Milli Məclisdə görüş

İyulun 8-də Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov ölkəmizdə səfərdə olan Asiya, Afrika və Okeaniyanın 11 ölkəsinin BMT yanında daimi nümayəndəliklərinin əməkdaşları ilə görüşmüşdür.

Qonaqlara ölkəmizin iqtisadi-siyasi müstəvidə əldə etdiyi nailiyyətlərdən ətraflı məlumat verilmişdir. Səməd Seyidov demişdir ki, Azərbaycan müstəqilliyini bərpa etdikdən sonra onun iştirakı ilə reallaşdırılan qlobal infrastruktur layihələr ölkəmizin iqtisadi qüdrətini təmin etməklə yanaşı, beynəlxalq aləmdə də mövqelərini möhkəmləndirmişdir. Bu gün Azərbaycanın iştirakı olmadan regionda hər hansı irimiqyaslı layihəni həyata keçirmək qeyri-mümkündür.

Daha sonra Ermənistan-Azərbaycan, Dağlıq Qarabağ münaqişəsindən söz açan Səməd Seyidov bildirdi ki, bu problemin həll olunmaması bölgədə sülh və əmin-amanlığın təminatına ciddi əngəl yaradır. Ermənistan BMT Təhlükəsizlik Şurasının məlum 4 qətnaməsinə, ATƏT-in, Avropa Şurasının qərarlarına məhəl qoymur, işğalçılıq siyasətindən hələ də əl çəkmir.

Dominika Birliyinin BMT-dəki daimi nümayəndəsi demişdir ki, Azərbaycana gələn nümayəndə heyətinin bu ölkə ilə əyani tanışlığı əlaqələrimizin hərtərəfli inkişafı baxımından çox əhəmiyyətlidir. Səfərimiz çərçivəsində Azərbaycanın siyasi, iqtisadi, mədəni, sosial həyatı ilə yaxından tanış olduq. Ölkəniz sürətlə inkişaf edir. Hesab edirik ki, Azərbaycanın üzləşdiyi Dağlıq Qarabağ münaqişəsi də tezliklə öz ədalətli həllini tapacaq.

Milli Məclisin deputatlarından, komitə sədrinin müavini Sevinc Fətəliyeva, Cavanşir Feyziyev, Asim Mollazadə, Qənirə Paşayeva BMT yanında daimi nümayəndəliklərin əməkdaşlarının ölkəmizə edilən səfərlərini yüksək qiymətləndirdilər. Qeyd edildi ki, bu səfərlər ikitərəfli və beynəlxalq təşkilatlar çərçivəsində əməkdaşlığımızın inkişafına təkan verəcəkdir.

Azərbaycan.- 2011.- 9 iyul.- S.2.