Azərbaycanın Birləşmiş Millətlər Təşkilatı yanında daimi nümayəndəsi BMT-nin Baş katibinə Ermənistan tərəfindən atəşkəs rejiminin pozulmasının davam etməsi barədə məlumat vermişdir

Azərbaycanın Birləşmiş Millətlər Təşkilatı yanında daimi nümayəndəsi Aqşin Mehdiyev 2010-cu ilin dekabr və 2011-ci ilin yanvar aylarında Ermənistan Respublikasının hərbi birləşmələri tərəfindən atəşkəs rejiminin pozulmasının davam etməsi ilə əlaqədar BMT-nin Baş katibi Pan Gi Munun ünvanına məktub göndərmişdir.

Məktubda qeyd edilir ki, bu müddətdə atəşkəs rejiminin Ermənistan hərbçiləri tərəfindən pozulması nəticəsində Azərbaycan Respublikasının Silahlı Qüvvələrinin iki hərbi qulluqçusu öldürülmüş, iki nəfər azərbaycanlı hərbi qulluqçu və bir nəfər dinc sakin ağır yaralanmışdır.

Azərbaycanlı diplomat vurğulayır ki, bu hadisələr fonunda Ermənistan Respublikasının yüksək vəzifəli şəxsləri barışmaz bəyanatlar verməkdə davam etmiş, bununla da münaqişənin danışıqlar yolu ilə tənzimlənməsinə nail olmaq imkanlarını açıq-aşkar və qərəzli şəkildə pozmuş, vəziyyətin daha da gərginləşməsinə çalışmışlar. Məsələn, Ermənistan prezidenti Serj Sarkisyan 2011-ci ilin yanvarın 17-də artıq adi hala çevrilmiş tarixin saxtalaşdırılması və faktların təhrif edilməsi ilə dolu bəyanatında birmənalı şəkildə eyham vurmuşdur ki, münaqişənin tənzimlənməsi prosesi barədə Yerevanın rəsmi mövqeyi hamılıqla qəbul edilmiş azadlıq, ədalət və sülh kimi prinsiplərdən inadla inkar edilməsinə əsaslanır (bax: Ermənistan prezidentinin rəsmi veb-saytı:

http://www.president.am/events/statements/end/?id=84).

Sarkisyan 2011-ci il 27 yanvar tarixli müsahibəsində bir daha təsdiq etmişdir ki, erməni tərəfi münaqişənin tənzimlənməsi prosesini yalnız Azərbaycanın silah gücünə ələ keçirilmiş və etnik təmizləmələr aparılan ərazilərinin ilhaq edilməsi üçün bir vasitə hesab edir. Başqa sözlə, Ermənistan heç bir real əsası olmayan bəyanatlar verməklə zəif maskalanmış bir məqsəd - Ermənistan tərəfindən qanunsuz işğala son qoyulmasının, Azərbaycanın suverenliyinin və ərazi bütövlüyünün bərpa edilməsinin zəruriliyi, Azərbaycan Respublikasının Dağlıq Qarabağ bölgəsində erməni və azərbaycanlı icmalarının dinc yanaşı yaşamasının təmin edilməsi bazasında tənzimləmə formuluna əsaslanan cari siyasi prosesi gözdən salmaq məqsədi güdür (bax: Ermənistan prezidentinin rəsmi veb-saytı:

http://www.president.am/events/ press/rus/?ib=60).

BMT-nin baş katibinə məlumat verilmişdir ki, Ermənistan prezidenti elə həmin tarixdə silahlı qüvvələr günü münasibətilə verdiyi digər bəyanatında yenidən açıq hədə-qorxu gəlmiş, Ermənistanın silahlı qüvvələrini və onların Azərbaycana qarşı yönəlmiş təcavüzü dövründə törətdiyi çirkin cinayətləri həyasızcasına tərifləmişdir. Qeyd etmək lazımdır ki, Ermənistan silahlı qüvvələrinin bu cür hərəkətləri bütün dünyada birmənalı şəkildə hərbi cinayətlərə və ya insanlıq əleyhinə cinayətlərə bərabər tutulan xüsusilə ağır əməllər kimi qiymətləndirildiyi bir vaxtda Ermənistan Respublikasının başçısı elə həmin əməlləri "onun xalqının və ölkəsinin müasir tarixdə" irəliləməsi üçün yol açmış "şanlı qələbələr" hesab edir. Eyni zamanda, beynəlxalq birlikdə bu müharibədə Ermənistanın rolu barəsində yanlış təsəvvür yaratmağa yönəlmiş rəsmi Yerevanın adi təbliğat üsullarından fərqli olaraq prezident Sarkisyan Azərbaycana qarşı qanunsuz şəkildə zor tətbiq edilməsinə görə özünün və öz silahlı qüvvələrinin birbaşa məsuliyyətini etiraf etmişdir. Bu əməllər Azərbaycan ərazisinin işğal edilməsində və təcavüz zamanı ən ciddi beynəlxalq cinayətlər törədilməsində ifadə olunmuşdur.

Məktubda qeyd edilir ki, Ermənistan Respublikasının rəhbərinin dediyi: "Biz onları qanları ilə cavab verməyə məcbur etdik, biz ən amansız müharibədə birləşərək onlara qalib gəldik" və "təbii ki, bizim silahlı qüvvələrin bugünkü imkanlarını Arsax uğrunda müharibədə bizim malik olduğumuz imkanlarla müqayisə etmək olmaz" kimi sözlər əsla şübhəyə yer qoymur ki, Ermənistan beynəlxalq hüququn indiyə qədər baş vermiş və indi də davam edən pozuntularına görə tam həcmdə beynəlxalq məsuliyyət daşıyır (bax: Ermənistan prezidentinin rəsmi veb-saytı:

http://www.president.am/events/statements/eng/?id=85).

Azərbaycanın daimi nümayəndəsi öz məktubunda vurğulayır: "Ermənistan Respublikasının təcavüzkar rolu, eləcə də Azərbaycanın Dağlıq Qarabağ regionunu və işğal edilmiş digər əraziləri üzərində hələ də davam edən qanunsuz nəzarətin miqyası beynəlxalq hüquqa görə dövlətin məsuliyyətinə səbəb olur". Sənəddə qeyd edilir ki, Ermənistan ilk növbədə özünün destruktiv ilhaq və etnik təmizləmə siyasətinə son qoymalı, sülh prosesini hörmətdən salmaq cəhdlərindən imtina etməli, Azərbaycan ərazilərinin işğalına son qoymalı, azərbaycanlı daxili köçkünlərin öz qanuni yurdlarına qayıtmaq kimi danılmaz hüququnun tanınmasını və gerçəkləşməsini təmin etməlidir.

AzərTAc

Azərbaycan.- 2011.-18 fevral.- S. 4.