Beynəlxalq sərgidə nümayiş etdirilən Azərbaycan guşəsi böyük marağa səbəb olmuşdur

Fevralın 23-də Əl-Küveyt şəhərində beynəlxalq sərgi açılmışdır. Azərbaycanın Küveytdəki səfirliyindən AzərTAc-a bildirmişlər ki, sərgidə Azərbaycan, ABŞ, Böyük Britaniya, Fransa, Səudiyyə Ərəbistanı, Birləşmiş Ərəb Əmirlikləri, Qətər, Hindistan, Suriya və digər ölkələr iştirak edirlər.

Sərginin Azərbaycan guşəsində ölkəmizin müstəqilliyinin bərpasının 20-ci ildönümü və Prezident İlham Əliyevin 2011-ci ili "Turizm ili" elan etməsi ilə əlaqədar respublikamızın qədim tarixi, mədəniyyəti, təbiəti, adət-ənənələri, turizm potensialı, mətbəxi, sürətlə inkişaf edən iqtisadiyyatı, həyata keçirilən demokratik islahatlarla bağlı məlumatlar, fotoşəkillər, film, eləcə də sənətkarlarımızın əl işləri nümayiş etdirilir.

Beynəlxalq şərgidə nümayiş etdirilən Azərbaycan pavilyonunu gün ərzində 200-ə yaxın insan ziyarət etmişdir.

Azərbaycan pavilyonuna böyük maraq göstərən ziyarətçilər arasında Küveytin informasiya naziri Sabah Əl-Xalid Əl-Həməd Əl-Sabah, bu ölkədə səfərdə olan Böyük Britaniyanın sabiq Baş naziri, tanınmış icitimai-siyasi xadim Con Meycer və İraqın tanınmış hüquqşünası və ictimai xadimi Münir Əl-Həddad da olmuşlar.

Azərbaycanın Küveytdəki səfiri Tural Rzayev C.Meycerə ölkəmizin qədim tarixi haqqında məlumat vermişdir.

C.Meycer Azərbaycanın müstəqilliyinin bərpasının 20-ci ildönümü ilə əlaqədar xalqımızı təbrik etmiş, səmimi salamlarını Prezident İlham Əliyevə çatdırmağı xahiş etmişdir.

Sərgi üç gün davam edəcəkdir.

Azərbaycan.- 2011.-24 fevral.- S. 2.