Şairə dərin ehtiramla

Gəncənin əvəzsiz simvolu olan ulu Nizami Gəncəviyə meyil-məhəbbət getdikcə artır. Qədim şəhər aybaay-günbəgün nura boyanır. Nizaminin adı ilə bağlı hər küçə, hər bağ, hər məktəb, hər bir müəssisə yeni don geyir. Ən əsası budur ki, ölməz şairin məqbərə-kompleksinin ətrafı təzədən qurulur, bədii tərtibatlı istinad divarları çəkilir, yaşıllıq, gül-çiçək hər yanı bürüyür. Bakı səmtindən Gəncəyə giriş yolu boyunca geniş bir sahədə ulu şairin əsərlərindən ibarət fraqmentlər canlandırılır. Fəvvarələr, bulaqlar inşa edilib. Həmin yolun başında isə möhtəşəm giriş qapıları ucaldılacaqdır.

Milli Elmlər Akademiyasının illik ümumi yığıncağında Nizami mərkəzinin yaradılmasının vacibliyi barədə qaldırılan məsələ hamının qəlbindən xəbər verirdi. Prezident İlham Əliyev dedi ki, Nizami mərkəzinin yaradılması ilə əlaqədar səslənən təkliflər hesab edirəm ki, təqdirəlayiqdir. Heç kəsdə şübhə yoxdur ki, Nizami Gəncəvi dahi Azərbaycan şairidir. Bunu bütün dünya bilir.

Gəncəliləri daha çox sevindirən cəhət isə budur ki, belə bir mərkəzin məhz Nizami yurdunda yaradılması qərara alınıb. İndi bu müqəddəs ocaq üçün yer müəyyən edilir, layihə hazırlanır. Şəhərin ən mənzərəli guşəsində Nizami Gəncəvi adına Kitab Evi təşkil olunur.

Qarşıdan dahi şairin anadan olmasının 870 illik yubileyi gəlir. Bu möhtəşəm tədbirə hazırlıqla əlaqədar neçə vaxtdır ki, şəhər icra hakimiyyəti başçısının sərəncamı ilə yubiley komissiyası yaradılıb. Müxtəlif sahələr üzrə işçi qrupları təşkil olunub.

Yubiley komissiyası genişmiqyaslı fəaliyyətə başlayıb. Ali və orta təhsil müəssisələrində, elm və mədəniyyət ocaqlarında silsilə tədbirlər keçirilir. Ölməz söz ustadının ədəbi irsinin təbliği üçün geniş tədbirlər görülür. Nizami şeirlərinin ifası üzrə müsabiqələr, ədəbi-bədii gecələr keçirilir.

Hazırlıq tədbirlərinin ilk töhfəsi olaraq bu günlərdə şəhərin mərkəzi meydanında "Nizami Gəncəvinin söz buketi" adlı geniş sərgi oldu. Burada Nizaminin əsərləri, onun motivləri üzrə reproduksiyalar, miniatürlər, rəsmlərlə yanaşı, ən müxtəlif illərdə çap olunmuş kitablar, Nizami dövrünü əks etdirən müxtəlif məişət əşyaları, habelə Gəncədə çalışan nizamişünas alimlərin əsərləri nümayiş etdirildi.

Şəhər icra hakimiyyətinin başçısı Elmar Vəliyev sərgiyə gələnlər qarşısında çıxış edərək ölkə rəhbəri İlham Əliyevin ümumən qədim Gəncəyə, eləcə də ölməz söz ustası Nizami Gəncəviyə olan hörmət və ehtiramdan minnətdarlıqla danışdı. O dedi ki, Nizaminin adı bütün türk aləmi üçün əzizdir, ucadır. Gəncəlilər üçün isə daha doğma, daha yaxındır. Ona görə də hər bir gəncəli yubiley tədbirlərinə nəsə bir hədiyyə, layiqli töhfə verməyə çalışır. İndi sərgidə nümayiş etdirilən bu eksponatlar ucaldılacaq Nizami mərkəzinin muzeyini bəzəyəcəkdir.

Əhməd İSAYEV

Azərbaycan.- 2011.- 3 iyul.- S. 6.