Yeni yüksəliş dövrü başlanır

Ölkəmiz müstəqillik qazanandan sonra Azərbaycan üçün ən əlamətdar hadisələrdən biri dünyanın müxtəlif bölgələrində yaşayan soydaşlarımız arasında milli birliyin yaranması, getdikcə daha möhkəm təməllər üzərində bərqərar olmasıdır. Dünya azərbaycanlıları arasında azərbaycançılıq fəlsəfəsi əsasında belə birliyin yaranmasının müəllifi qismində isə ümummilli lider Heydər Əliyev çıxış edir. Məhz onun titanik fəaliyyəti nəticəsində dünyada yaşayan soydaşlarımız azərbaycançılıq ideologiyası ilə sıx təşkilatlanmağa başlayıblar. Buna paralel olaraq Azərbaycan diaspor quruculuğu sahəsində yeni yüksəliş dövrü başlanıb. Müasir dünya reallığı isə aydın göstərir ki, hər hansı ölkə barəsində düzgün beynəlxalq ictimai rəyin formalaşmasında diaspor təşkilatları mühüm rol oynayır. Ulu öndər irsinin ən görkəmli nümayəndəsi olan Prezident İlham Əliyevin məqsədyönlü siyasəti isə bu gün dünya azərbaycanlılarının daha sıx birləşməsinə, Azərbaycanın inkişafına özünəməxsus töhfələr verməsinə gətirib çıxarır.

Dünya Azərbaycanlılarının III Qurultayında iştirak edən Ümumrusiya Azərbaycan Konqresinin Çuvaşiya regional təşkilatının sədri Əziz Qədirov bu fikirləri bizimlə belə bölüşdü:

- Azərbaycan ötən əsrdə yenidən dövlət müstəqilliyini əldə etdikdən sonra dünya azərbaycanlılarının təşkilatlanması, aralarında birlik və həmrəyliyin daha da möhkəmlənməsi ulu öndər Heydər Əliyevin təşəbbüsü sayəsində mümkün oldu. Ümummilli liderin bu istiqamətdə həyata keçirdiyi məqsədyönlü siyasət dünyanın müxtəlif bölgələrində yaşayan soydaşlarımız arasında münasibətləri yeni keyfiyyət mərhələsinə yüksəltdi, onlar arasında münasibətləri daha da sıxlaşdırdı. Çox sevindirici haldır ki, ulu öndərin bu siyasəti onun layiqli davamçısı olan Azərbaycan Prezidenti İlham Əliyev tərəfindən böyük müvəffəqiyyətlə davam etdirilir. Dünya azərbaycanlılarının III qurultayı bunu əyani olaraq təsdiq edən daha bir mühüm tədbirdir. Bununla yanaşı, Azərbaycan diasporunun inkişafında dövlət tərəfindən atılan addımlar ölkə həqiqətlərinin dünya ictimaiyyətinə çatdırılmasında kifayət qədər vacib rol oynayır və öz müsbət nəticələrini verir. Əminəm ki, diaspor təşkilatlarımız bundan sonra da dinamik inkişaf mərhələsində olacaq. Proseslər göstərir ki, dünya azərbaycanlılarının təşkilatlanmasında yeni yüksəliş dövrü başlanır.

- Dünya azərbaycanlılarının II qurultayından sonra keçən 5 il ərzində ölkəmizin diaspor təşkilatlarının inkişafını necə dəyərləndirərdiniz?

- Diaspor təşkilatlarının son 5 il ərzində fəaliyyətini təhlil etsək, onların ildən-ilə kifayət qədər gücləndiyini aydın şəkildə görərik. Bir daha qeyd edim ki, burada Azərbaycan dövlətinin atdığı məqsədyönlü addımlar xüsusi çəkiyə malik olub. Digər tərəfdən, qeyd edilən müddət ərzində diaspor təşkilatları özləri də mövqelərini, təsir dairələrini daha da gücləndirmək üçün əməli addımlar atıblar. Eyni zamanda, üzvlərinin sayını nəzərəçarpacaq dərəcədə artırıblar. Məsələn, elə götürək Ümumrusiya Azərbaycan Konqresini. Əgər əvvəllər bu Konqresin 200 min üzvü var idisə, indi onların sayı 1 milyona yaxınlaşır. Ümumrusiya Azərbaycan Konqresinin Çuvaşiya regional təşkilatında öz fəallıqları ilə seçilən üzvlərin sayı isə min nəfəri keçir. Halbuki bir neçə il əvvəl belə fəal üzvlərin sayı 50-60 nəfərə güclə çatırdı. Hazırda isə ümumi üzvlərin sayı bir neçə min nəfər təşkil edir.

- Fəaliyyətinizdə hansı çətinliklərlə üzləşirsiniz?

- İşimizi elə qurmağa çalışırıq ki, sonradan hansısa problemlərlə qarşılaşmayaq. Əsas məqsədimiz və fəaliyyət istiqamətimiz Azərbaycan reallıqlarını və həqiqətlərini dünyaya, o cümlədən Rusiya ictimaiyyətinə çatdırmaq, ölkəmiz haqda yanlış rəy yaratmaq istəyənlərin bu istəklərinin həyata keçməsinin qarşısını almaqdır. Çalışırıq ki, tarixi vətənimiz olan Azərbaycanın sürətli inkişafının davamlı olmasında bizim də töhfələrimiz olsun. Azərbaycanın siyasi, iqtisadi, sosial tərəqqisi biz diaspor təşkilatlarına ən böyük kömək və mənəvi dayaqdır. Hazırda Prezident İlham Əliyevin rəhbərliyi altında Azərbaycan dinamik inkişaf edən, beynəlxalq birlikdə öz layiqli yerini tutan bir ölkədir. Ulu öndər Heydər Əliyevin şah əsəri olan müstəqil Azərbaycanla biz fəxr edirik.

- Rusiyada erməni diasporunun da fəal olduğu, ölkəmizə qarşı kampaniyalar apardığı məlumdur. Əsassız erməni iddialarının qarşısının alınması, onların neytrallaşdırılması üçün hansı işlər görürsünüz?

- Əvvəlki illərdə, ola bilsin ki, Rusiyadakı erməni diasporları öz qarayaxma kampaniyaları vasitəsilə Azərbaycan haqda hansısa yanlış rəyin yaranmasına nail ola bilirdilər. Lakin indi tamam fərqli vəziyyət hökm sürür. Azərbaycan dövlətinin sürətli tərəqqisi, buna paralel olaraq diaspor təşkilatlarının dinamik inkişafı əvvəlki illərlə müqayisədə yeni mənzərə formalaşdırıb. Rusiyada Azərbaycan diasporunun aktiv fəaliyyəti nəticəsində erməni yalanları ifşa olunub. Onların yalnız qarayaxma kampaniyaları ilə məşğul olduğu üzə çıxıb. Azərbaycan diasporu ölkəmiz barədə əsl həqiqətləri artıq lazımi qaydada Rusiya ictimaiyyətinə çatdırır, yanlış təsəvvür və rəylərin formalaşmasına imkan vermir. Lakin biz görülən işlərlə qənaətlənmək niyyətindən uzağıq və fəaliyyətimizi bundan sonra daha da gücləndirməyə çalışacağıq.

Müsahibəni apardı: Rasim BAYRAMOV

Azərbaycan.- 2011.- 9 iyul.- S.4.