Dövlət Dəniz Administrasiyasının kollektivi öz fəaliyyətində beynəlxalq əməkdaşlığı prioritet hesab edir

Ölkəmizdə dəniz nəqliyyatı sahəsində vahid dövlət siyasətinin həyata keçirilməsi, korrupsiyaya şərait yaradan halların aşkarlanması və aradan qaldırılması, habelə dəniz nəqliyyatında baş vermiş və gözlənilən fövqəladə halların aradan qaldırılması istiqamətində ötən il bir sıra zəruri tədbirlər həyata keçirilmişdir. İlk növbədə administrasiyada yaradılan "qaynar xətt" rabitə əlaqəsini misal göstərmək olar. Qeyd edək ki, bu əlaqə həftənin yeddi günü bütün sutka ərzində aktivdir.

Dövlət Dəniz Administrasiyasının rəisi Qüdrət Qurbanov bildirir ki, 2010-cu ildə də əvvəlki dövrlərdə olduğu kimi, müvafiq beynəlxalq qurumlarla əməkdaşlığa üstünlük verilmişdir. Ötən il administrasiyanın əməkdaşları 11 beynəlxalq təlimdə, 20-dən çox müxtəlif xarakterli tədbirdə iştirak etmişlər. Qabaqcıl ölkələrin dəniz nəqliyyatı sahəsində təcrübəsinin öyrənilməsi, ikitərəfli və çoxtərəfli əməkdaşlıq istiqamətində atılan addımlar qurumun səmərəli fəaliyyətinə mühüm təsir göstərmişdir. Beynəlxalq Dəniz Təşkilatı, Beynəlxalq Əmək Təşkilatı, Avropa İttifaqının Avropa Dəniz Təhlükəsizliyi Agentliyi, Qara Dəniz İqtisadi Əməkdaşlıq Təşkilatı kimi beynəlxalq qurumlarla əlaqələr ölkə qanunvericiliyinin tələblərinə uyğun şəkildə həyata keçirilmişdir. Ötən ilin martında Dövlət Dəniz Administrasiyasının təşəbbüsü ilə ölkəmizin "Bunker yanacağı ilə çirklənmə nəticəsində vurulan zərərə görə mülki məsuliyyət haqqında" Beynəlxalq Konvensiyaya qoşulması ilə bağlı qanun qəbul olunmuşdur.

2010-cu ildə Dövlət Dəniz Administrasiyası bir sıra beynəlxalq layihələrdə uğurla iştirak etmişdir. Avropa Qonşuluq və Tərəfdaşlıq Alətinin Azərbaycan üzrə Fəaliyyət Proqramı çərçivəsində "Dəniz təhlükəsizliyi sahəsində beynəlxalq normaların Azərbaycan Respublikasının qanunvericiliyinə tətbiqi" layihəsi administrasiya tərəfindən tvininq layihəsi olaraq İqtisadi İnkişaf Nazirliyinə təqdim olunmuşdur. Bu layihə avropalı ekspertlərlə birlikdə təhlil edilmiş və Avropa Komissiyası tərəfindən maliyyələşdirilməsi üçün bu quruma müraciət olunmuşdur. Suriya Gəmiçilik Palatası ilə Əməkdaşlığa dair Anlaşma Memorandumunun, İordaniya Haşimilər Krallığı hökuməti ilə ticarət gəmiçiliyi haqqında sazişin, Azərbaycan hökuməti və Qazaxıstan Respublikası hökuməti arasında ticarət gəmiçiliyi sahəsində sazişin, habelə Azərbaycanla Rusiya Federasiyası arasında dəniz nəqliyyatı sahəsində əməkdaşlıq haqqında sazişin layihələri son variant kimi hazırlanaraq Nazirlər Kabinetinə təqdim edilmişdir. Azərbaycanla Yunanıstan arasında dəniz nəqliyyatına dair sazişin layihəsi də qarşı tərəfə göndərilmək üçün Xarici İşlər Nazirliyinə verilmişdir.

Ötən il Dövlət Dəniz Administrasiyası tərəfindən qanunvericiliklə təmin edilmiş qaydada Azərbaycan bayrağı altında üzən gəmilərin (kiçik həcmli gəmilər istisna olmaqla) dövlət qeydiyyatı və dövlət reyestrinin aparılması, gəmi sənədlərinin verilməsi prosesi uğurla başa çatdırılmışdır. Administrasiya tərəfindən 119 gəmiyə Azərbaycan Respublikasının Dövlət Bayrağı altında üzmək hüququ haqqında, 93 gəmiyə mülkiyyət hüququ haqqında, 45 gəmiyə minimum heyət tərkibi haqqında, 146 gəmiyə neft və çirklənmədən vurulan zərərə görə mülki məsuliyyətin maliyyə təminatı haqqında şəhadətnamə, 120 gəmiyə əmniyyətli idarəetmə haqqında şəhadətnamə, 30 gəmiyə bunker yanacağı ilə çirklənmə nəticəsində vurulan zərərə görə mülki məsuliyyətlə bağlı sığorta və digər maliyyə təminatı haqqında sertifikat verilmiş, 127 gəmi tarixinin fasiləsiz qeydlər sənədi dəyişdirilmişdir. Bununla yanaşı, 6 müxtəlif təyinatlı gəmi, səyyar üzən qazma qurğuları Azərbaycan Respublikasının Dövlət Gəmi Reyestrində qeydiyyata alınmış və onlara müvafiq şəhadətnamələr verilmişdir. "Caspian Protector", "Caspian Power" və "Caspian Supporter" gəmiləri Berbout-çarter reyestrində qeydiyyata alınmışdır. Dəniz nəqliyyatı sahəsində fəaliyyət göstərən şirkətlərin ölkəmizin qoşulduğu beynəlxalq konvensiyaların tələblərinə uyğunluğunun yoxlanılması məqsədilə şirkətlərdə müvafiq yoxlamalar aparılmış, 24 şirkətə administrasiya tərəfindən "Tanınma haqqında Şəhadətnamə" verilmişdir.

2010-cu il ərzində Azərbaycan Dövlət Dəniz Gəmiçiliyinə məxsus "Ordubad", "Vaqif", "Qəhrəman Hüseynov", "Mühəndis Mustafa Əli", "General Mehmandarov", "Qəhrəman Həsənov" və "Koroğlu" gəmilərinin dok-üzmə müddətinin və "Qarabağ", "Zəngilan" gəmilərinin isə klass üzmə müddətinin artırılmasına icazə verilməsi barədə qərar qəbul edilmişdir. Ötən il ölkənin ərazi sularında dörd qəza hadisəsi baş vermişdir. Bunlar "Tuğcemre" yaxtasının batması, "Svetlomor-2" gəmisində yanğın hadisəsi, "İran Moyen" gəmisinin Bakı Beynəlxalq Dəniz Ticarət Limanının körpüsünə çırpılması və Rusiya Federasiyasının bayrağı altında üzən "Orien-5" gəmisində matrosun ölümü ilə bağlı hadisələrdir. Bu qəzaların hər biri qanunvericiliklə müəyyən olunmuş qaydada araşdırılmış, müvafiq tədbirlər görülmüşdür. Hesabat ili ərzində Azərbaycan bayrağı altında üzən gəmilərdə bir sıra istiqamətlər üzrə yoxlamalar aparılmış, gəmi heyətlərinin qanunvericilik əsasında fəaliyyəti təmin olunmuşdur.

Azərbaycan Dövlət Dəniz Administrasiyanın kollektivi 2011-ci ildə də öz fəaliyyətini ölkə qanunvericiliyinin tələbləri əsasında quracaq, Beynəlxalq Dəniz Təşkilatı və digər qurumlarla əməkdaşlığı daha da intensivləşdirəcəkdir.

Akif CABBARLI

Azərbaycan.- 2011.-16 fevral.- S. 5.