Astanada keçirilən "Nur Otan" partiyasının qurultayında Azərbaycan Milli Məclisinin deputatları iştirak etmişlər

Astanada hakim "Nur Otan" partiyasının 13-cü qurultayı keçirilmişdir. Qurultayda partiyanın Siyasi Şurasının üzvləri, səfirliklərin və beynəlxalq təşkilatların nümayəndələri, politoloqlar, xarici ölkələrdən gəlmiş tanınmış ictimai-siyasi xadimlər iştirak etmişlər. Azərbaycanı bu siyasi tədbirdə Milli Məclisin deputatları Aydın Mirzəzadə və Mirkazım Kazımov təmsil etmişlər.

"Nur Otan" partiyası sədrinin birinci müavini Nurlan Niqmatulin hesabat məruzəsi dinlənilmişdir.

13-cü qurultaya gələn təbriklər səsləndirilmiş, "Yeni Azərbaycan" partiyasının sədri, Azərbaycan Prezidenti İlham Əliyevin təbriki oxunmuşdur.

Sonra partiyanın sədri Nursultan Nazarbayevin aprelin 3-də keçiriləcək prezident seçkilərində iştirak etmək üçün namizədliyi irəli sürülmüşdür.

Azərbaycandan qurultayda qonaq qismində iştirak edən "Yeni Azərbaycan" partiyasının nümayəndəsi, Milli Məclisin deputatı Aydın Mirzəzadə təmsil etdiyi partiyanın "Nur Otan" partiyası ilə əlaqələrindən danışmışdır. Onun sözlərinə görə, 2009-cu ildə "Nur Otan" partiyasının nümayəndələri Bakıda olarkən partiyalar arasında niyyət protokolu imzalanmış, əməkdaşlıq uğurla davam edir.

Günün ikinci yarısında Qazaxıstanın Mərkəzi Seçki Komissiyası Qazaxıstanın dövlət başçısı Nursultan Nazarbayevin prezidentliyə namizədliyini qeydə almışdır.

Xatırladırıq ki, "Nur Otan" partiyasının sıralarında Qazaxıstanda yaşayan soydaşlarımızın sayı 50 mindən artıqdır.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.- 2011.-13 fevral.- S. 2.