barədə qonaqlara ətraflı məlumat verən nazir Natiq Əliyev ölkədə həyata keçirilən enerji layihələri haqqında danışmışdır. Bildirilmişdir ki, Azərbaycan Odessa-Brodı-Plotsk-Qdansk neft boru kəmərinin reallaşdırılmasında maraqlıdır. Layihənin həyata keçirilməsi Baltikyanı ölkələrin enerji təhlükəsizliyində mühüm rol oynayacaqdır. Litva Seyminin sədri xanım İrena Dequtiene ölkəsinin Azərbaycanla bütün sahələrdə, o cümlədən enerji sahəsində əməkdaşlıqda maraqlı olduğunu bildirmiş, Odessa-Brodı-Plotsk-Qdansk layihəsinin əhəmiyyətini vurğulamışdır.

Azərbaycan.- 2011.-11 fevral.- S. 5.