Azərbaycan öz torpaqlarını istənilən an hərbi yolla azad etməyə qadirdir

Dövlət müstəqilliyinin bərpasının 20 illiyi və ordumuzun yaranmasının 93-cü ildönümü münasibətilə Azərbaycan Silahlı Qüvvələrinin iyunun 26-da keçirilən təntənəli paradı ölkəmizin hərbi qüdrətini növbəti dəfə nümayiş etdirdi. Ölkəmizin hərbi potensialının az bir qisminin nümayiş etdirilməsinə baxmayaraq, parad bütövlükdə Azərbaycan Silahlı Qüvvələrinin nəyə qadir olması ilə bağlı indiyə qədər deyilənlərə əyanilik gətirdi.

Milli Məclisin deputatı, Xankəndi ictimaiyyətinin təmsilçisi və şəhid ailəsi mənsubu

Flora Qasımova ilə söhbətimiz də bu mövzudadır.

- Flora xanım, paradda nümayiş etdirilən Azərbaycan Silahlı Qüvvələrinin güc və potensialı sizdə hansı təəssüratları yaratdı?

- Qəlbində vətənpərvərlik hissləri olan hər bir azərbaycanlı kimi Azərbaycanın iqtisadi baxımdan inkişafı və buna paralel olaraq ordumuzun güclənməsi məni də fərəhləndirir və qürurlandırır. Ölkəmizdə ayrı-ayrı qoşun növlərinin timsalında ordu quruculuğunun ən son nailiyyətləri, xüsusən modernləşmə istiqamətində görülən işlər məlumdur. 2008-ci ildə keçirilən hərbi paradda da ordumuzun potensial imkanlarının bir hissəsini görmüşdük. Bu parad isə göstərdi ki, son 3 ildə Azərbaycan ordusu sürətlə inkişaf edib, arsenalını ən modern silah və digər hərbi texnika ilə zənginləşdirib. Ən fərəhlisi odur ki, bu gün dünyanın hərbi baxımdan inkişaf etmiş dövlətlərinin malik olduqları strateji silahlar Azərbaycanda var.

Hərbi paradda Azərbaycan Silahlı Qüvvələrin bütün qoşun növlərinin, hərbi birlik və birləşmələrin, hərbi tədris müəssisələrinin 6 min nəfərlik şəxsi heyəti iştirak etdi, 400-dək hərbi texnika və silah sistemləri nümayiş olundu. Ən fərəhlisi odur ki, hərbi texnikanın arasında Azərbaycanda istehsal olunan və modernləşdirilən silahlar ötən dəfəki paradla müqayisədə üstünlük təşkil edirdi. Bu çox böyük nailiyyətdir və Azərbaycanda hərbi sənaye kompleksinin uğurlu inkişafından xəbər verir.

Bu möhtəşəm parad Azərbaycan Silahlı Qüvvələrinin güc və qüdrətinin nümayişi ilə yanaşı, həm də xalqımızın ümummilli lideri Heydər Əliyevin ideyalarına sədaqət və ehtiramının təntənəsi və gözəl nümunəsi idi. Çünki Azərbaycan Silahlı Qüvvələrinin qüdrətlənməsi və işğal olunmuş ərazilərimizi istənilən an azad etməyə qadir mükəmməl bir orduya çevrilməsi yönündə Prezident İlham Əliyev tərəfindən göstərilən yüksək əzmkarlıq Heydər Əliyev ideyalarının davam etdirilməsi deməkdir. Ermənistanın Dağlıq Qarabağ münaqişəsinin həlli prosesini uzatması və regiondakı mürəkkəb hərbi-siyasi vəziyyət Azərbaycan Respublikası üçün öz suverenliyini və ərazi bütövlüyünü qorumaq, işğal olunmuş əraziləri azad etmək məqsədilə Silahlı Qüvvələrin döyüş imkanlarını daha da artırmağı zəruri edir. Bu mənada, silahlı qüvvələrimizin qüdrətlənməsi, işğal olunmuş ərazilərimizi istənilən an azad etməyə qadir mükəmməl bir orduya çevrilməsi yönündə ölkə Prezidenti, Azərbaycan Silahlı Qüvvələrinin Ali Baş Komandanı İlham Əliyev tərəfindən göstərilən yüksək əzmkarlıq olduqca təqdirəlayiqdir. Bu mənada, ən böyük təəssüratım ondan ibarətdir ki, Azərbaycan öz torpaqlarını istənilən an hərbi yolla azad etməyə qadirdir.

Növbəti illərdə biz Azərbaycanda daha böyük iqtisadi inkişaf müqşahidə edəcəyik. İqtisadi inkişaf isə bütün sahələrin tərəqqisi üçün stimuldur. Azərbaycandakı kompleks inkişafın da əsasında iqtisadiyyatın güclənməsi dayanır. Prezident İlham Əliyevin həyata keçirdiyi siyasət məhz iqtisadi gücdən yararlanaraq digər sahələrin də inkişafına geniş imkanlar yaradır.

Azərbaycanda artıq hərbi xərclər 3 milyard 300 milyon dollar həcmindədir. Hərbi xərclər büdcədə birinci yeri tutur. Ərazisi işğal altında olan ölkə üçün bu, tam normaldır. Eyni zamanda, Azərbaycanda hərbi mütəxəssislərin yetişdirilməsi sahəsində vəziyyət çox yaxşıdır. Hərbi məktəblərimizdə hərbin istənilən sahəsi üzrə peşəkar kadrlar yetişdirilir. O cümlədən hərbçilərin sosial vəziyyəti ildən-ilə daha da yaxşılaşdırılır. Bu günlərdə Prezident İlham Əliyev tərəfindən hərbçilərin maaşlarının daha 25 faiz artırılması olduqca təqdirəlayiqdir. Azərbaycanın hərbi sənayesi isə ordumuzu istənilən praktik döyüş vəsaiti ilə təchiz etməyə qadirdir. Ən əsası isə, Azərbaycan ordusunun arsenalı döyüşdə həlledici rol oynayan müasir hərbi texnika sarıdan heç vaxt korluq çəkə bilməz. Bu mənada, ölkəmizin hərbi uğurları çox böyükdür və bütün bunları Ermənistan rəhbərliyi də bilməmiş deyil. Ona görə onların həyəcanını da başa düşmək olar. Çünki əgər hərbi əməliyyatlar başlasa, ermənilər hətta döyüşməyə əsgər də tapmayacaqlar.

- Siz də belə bir fikirlə razı olarsınız ki, qüdrətli, güclü Azərbaycan ordusu həm də şəhidlərimizin arzularının reallaşması deməkdir…

- Mənim gözümün qarşısına ağır və keşməkeşli 1991-1992-ci illər gəlir. Vaxtilə peşəkar hərbçi kimi SSRİ Daxili Qoşunlarının Bakıdakı hərbi hissəsində qulluq edən həyat yoldaşım, Azərbaycanın Milli Qəhrəmanı Şirin Mirzəyev ermənilərin Qarabağdakı əməllərini görür və onların vəhşiliklərini heç cür qəbul edə bilmirdi. Xidmət müddətinin başa çatmasına az qalmış tərxis olunmaq barədə raport yazdı, Ağdama yollanaraq özünümüdafiə taboruna komandirlik etməyə başladı. Sonra tabor alaya çevrildi, Şirinin rəhbərliyi ilə uğurlu döyüş əməliyyatları keçirildi. 1992-ci il iyunun 18-də döyüşlərin birində Şirin Mirzəyev qəhrəmancasına şəhid oldu. Ölümündən sonra Azərbaycanın Milli Qəhrəmanı adına layiq görüldü.

O zaman Şirin Mirzəyev kimi peşəkar hərbçilərə ehtiyac böyük idi. Şirin Mirzəyev taborun yaradılması üçün min bir əziyyətlərə qatlaşdı. Silah-sursat tapılmırdı, peşəkar zabitlər az idi. Yuxarıdan orduya diqqət yox idi. O zamanlar daha çox qeyri-peşəkarların yeni yaranan hərbi hissələrə rəhbərliyinin nəticəsi idi ki, ordu quruculuğu düzgün istiqamətdə aparılmadı. Şirin Mirzəyev kimi peşəkar hərbçilərin arzusu reallaşmadı.

Bu gün isə vəziyyət tamamilə dəyişib. Azərbaycanın vahid komandanlığa əsaslanan güclü ordusu formalaşıb. Bu ordu vaxtilə Şirin Mirzəyevin görmək istədiyi ordudur. Həyat yoldaşım aramızda olmasa da, onun arzusu olan güclü Azərbaycan ordusunun yaradılması bizə təsəlli verir. İnanırıq ki, bu ordu sülh danışıqları nəticəsiz qalacağı təqdirdə işğal altında olan torpaqlarımızı azad edəcək, şəhidlərimizin arzularını reallaşdıracaq. O zaman Prezident İlham Əliyevin qeyd etdiyi kimi, şəhidlərimizin qanı da yerdə qalmayacaq!

Müsahibəni apardı: Rəşad CƏFƏRLİ

Azərbaycan.- 2011.- 1 iyul.- S. 5.