Mərkəzi Seçki Komissiyasının tərkibi yenidən formalaşdı

Milli Məclisin iclasında

Fevralın 22-də spiker Oqtay Əsədovun sədrliyi ilə Milli Məclisin növbəti plenar iclası keçirildi. Gündəliyin müzakirəsinə keçməzdən əvvəl deputatlar bəzi məsələlərlə bağlı fikirlərini bildirdilər. Bir sıra dövlətlərin öz vətəndaşlarına Ermənistan tərəfindən Azərbaycanın işğal edilmiş torpaqlarına getməmələri barədə xəbərdarlıq etmələrini ölkəmizin xarici siyasətinin uğuru kimi dəyərləndirən deputat Zahid Oruc bunun Ermənistanda ciddi narahatlıqla qarşılandığını bildirdi.

Deputat Vahid Əhmədovun sözlərinə görə, ölkəmizdə həyata keçirilən antikorrupsiya tədbirləri öz bəhrəsini verməkdədir. O, antikorrupsiya ilə bağlı bəzi qanunlara əlavə və dəyişikliklər olunmasını təklif etdi.

Deputat Bəxtiyar Əliyev məcburi köçkünlərin məskunlaşdığı yerlərdən çıxarılması məsələsinə toxundu. Onun sözlərinə görə, son illərdə ölkəmizdə qaçqın və məcburi köçkünlərin sosial rifahının və yaşayış şəraitinin yaxşılaşdırılması istiqamətində böyük işlər görülüb. Amma son vaxtlarda məcburi köçkünlərin məskunlaşdıqları yerlərdən çıxarılması istiqamətində kütləvi məhkəmə proseslərinin başlanmasına toxunan Bəxtiyar Əliyevin fikrincə, sanki məcburi köçkünlərlə bağlı aparılan uğurlu siyasətə kölgə salmaq istəyənlər var. Məcburi köçkünlər 18 ildir məskunlaşdıqları yerlərdən çıxarılmalıdırsa, onda onlar başqa bir yaşayış yeri ilə təmin olunmalıdırlar. Deputat bu məsələnin müvafiq dövlət təşkilatları tərəfindən araşdırılmasını vacib saydı. Bəxtiyar Əliyevin digər təklifi regionların sosial-iqtisadi inkişafı ilə bağlı dövlət proqramında cəbhəyanı rayonlar üçün nəzərdə tutulan tədbirlərin tez həyata keçirilməsi ilə bağlı oldu.

Sonra gündəlikdəki məsələlərin müzakirəsi başladı. İlk olaraq Azərbaycan Respublikası Mərkəzi Seçki Komissiyasının üzvlərinin və əvəzedici üzvlərinin seçilməsi haqqında məsələ müzakirəyə təqdim olundu. Milli Məclisin Sədri Oqtay Əsədov bildirdi ki, MSK-nın 18 nəfərlik tərkibi 6 nəfər parlamentdə çoxluqda olan partiyanın, 6 nəfər azlıqda olan partiyaların, 6 nəfər isə bitərəf deputatların nümayəndələrindən formalaşdırılmalıdır.

Müzakirələr zamanı deputat Aydın Mirzəzadə MSK-nın bu formatda formalaşdırılmasının təcrübədə özünü doğrultduğunu bildirdi. Ötən 5 ildə MSK-nın öz səlahiyyətlərinin öhdəsindən layiqincə gəldiyini deyən Aydın Mirzəzadə yeni tərkibin də uğurla fəaliyyət göstərəcəyinə əminliyini ifadə etdi. O, Yeni Azərbaycan Partiyasının namizədliyini irəli sürdüyü şəxslərin MSK üzvü seçiləcəkləri təqdirdə layiqli fəaliyyət göstərəcəklərini, qarşılarında duran vəzifələri uğurla yerinə yetirəcəklərini bildirdi. Deputat Siyavuş Novruzov da MSK-nın indiki formatda formalaşdırılmasını məqbul saydı.

Müzakirələrin yekununda bu məsələ səsverməyə çıxarıldı və yekdilliklə qəbul olundu. Beləliklə, 6 nəfər Milli Məclisdə çoxluğu təşkil edən partiyanın - Yeni Azərbaycan Partiyasının, 6 nəfər Milli Məclisdə azlıqda olan partiyaların, 6 nəfər isə bitərəf deputatların nümayəndələri kimi MSK-nın üzvü seçildilər. Yeni Azərbaycan Partiyasını təmsil edən MSK üzvləri Məzahir Pənahov, Şaitdin Əliyev, Fuad Cavadov, Ramiz İbrahimov, Validə Kazımova və Qabil Orucovdur. Mikayıl Rəhimov, Almas Qəhrəmanlı, Akif Qurbanov, Tamam Cəfərova, Bəxşeyiş Əsgərov və Etibar Quliyev Milli Məclisdə azlıqda olan partiyaları, Natiq Məmmədov, Azər Tağıyev, Arifə Muxtarova, İlham Məmmədov, Nizami Nadirov və Tofiq Həsənov isə heç bir partiyaya mənsub olmayan müstəqil deputatları MSK-da təmsil edəcəklər.

Sonra iclasda Azərbaycan Respublikası Gömrük Məcəlləsinin layihəsi müzakirəyə çıxarıldı. Layihədə Azərbaycanda gömrük işinin hüquqi, iqtisadi və təşkilati əsasları, o cümlədən respublikamızın gömrük ərazisinə gətirilən, bu ərazidən aparılan, tranzit keçirilən mallara və nəqliyyat vasitələrinə tətbiq edilən ümumi qaydalar və prosedurlar, gömrük işi sahəsində hüquq və öhdəliklər müəyyən edilir.

Çıxış edən Milli Məclisin İqtisadi siyasət komitəsinin sədri Ziyad Səmədzadə bildirdi ki, gömrük sistemi hər bir ölkədə büdcənin formalaşmasında mühüm rol oynayan mənbələrdən biridir. Eyni zamanda, təkmil gömrük sistemi hər bir ölkənin milli, siyasi və iqtisadi təhlükəsizliyi üçün son dərəcə vacib amillərdən sayılır. Təsadüfi deyil ki, ulu öndər Heydər Əliyevin 1993-cü ildə hakimiyyətə qayıdışından sonra əsas diqqət yetirdiyi məsələlərdən biri ölkəmizdə təkmil gömrük sisteminin yaradılması olmuşdur. Azərbaycanın gömrük sistemi ən müasir maddi-texniki bazaya malikdir. Son illərdə ölkəmizin inkişafı və xarici əlaqələrin genişlənməsi nəticəsində gömrük rüsumları hesabına büdcəyə daxilolmalar əhəmiyyətli dərəcədə artmışdır.

Azərbaycanda Gömrük Məcəlləsi ilk dəfə 1997-ci ildə qəbul olunub. Bu sahədə ölkəmiz bir sıra konvensiyalara da qoşulub. Bu gün isə Azərbaycanın iqtisadi inkişafın yeni mərhələsinə qədəm qoyması gömrük qanunvericiliyinin təkmilləşdirilməsini tələb edir. Azərbaycan Prezidentinin qanunvericilik təşəbbüsü qaydasında Milli Məclisə təqdim etdiyi yeni Gömrük Məcəlləsinin layihəsi də ən müasir tələb və standartlara cavab verir. Yeni məcəllənin qəbulu həm də respublikamızın Ümumdünya Ticarət Təşkilatına (ÜTT) üzv olması istiqamətində mühüm addım olacaq.

Müzakirələr zamanı deputat Vahid Əhmədov bildirdi ki, ölkəmiz ÜTT-yə üzv olmağa hazırlaşır və bu istiqamətdə iqtisadi qanunvericiliyin müasir tələblərin səviyyəsinə çatdırılması mühüm əhəmiyyət kəsb edir. Yeni Gömrük Məcəlləsi layihəsinin müasir tələbləri özündə ehtiva etdiyini deyən deputat onun qəbulunun Azərbaycanın iqtisadi inkişafına yeni töhfə verəcəyini bildirdi.

Deputat Əli Məsimli də bildirdi ki, gömrük sistemi iqtisadi təhlükəsizliyin təmin olunmasında dövlətin əsas dayaqlarından biridir. Ona görə də respublikamızın müasir dünya standartlarına cavab verən Gömrük Məcəlləsinin olması çox vacibdir. Yeni Gömrük Məcəlləsi layihəsi xarici təcrübəni nəzərə almaqla hazırlanıb və onun qəbulu ölkəmizin ÜTT-yə üzv olması istiqamətində mühüm əhəmiyyət kəsb edir. Layihədə gömrük sistemi ilə bağlı bütün məqamlar kifayət qədər beynəlxalq tələblərə cavab verir və hazırda qüvvədə olan məcəllə ilə müqayisədə xeyli genişlənib.

Deputat Aydın Abbasov da layihəni təqdir etdi. O, xarici mütəxəssislərin iştirakı ilə hazırlanan layihənin Avropa standartlarına cavab verdiyini diqqətə çatdırdı.

Deputat Rafael Cəbrayılov yeni Gömrük Məcəlləsinin qəbulunun respublikamızın iqtisadi inkişafında mühüm rol oynayacağını qeyd etdi. Onun sözlərinə görə, yeni məcəllə gömrük sistemi sahəsində münasibətləri müasir standartlar səviyyəsində tənzimləyəcək.

Yeni Gömrük Məcəlləsinin hazırlanmasını təqdir edən deputat Aydın Mirzəzadə dedi ki, ölkəmiz iqtisadi sahədə keçid dövrünü artıq başa vurub. İqtisadi inkişafın yeni mərhələsində dövrün nəbzini tutan Gömrük Məcəlləsinə ehtiyac var. Yeni Gömrük Məcəlləsinin qəbulu həm də Azərbaycanın ÜTT-yə üzv olması üçün irəli atılan növbəti uğurlu addım olacaq.

Milli Məclis Sədrinin müavini Valeh Ələsgərov da layihə ilə bağlı fikirlərini bildirdi. Müzakirələrin yekununda Gömrük Məcəlləsinin layihəsi birinci oxunuşda qəbul edildi.

Qısa fasilədən sonra deputatlar İnzibati Xətalar Məcəlləsinə əlavə və dəyişikliklər edilməsi haqqında qanun layihəsini müzakirə etdilər.

Qanun layihəsi barədə parlamentin Hüquq siyasəti və dövlət quruculuğu komitəsinin sədri Əli Hüseynli məlumat verdi. Komitə sədrinin sözlərinə görə, qanuna edilən əlavə və dəyişikliklər avtomobil nəqliyyatı sahəsində mövcud olan bir sıra pozuntuların inzibati xətalar kimi ehtiva olunmasına və sanksiyaların müəyyən edilməsinə yönəlmişdir. Belə ki, qanunun müvafiq maddələrində avtomobil nəqliyyatı ilə sərnişin və baqaj daşınması qaydalarının pozulmasına görə cərimələr müəyyən edilmişdir. Avtomobil nəqliyyatı vasitəsi ilə yüklərin aparılması zamanı qaydalarda nəzərdə tutulmuş qalaq (tökülən) yüklərin, tikinti materiallarının, heyvanların və ya quşların, çörək və çörək-bulka məmulatlarının daşınması şərtlərinin pozulmasına görə qırx manatdan əlli manatadək cərimə müəyyən edilmişdir. Eyni zamanda, "taksi" tanınma nişanları, taksometr və ya sərnişin və baqaj daşınması qaydaları ilə müəyyən edilmiş digər məlumat göstəriciləri olmadan taksi minik avtomobili ilə sərnişin daşımalarının həyata keçirilməsinə görə də qeyd olunan miqdarda cərimə nəzərdə tutulmuşdur.

İriqabaritli və (və ya) ağır çəkili nəqliyyat vasitələrini ümumi istifadədə olan avtomobil yolları və yaşayış məntəqələrinin küçələri ilə xüsusi icazə olmadan və xüsusi icazənin tələbləri pozulmaqla müəyyən edilmiş hallarda müşayiət və ya mühafizə avtomobili olmadan hərəkət etməsinə görə fiziki şəxslər otuz manatdan əlli manatadək miqdarda, vəzifəli şəxslər yüz əlli manatdan iki yüz manatadək miqdarda, hüquqi şəxslər min beş yüz manatdan iki min manatadək miqdarda cərimə edilirlər. Komitə sədri əlavə etdi ki, bələdiyyələrin fəaliyyətinə inzibati nəzarəti həyata keçirən orqan tərəfindən araşdırmaların aparılmasına maneçilik törədilməsinə görə vəzifəli şəxslər otuz manatdan əlli manatadək miqdarda cərimə olunurlar.

Deputat Fazil Mustafa bildirdi ki, avtomobil yollarında ağırçəkili nəqliyyat vasitələrinin müəyyən edilməsi və cərimələnməsi məsələsi ciddi problem yaradacaq. O, fikrini davam etdirərək bildirdi ki, bunun üçün bütün yollarda yük maşınlarının çəkilməsi üçün xüsusi tərəzi quraşdırılmalıdır.

"Taksi minik avtomobilində, beynəlxalq marşrutlar üzrə hərəkət edən avtobusda baqaj yerlərinin sayına və kütləsinə dair tələblərin pozulmasına görə cərimənin müəyyən edilməsi düzgün deyil" - deyən deputat Qüdrət Həsənquliyev magistiral yollar tam olaraq xüsusi tərəzilərin quraşdırılmasından sonra prosesin həyata keçirilməsini vacib saydı.

Deputat Siyavuş Novruzov da iriqabaritli və ağır çəkili nəqliyyat vasitələrinin çəkiyə və yükün oxa düşən kütlə parametrlərinə dair tələbləri pozduqlarını bildirdi. Deputatın bildirdiyinə görə, günorta vaxtı qırx, əlli tonluq beton qarışdıran maşınlar digər nəqliyyat vasitələrinin hərəkətinə maneçilik törədirlər.

Deputat Kamilə Əliyevə təklif etdi ki, bələdiyyələrin fəaliyyətinə inzibati nəzarəti həyata keçirən orqan tərəfindən araşdırma aparılmasına maneçilik törədən vəzifəli şəxslər barəsində daha ciddi tədbirlər həyata keçirilməlidir.

Deputat Elton Məmmədov bildirdi ki, qanuna edilən əlavə və dəyişikliklər günün tələbidir. O, avtomobil nəqliyyatı ilə sərnişin və baqaj daşınması qaydalarının pozulmasına görə cərimələrin müəyyən edilməsini məqsədəuyğun saydı. Deputat əlavə etdi ki, ölkəyə daxil olan bütün iriqabaritli və ağır çəkili nəqliyyat vasitələri bu sahəyə aid olan müvafiq qurum tərəfindən xüsusi tərəzi vasitəsilə çəkilir. Bunun üçün narahatçılığa əsas yoxdur.

Komitə sədri Əli Hüseynli deputatlar tərəfindən səslənən təklif və iradlara münasibət bildirdikdən sonra qanun layihəsi səsə qoyuldu və qəbul edildi.

Sonra İqitsadi siyasət komitəsinin sədri Ziyad Səmədzadə "Aviasiya haqqında" qanuna nəzərdə tutulan əlavələri təqdim etdi. Bu qanun layihəsi də səs çoxluğu ilə qəbul edildi.

Komitə sədri Əli Hüseynli İnzibati Xətalar Məcəlləsinə nəzərdə tutulan əlavə barədə məlumat verdi və buna deputatlar müsbət münasibət bildirdilər.

Azərbaycan.- 2011.-23 fevral.- S. 2.