Xalqın və dövlətin maraqlarını daim uca tuturuq

1991-ci ilin 10 iyul tarixində oxuculara yeni bir nəşr təqdim olundu: "İki sahil". Bu qəzet çoxtirajlı "Zavod həyatı" qəzetinin bazasında yaradıldı. 1965-ci ildə mətbuat orqanları sırasına daxil olan "Zavod həyatı" neftçilərin fədakar əməyi, əldə olunan uğurlar barədə ictimaiyyəti ətraflı məlumatlandırırdı. "İki sahil" müstəqil nəşr olduğundan adı kimi tutduğu yol, ideya istiqaməti də genişləndi. "Vahid Azərbaycan uğrunda!" devizi altında fəaliyyətə başlayan "İki sahil"in səhifələrində xalqımızın Araz dərdindən, dünyanın müxtəlif ölkələrinə səpələnmiş soydaşlarımızın, bacı-qardaşlarımızın o taylı, bu taylı problemlərindən, onların yaşayışından ətraflı materiallar dərc olundu. İlk nömrədə "Yurdumuzun ulu daşları" silsiləsindən "Xudafərin körpüləri", ""Təbriz" səndən gileyim var?" kimi yazılar oxucular tərəfindən böyük rəğbətlə qarşılandı.

"İki sahil"in respubilkamızda və beynəlxalq aləmdə baş verən hadisələr barədə ətraflı və obyektiv məlumatları ictimaiyyətin diqqətini özünə çəkdi. Qəzetdə siyasətlə yanaşı, iqtisadiyyat, mədəniyyət xəbərlərinin də geniş yer alması oxucuların böyük rəğbətinə səbəb olmaqla yanaşı, onların müxətlif səpkili məktublarının qəzetimizə yol açmasına stimul verirdi. Beləcə, günlər ayları, illəri əvəzlədikcə "İki sahil"in uğurları artdı, oxucu auditoriyası genişləndi, fəaliyyətinin əsasına çevirdiyi müstəqilliyimizin və dövlətçiliyimizin möhkəmləndirilməsinə xidmət prinsipinə sadiqlik özünü hər addımda təsdiqlədi.

Müstəqilliyimizin ağır günlərində "İki sahil" bu həqiqəti yazdı ki, tarixən hər bir xalq, millət dövlətə rəhbərlik edənlərin səhvlərinin acısını çəkməli olub. Azərbaycan da müstəqilliyimizin bərpasının ilk illərində ölkəyə rəhbərlik edənlərin səriştəsizliyi, idarəçilik qabiliyyətlərinin yoxluğu, hakimiyyətə hərislikləri ucbatından böyük faciələrlə üz-üzə qaldı.

Daim azad, müstəqil yaşamaq, öz təbii sərvətlərinin əsl sahibinə çevrilmək arzusu ilə yaşayan xalqımız 1991-ci ildə yenidən bu istəyinə qovuşsa da, həmin dövrün iqtidarının yarıtmaz siyasəti, hakimiyyət uğrunda mübarizənin dərinləşməsi Azərbaycan adlı bir dövlətin varlığını sual altında qoyurdu. Belə bir çətin dövrdə "İki sahil" qəzeti öz səhifələrində reallıqları olduğu kimi ictimaiyyətə çatdırmaqdan, Azərbaycanın xilaskarının ulu öndər Heydər Əliyev olduğunu bəyan etməkdən çəkinmədi. Əksinə, bütün bunlardan qürur duydu.

Dövlət başçısı cənab İlham Əliyevin Yeni Azərbaycan Partiyasının yaradılmasının 15 illiyi şərəfinə ziyafətdəki çıxışı zamanı söylədiyi fikri xatırlatmaq istərdik: "Yeni Azərbaycan Partiyası müxalifət partiyası kimi yaradılmışdı. Ancaq indiki müxalifətdən fərqli olaraq, biz dövlətə, dövlətçiliyə yox, o vaxtkı antimilli iqtidara müxalifətdə idik. Deyə bilərəm ki, Yeni Azərbaycan Partiyası Azərbaycanda siyasi davranış, siyasi mədəniyyət nümunəsini göstərmişdir. Biz müxalifətdə əlimizdə daş-kəsəklə yox, əlimizdə qələmlə çalışırdıq. İdeyalarımızı, fikirlərimizi öz çıxışlarımızda, məqalələrdə, ictimai tədbirlərdə irəli sürürdük. Bugünkü müxalifətdən fərqli olaraq, biz maksimum dərəcədə siyasi mədəniyyət göstərmişdik. Siyasi opponentləri təhqir etməmişdik, onlara fiziki xəsarət yetirməmişdik. Biz, sadəcə, xalqın iradəsinə arxalanaraq, Azərbaycanın uğurlu gələcəyinə çalışırdıq."

Bu fikrə istinadən deyə bilərəm ki, "İki sahil" qəzeti də 1991-1993-cü illərdə müstəqil fəaliyyət göstərsə də, reallıqları təhrif etmədən, olduğu kimi ictimaiyyətə çatdırdığı üçün cəmiyyət tərəfindən yüksək səviyyədə qəbul olundu.

Mətbuat cəmiyyətin güzgüsüdür. Bu sahədə çalışan qələm sahibləri həqiqəti, düzgünlüyü və obyektivliyi başlıca meyar kimi qəbul etməlidirlər. Azərbaycan mətbuatı zamanın tələbinə uyğun təkmilləşib, cəmiyyətin formalaşmasında, demokratiyanın bərqərar olmasında və inkişafında mühüm rol oynayıb. Bu gün də mətbuat daşıdığı missiyanı uğurla yerinə yetirir. Bütün cəmiyyətlərdə baş verən hadisələri əks etdirən informasiyalara böyük ehtiyac olub və olacaq. İctimai fikrin formalaşmasını informasiyasız təsəvvür etmək qeyri-mümkündür. Ən əhəmiyyətli kapitala çevrilən informasiyaların yayılmasında, ehtiyacların ödənilməsində mühüm əhəmiyyətə malik mətbuatın rolu bu baxımdan böyükdür. Təbii ki, zaman keçdikcə informasiyanın cəmiyyətə çatdırılması formaları da dəyişir, təkmilləşir.

1993-cü ildə xalqın təkidli tələbi ilə hakimiyyətə qayıdışından sonra ulu öndər Heydər Əliyev azad mətbuatın inkişafına xüsusi diqqət göstərdi. Dahi şəxsiyyət söz, mətbuat azadlığının inkişafına əngəl olan süni maneələrin aradan qaldırılması üçün qanunvericilik bazasının təkmilləşdirilməsini təmin etdi. Vətəndaş cəmiyyətinin quruculuğunu özünün inkişaf modeli seçən Azərbaycanda KİV-nin rolunun artırılması başlıca məqsəd kimi qarşıya qoyuldu. Ümummilli lider mətbuat azadlığından sui-istifadə hallarını pisləyir, qanun pozuntularının, şəxsiyyətə mənfi təsir göstərən halların yolverilməz olduğunu bildirirdi.

"İki sahil" qəzeti heç vaxt mətbuat azadlığından sui-istifadə hallarına yol verməmiş, bu yolu tutanlara qarşı daim sərt mövqeyini nümayiş etdirmişdir. Qəzet demokratiya yolu tutan Azərbaycan dövlətinin bu istiqamətdə həyata keçirdiyi tədbirləri, imzalanan fərman və sərəncamları daim səhifələrində ictimaiyyətə çatdırır. Ulu öndər Heydər Əliyevin rəhbərliyi ilə hazırlanan Yeni Konstitusiyamızın qəbulu, eyni zamanda, Milli Məclisə seçkilərlə bağlı qəzetimizdə aparılan müzakirələri xatırlatmaq istərdim. "Son sözü xalq deyəcək" sərlövhəli yazıda bir daha qeyd etmişdik: "12 noyabr Azərbaycanın taleyində dönüş günü olacaq. Bu gün ümumxalq referendumu vasitəsilə dövlətin, cəmiyyətin bel sütunu olan Konstitusiya qəbul ediləcək. İllərlə davam edən qanun boşluğuna son qoyulacaq."

Ulu öndər Heydər Əliyevin şəxsiyyət kimi böyüklüyü onda idi ki, o, peşə etikasını kobud pozan, faktlara deyil, şəxsi mülahizələrə söykənən "yazarlar"ın cəzalandırılmasına yol vermir, dövlət məmurlarına dözümlü olmağı tövsiyə edirdi. Bu fakt ulu öndərin ölkədə azad sözün, müstəqil mətbuatın inkişafına diqqət və qayğısının göstəricilərindəndir. O, ölkədə söz və mətbuat azadlığının qarantı olduğunu daim bildirirdi: "Bizim ümumi məqsədimiz mətbuata daha da çox azadlıq vermək, söz azadlığını daha geniş təmin etmək, Azərbaycanda demokratiyanı bütün sahələr üzrə inkişaf etdirməkdən ibarətdir."

Ulu öndər Heydər Əliyevin müstəqil respublikamıza rəhbərliyi illərində həyata keçirilmiş çoxşaxəli islahatların nəticəsi olaraq bu gün Azərbaycanda söz və mətbuat azadlığı sahəsindəki mövcud vəziyyət qabaqcıl demokratik ölkələrlə müqayisə edilə bilər. Demokratik cəmiyyət-demokratik mətbuat, azad cəmiyyət - azad mətbuat anlayışlarını daim önə çəkən Prezident İlham Əliyev bütün çıxışlarında bu fikri bəyan edir ki, Azərbaycanın daha da qüdrətli, demokratik, sivil, müasir dövlətə çevrilməsi üçün Heydər Əliyev siyasəti davam etdirilməlidir. Son 7 ilə yaxın dövrün reallıqları bu vədin konkret əməli işdə öz təsdiqini tapdığını göstərir.

2009-cu ilin martında keçirilən referendumda Konstitusiyanın 29 maddəsinə edilən 40-a yaxın əlavə və dəyişikliyin böyük əksəriyyətini insan hüquq və azadlıqlarının, mətbuat azadlığının yüksək səviyyədə təmin olunması təşkil edir. "Şəxsiyyət toxunulmazlığı hüququ" maddəsinə edilən əlavəyə görə qanunla nəzərdə tutulan hallardan başqa, şəxsi və ailə həyatına müdaxilə etmək qadağandır. Hər kəsin şəxsi və ailə həyatına qanunsuz müdaxilədən müdafiə hüququ vardır. Heç kəs onun xəbəri olmadan izlənilə bilməz, video və foto çəkilişinə, səs yazısına və digər bu cür hərəkətlərə məruz qoyula bilməz. Həmçinin "Məlumat azadlığı" maddəsinə edilən əlavə də demokratik prinsiplərin inkişafının təsdiqidir. Əlavəyə əsasən hər kəsin kütləvi informasiya vasitələrində dərc edilən və onun hüquqlarını pozan və ya mənafelərinə xələl gətirən məlumatı təkzib etmək və ya ona cavab vermək hüququna təminat verilir.

Bütün bunlar təsdiq edir ki, Azərbaycan dövləti müstəqil mətbu nəşrlərin sərbəst fəaliyyətinə, jurnalistlərin öz iradələrini azad şəkildə ifadə etməsinə, insan hüquqlarının qorunmasına bütün imkanların yaradılmasının tərəfdarıdır.

Bir məqamı xüsusi qeyd etmək istərdim ki, ulu öndər Heydər Əliyev Yeni Azərbaycan Partiyasının yaradılmasının 2-ci ildönümü münasibətilə keçirilən ümumrespublika müşavirəsində müstəqilliyimizin ilk illərində yaşanan durumu təhlil edərkən reallıqların təbliğində "İki sahil" qəzetinin də rolunu yüksək dəyərləndirmişdir: "O vaxt "İki sahil" qəzeti yaranmışdı. Mən hesab edirəm ki, bu qəzet də çox iş görmüşdür. Bu qəzet indi də Yeni Azərbaycan Partiyasına xidmət edir. Amma o vaxt bu partiya yox idi, lakin "İki sahil" qəzeti çox cəsarətli məqalələr verirdi. Mən təkcə Naxçıvanı götürmürəm, ədalətsiz hadisələrə qarşı Azərbaycanın ayrı-ayrı vətəndaşlarının, ziyalılarının fikrini dərc etməkdə bu qəzet yaxşı fəaliyyət göstərmişdir, indi də göstərir. Mən bunu da yüksək qiymətləndirirəm".

Yeni Azərbaycan Partiyasının yaradılmasının 10-cu ildönümü ilə əlaqədar keçirilən tədbirdə də ümummilli lider Heydər Əliyev bildirmişdir ki, hər bir siyasi partiyanın əsas fəaliyyəti ideoloji iş, təbliğat işi olmalıdır. "Bir halda ki, Yeni Azərbaycan Partiyası bu gün iqtidarda olan partiyadır, demək, partiyanın, iqtidarın fəaliyyətini təbliğ etmək və iqtidara qarşı, partiyaya qarşı olan antitəbliğatın qarşısını almaq - bunlar hamısı bizim mətbuatın əsas vəzifələridir. Bu ideoloji iş partiyamızın əsas vəzifəsidir."

20 illik tarixi dövrdə "İki sahil" qəzeti qazandığı uğurlarla kifayətlənməyərək daha səylə çalışmış, dövrün mətbuatın qarşısına qoyduğu tələblərə yüksək səviyyədə cavab verməyə səy göstərmişdir. Biz bu prinsipi də fəaliyyətimizdə əsas götürmüşük ki, qəzetin bugünkü sayı dünənki sayından müəyyən yeniliyi ilə fərqlənsin, yazıların keyfiyyəti, informasiya yükü artsın.

Təbii ki, dövlətə, dövlətçiliyə xidməti fəaliyyətində öndə saxlayan mətbuat orqanı olaraq əldə edilən uğurlarımız dövlətimizin 20 illik müstəqillik tarixi ilə bağlıdır. Bu il Azərbaycanın dövlət müstəqilliyinin bərpa olunmasının 20 ili qeyd olunacaq.

Qəzetimizin 20 illik inkişaf yolunu təhlil edərkən Azərbaycanın ötən müstəqillik tarixində qazandığı uğurları da təhlil etməyə böyük ehtiyac duyulur.

Müstəqillik yollarında yenicə addımlarını atan hər bir ölkənin qarşısında müxtəlif istiqamətli yollar dayanır. Hansı yolun müəyyənləşdirilməsi isə həmin dövlətin rəhbərinin siyasi təcrübəsinin, iradəsinin, idarəçilik prinsipinin göstəricisidir. Müstəqiliyimizin ilk illərində yaşanan problemlər həmin dövrün iqtidarının seçdiyi yolun öz maraqlarına xidmət etdiyini açıqladı. Ölkədə ictimai-siyasi durumun gərginliyi, xaos, anarxiya və özbaşınalığın baş alıb getməsi bütün sahələrdə tənəzzülün dərinləşməsinə səbəb oldu. Lakin dahi şəxsiyyət Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra müxtəlif yönümlü yollar arasında ən uğurlusu seçildi. Ulu öndər Heydər Əliyevin düşünülmüş və məqsədyönlü siyasəti nəticəsində Azərbaycan böyük inkişaf, tərəqqi yoluna çıxdı. 1993-2003-cü illər Azərbaycan tarixinə dirçəliş dövrü kimi daxil oldu.

Ümummilli lider Heydər Əliyevin siyasi fəaliyyətinin əsas hissəsi yaradıcısı və sədri olduğu Yeni Azərbaycan Partiyası ilə sıx şəkildə bağlıdır. Partiyanın yaradılması ilə bağlı bir qrup Azərbaycan ziyalısının ulu öndərə ünvanladığı "Azərbaycan Sizin sözünüzü gözləyir" müraciəti qəzetimizin 15 oktyabr 1992-ci il sayında dərc olunmuşdur. Həmin müraciətdə səslənən hər bir fikrin geniş təhlili qəzetin səhifələrində xüsusi yer tutmuş, oxucular öz fikir və mülahizələrini bildirmişdilər. Yeni Azərbaycan Partiyasının təsis konfransı 1992-ci il noyabrın 21-də Naxçıvan şəhərində keçirilib.

Dahi şəxsiyyətin 1993-cü ilin iyununda hakimiyyətə qayıdışı ilə YAP-ın inkişafında yeni mərhələ başlamışdır. Partiyanın məqsəd və məramı, keçdiyi inkişaf yolu qəzetimizdə ətraflı şərh olunmuşdur. Həmin dövrdə YAP-ın qarşısında bir tərəfdən iqtidar partiyası kimi cəmiyyətin siyasi sistemində özünün aparıcı mövqeyini təsdiq etmək, digər tərəfdən isə müstəqil dövlət quruculuğu proseslərində yaxından iştirak etmək vəzifəsi dayanırdı. Qəzetimiz Heydər Əliyev ideyalarının, Yeni Azərbaycan Partiyasının şəhər və rayon təşkilatlarının təşkilində və eyni zamanda, gördüyü işlərin təbliğatçısı olaraq səhifələrində hər bir uğuru ətraflı şəkildə ictimaiyyətə çatdırdı və bu gün də həmin ənənəsinə sadiqdir.

YAP böyük sınaqlardan çıxaraq şərəfli yol keçmiş bir partiyadır. Partiyanın uğurlu siyasəti onu qısa müddətdə ümumxalq partiyasına çevirdi. Təsis olunanda 500 nəfər üzvü olan YAP-ın bu gün sıralarında yarım milyondan artıq insanın birləşməsi Heydər Əliyev ideyalarına sədaqətin, həyata keçirilən siyasətin bu gününə və gələcəyinə inamın göstəricisidir. Partiyanın sıralarında birləşən üzvlərin 40 faizini gənclərin təşkil etməsi də bu reallığı təsdiqləyir. "İki sahil" qəzeti müntəzəm olaraq Yeni Azərbaycan Partiyasının gənclərin ictimai-siyasi fəallığının artırılmasına xidmət edən tədbirlərini, layihələrini geniş şəkildə ictimaiyyətə çatdırır.

Demokratik inkişafın əsas göstəricilərindən biri də ölkədə seçkilərin azad, şəffaf, beynəlxalq standartlara uyğun keçirilməsidir. Ölkəmizdə çox mütərəqqi seçki qanunvericiliyi mövcuddur. Bu günədək keçirilən prezident, parlament və bələdiyyə seçkilərində, eyni zamanda, ümumxalq səsverməsində "İki sahil" qəzeti xüsusi fəallığı ilə seçilib. Seçki kampaniyasının bütün mərhələləri ətraflı işıqlandırılıb, səsvermə günü qəzetin əməkdaşları seçki məntəqələrində olaraq prosesi yaxından izləyib. Azərbaycanı uğurlu gələcəyə aparan siyasət daim xalqımız tərəfindən dəstəklənib, bu inam keçirilən seçki proseslərində səsvermə hüququndan istifadə edərək fəal iştirakdan aydın görünür. Yeni Azərbaycan Partiyası bu günədək keçirilən bütün seçki proseslərində qələbələr partiyası olduğunu təsdiqləyib.

Qeyd edək ki, demokratikləşmə prosesi iqtisadi tərəqqi üçün əsas rolunu oynayır. Azərbaycanda ulu öndər Heydər Əliyevin hakimiyyətə qayıdışından sonra sabitliyin yaranması iqtisadi tərəqqini sürətləndirdi, iqtisadi əməkdaşlıqda maraqlı olan dövlətlərin sayı artdı, ölkəmiz böyük investisiyalar məkanına çevrildi. Ümummilli lider "Əsrin müqaviləsi"nin imzalanmasını gerçəkləşdirərək Azərbaycanı dünyaya qovuşdurdu.

Bu gün "İki sahil" müstəqil ictimai-siyasi qəzet olaraq ARDNŞ-nin təsisçiliyi ilə uğurla fəaliyyət göstərir. "Əsrin müqaviləsi"nin ölkəmizə qazandırdığı uğurlar qəzetimizin səhifələrində xüsusi yer tutur.

"Əsrin müqaviləsi"nin əsas tərkib hissəsi olan BTC və BTƏ neft-qaz kəmərlərinin reallığa çevrilməsi iştirakçı, eyni zamanda, dünya dövlətlərinin iqtisadi imkanlarının genişlənməsinə öz müsbət təsirini göstərdi, yeni layihələrə yol açıldı. Bu gün Azərbaycanın iştirakı olmadan bölgədə hansısa bir iqtisadi layihənin həyata keçirilməsinin mümkünsüzlüyü ölkəmizin artan önəminin təsdiqidir. Beynəlxalq əhəmiyyətli layihələrin əsas iştirakçısı və təşəbbüsçüsünə çevrilən Azərbaycan dünyanın enerji təhlükəsizliyinin təminatçısıdır. Tarixən neft ölkəsi kimi tanınan Azərbaycan bu gün qaz ixracatçısına çevrilib. Azərbaycanın enerji potensialının dünyaya təqdimatında mühüm rol oynayan Beynəlxalq neft, qaz sərgi və konfransı da 1994-cü ildən keçirilməyə başlayır. İlbəil iştirakçıların sayının artması Azərbaycana olan diqqətin və marağın göstəricisidir.

Azərbaycanın iqtisadi sahədə qazandığı uğurlar və sosial müdafiənin gücləndirilməsinə yönələn addımlar "İki sahil" qəzetinin səhifələrində geniş yer tutur. Bu fikir daim önə çəkilir ki, dövlətin həyata keçirdiyi iqtisadi siyasətin əsasında əhalinin sosial rifah halının yaxşılaşdırılması dayanır. Bu istiqamətdə imzalanan fərman və sərəncamlar, qəbul olunan dövlət proqramları ilə bağlı təhlili yazılar müsbət dəyərləndirilir.

Ulu öndər Heydər Əliyevin xilaskarlıq missiyasından bəhs edərkən onun özündən sonrakı Azərbaycanın taleyini yüksək intellektli, praqmatik düşüncəli siyasətçi möhtərəm İlham Əliyevə tapşırmasıdır. Ulu öndər Heydər Əliyev 2003-cü il prezident seçkilərindən öncə xalqa müraciətində bildirmişdir: "İlham Əliyev yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək, Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm." Azərbaycanın tutduğu bu yol ulu öndərimizin 18 il əvvəl xilaskarlıq missiyasını üzərinə götürməklə başlanıb. Bu yol Milli Qurtuluş yoludur. Milli Qurtuluşdan başlanan yol mühüm uğurlarla zənginləşərək gələcəyə doğru davam edir. 2003-cü il prezident seçkilərində xalqın 76,84 faiz səsini qazanan cənab İlham Əliyev andiçmə mərasimində bir daha bəyan etmişdi ki, Azərbaycanın daha qüdrətli dövlətə çevrilməsi üçün Heydər Əliyev siyasi kursu davam etdirilməlidir. "Azərbaycan gələcəkdə çox zəngin və qüdrətli ölkəyə çevriləcəkdir. Neft strategiyasını davam etdirərək, qısa müddət ərzində ölkəmizi hərtərəfli inkişaf etdirəcəyik." Beş ildə hər bir vədin konkret əməli işdə təsdiqi cənab İlham Əliyevin 2008-ci ildə keçirilən növbəti prezident seçkilərində qələbəsini təmin etdi. 15 oktyabr 2008-ci il prezident seçkilərində xalqın 88,73 faiz səsini qazanan cənab İlham Əliyev seçki proqramında qarşıdakı illərdə görüləcək işləri diqqətə çatdırdı. 2003-cü ildən ötən 7 ildən artıq dövr ərzində dövlət başçısı İlham Əliyevin gördüyü işlər göz qabağındadır. Son yeddi ilin statistikasına diqqət yetirən hər kəsin gözü qarşısında ölkə rəhbərinin xalq, dövlət, vətən naminə gördüyü böyük işlərin geniş mənzərəsi canlanır. Cənab İlham Əliyev hələ Dövlət Neft Şirkətinin birinci vitse-prezidenti, millət vəkili, Azərbaycanı Avropa Şurası Parlament Assambleyasında təmsil edən nümayəndə heyətinin rəhbəri, Baş nazir kimi çətin, lakin şərəfli vəzifələri yerinə yetirəndə daim ölkəmizin gələcəyini düşünmüş, hər bir məsələyə milli maraqlar baxımından yanaşmışdır. Cənab İlham Əliyev dövlət başçısı vəzifəsinə gələnə qədər çalışdığı sahələrdə daim belə bir fikri qabarıq şəkildə diqqətə çatdırırdı ki, biz gələcəyə baxmalıyıq.

Bu gün yeganə problemimiz olan Ermənistan-Azərbaycan, Dağlıq Qarabağ münaqişəsinin həlli istiqamətində dövlətimizin göstərdiyi səylər "İki sahil" qəzetinin səhifələrində xüsusi yer tutur. Qəzet yarandığı gündən xalqımızın üzləşdiyi bu amansız müharibənin acılarını faktlar əsasında ictimaiyyətə çatdırır. Qəzetin əməkdaşları cəbhə bölgələrində olur, ermənilərin yalanlarını üzə çıxaran faktlar toplayırlar. "İki sahil" qəzetinin hər sayında vətənpərvərlik mövzusunda yazılara rast gəlməmək mümkün deyil. Qəzetin əvvəlki saylarında "Yaralı Vətən" silsiləsindən torpaqlarımızın müdafiəsi uğrunda canlarından keçən oğul və qızlarımızın göstərdikləri qəhrəmanlıqların faktlar əsasında ictimaiyyətə çatdırılması böyük rəğbətlə qarşılanıb. Azərbaycanın artan iqtisadi imkanlarının fonunda hərbi qüdrətimizin möhkəmlənməsi ilə bağlı silsilə yazılar dərc olunur.

Dağlıq Qarabağ problemi nəticəsində doğma yurd-yuvalarından didərgin düşmüş soydaşlarımızın problemlərinin həlli istiqamətində atılan addımlar, Dövlət Neft Fondunun vəsaitləri hesabına məcburi köçkünlərin sosial vəziyyətinin yaxşılaşdırılması yönümündə görülən işlər də qəzetimizdə geniş işıqlandırılır.

Cənab İlham Əliyev Prezident kimi fəaliyyətə başladığı gündən ölkənin uzunmüddətli inkişaf proqramlarını müəyyənləşdirdi: Azərbaycanda heç bir çadır şəhərciyi qalmamalı, yoxsulluğun minimum səviyyəyə endirilməsi üçün ciddi tədbirlər görülməli, sahibkarlara dövlət tərəfindən kömək artırılmalı, regionların hərtərəfli inkişafı üçün dövlət proqramları qəbul edilib icrasına başlanılmalı, ölkənin elektrik enerjisi və yanacaq qazı ilə təmin olunmasına dair proqramlar hazırlanmalı, bütün istiqamətlərdə infrastruktur layihələri icra olunmalı, qeyri-neft sektoru inkişaf etdirilməli, əhalinin həyat səviyyəsinin yüksəldilməsi üçün digər zəruri tədbirlər görülməlidir. Möhtərəm Prezidentimiz İlham Əliyev bildirmişdir: "Biz neftdən əldə olunan gəlirləri hara gəldi sərf edə bilmərik. Bu pullarla gələcək nəsillər üçün yeni şəhərlər salmaq, yollar salmaq, zavod və fabriklər tikmək, neftlə bağlı olmayan yeni infrastruktur yaratmaq lazımdır. Çünki neft nə vaxtsa tükənir. Həmin proqram bu gün həyata keçirilərsə, gələcək nəsillər neft hasilatından və neftin dünya bazarında qiymətlərindən asılı olmayacaqlar. Beləliklə, neft bizim üçün məqsəd deyil, güclü iqtisadiyyat, güclü infrastruktur yaratmaq vasitəsidir." Dövlət başçısı İlham Əliyev neft kapitalının insan kapitalına çevrilməsini qarşıya mühüm vəzifə kimi qoyub. Bu gün təhsilin, elmin inkişafı istiqamətində atılan addımlar göz qabağındadır. Kadr hazırlığı günün tələbinə çevrilib.

Heydər Əliyev Fondu fəaliyyətə başladığı gündən milli irsimizin qorunması istiqamətində mühüm addımlar atır. Fondun təşəbbüsü ilə YUNESKO Azərbaycan muğamını bəşəriyyətin şifahı və qeyri-maddi irsinin şah əsərləri siyahısına daxil etmişdir. Muğamların qorunub saxlanılması və inkişafı, dünyada yayılması və beynəlxalq muğam tədbirlərinin keçirilməsi məqsədilə Bakıda Beynəlxalq Muğam Mərkəzi inşa edildi. Heydər Əliyev Fondunun bilavasitə təşkilatçılığı ilə muğam musabiqəsinin keçirilməsi də deyilənlərə əyani sübutdur.

Mehriban xanım Əliyevanın fəaliyyətində diqqəti çəkən məqamlardan biri də həqiqətlərimizin dünya ictimaiyyətinə çatdırılması istiqamətində atdığı addımlardır. Qeyd edək ki, Heydər Əliyev Fondunun təşkilatçılığı ilə Dağlıq Qarabağ həqiqətləri ilə bağlı neçə-neçə kitablar çap etdirilib. Faciələrimizlə bağlı dünyanın müxtəlif ölkələrində Heydər Əliyev Fondunun təşəbbüsü ilə tədbirlər keçirilir.

Bu baxımdan Heydər Əliyev Fondunun vitse-prezidenti, Rusiyanın Azərbaycanlı Gənclər Təşkilatının sədri Leyla Əliyevanın Xocalı faciəsinin beynəlxalq səviyyədə tanıdılması istiqamətində gördüyü işləri, onun təşəbbüsü ilə həyata keçirilən "Xocalıya ədalət" kampaniyasını da qeyd etmək istərdik.

Bu uğurlarımız "İki sahil" qəzetinin daim diqqətində olmuş, geniş işıqlandırılmışdır. Azərbaycanın bu günü, sabahı üçün atılan hər bir addım, əldə olunan uğur qəzetimizin səhifələrində mühüm yer tutur.

Bu gün böyük fəxrlə deyə bilərik ki, Azərbaycanın güclü siyasi lideri, xalqın həyat səviyyəsini yüksəltməyə xidmət edən təbii sərvətləri var.

Xalq-Prezident həmrəyliyi möhkəmdir, sarsılmazdır.

Qeyd etdiklərimiz Azərbaycanın 20 illik müstəqillik tarixində keçdiyi inkişaf yoluna qısa bir baxışdır. Bununla paralel olaraq bu gün 20 illik yubileyini qeyd etməyə hazırlaşan "İki sahil" qəzetinin keçdiyi yola nəzər saldıq. Azərbaycanın müstəqilliyinin yenidən bərpa olunmasının 20 ilinin qəzetimizin 20 illiyi ilə üst-üstə düşməsi təsadüfi xarakter daşımır. Bu, bir daha onu təsdiqləyir ki, tutduğu yoldan geri dönməyən, fəaliyyətə başladığı gündən "düzü düz, əyrini əyri" deməklə oxucu auditoriyasını genişləndirən "İki sahil" qəzeti Azərbaycanın keçdiyi inkişaf yoluna bələdçilik etməklə yanaşı, özü də bu dövrdə daha böyük təcrübə əldə etdi, qarşıdakı illər üçün mühüm uğurların təməlini qoydu.

Ötən illər ərzində qəzetimizin fəaliyyəti daim yüksək dəyərləndirilmiş, əməkdaşlarımızın bir qismi "Əməkdar jurnalist" adına layiq görülmüş, medallarla təltif olunmuşlar. Vaxtilə qəzetimizdə çalışan əməkdaşlarımızın bir çoxu hazırda müxtəlif qəzetlərə rəhbərlik edir, televiziya kanallarında çalışaraq "İki sahil"də əldə etdikləri təcrübədən bəhrələnirlər.

Mətbuat nümayəndələrindən bu günün tələbi sözsüz ki, 20 il bundan öncəki tələbdən fərqlidir. Azərbaycan yeniləşir, müasirləşir, dünya informasiya məkanına inteqrasiya edir. İctimai fikrə təsir imkanları geniş olan KİV ölkəmizdə və dünyada baş verən hadisə və proseslər haqqında obyektiv, hərtərəfli informasiya çatdırmalı, onları yüksək peşəkarlıqla şərh etməli, maarifləndirici yazılara geniş yer verməlidir. Milli-mənəvi dəyərlərimizin qorunmasında, azərbaycançılıq ideyasının təbliğində, dilimiz, mədəniyyətimiz, tariximizlə bağlı həqiqətlərin ölkə və beynəlxalq ictimaiyyətə çatdırılmasında yazılı və elektron KİV-nin üzərinə böyük məsuliyyət düşür. Bir məqamı da unutmamalıyıq ki, ölkəmiz müharibə şəraitindədir. Təbliğat xarakterli, vətənpərvərlik ruhunda yazılar dövrün tələbidir.

Fəaliyyətində daim bu prinsipləri öndə saxlayan "İki sahil" bu gün də yaradıcılıq axtarışlarını davam etdirməkdədir.

Vüqar RƏHİMZADƏ,

"İki sahil" qəzetinin baş redaktoru,

əməkdar jurnalist

Azərbaycan.- 2011.- 9 iyul.- S.5.