Yüksək aqrotexniki qulluq Qobustanın taxıl sahələrində bol məhsuldan xəbər verir

Dövlətin qayğısı sayəsində iqtisadiyyatın ən sürətli inkişaf edən sektorları sırasında kənd təsərrüfatı xüsusi yer tutur. Prezident İlham Əliyev bu sahənin inkişaf perspektivlərindən danışarkən xüsusi vurğulayıb ki, suvarılan ərazilərdə taxılçılığı, dəmyə yerlərdə isə üzümçülüyü genişləndirmək çox vacibdir. Bu həm də torpaqdan səmərəli istifadə deməkdir. Dövlət başçısının bu tapşırığını Qobustan rayonununda kənd təsərrüfatı məhsulları istehsalçıları da başlıca istiqamət kimi qəbul edirlər. Rayon icra hakimiyyətinin başçısı Adil Məmmədov söhbət əsnasında bildirdi ki, artıq dəmyə ərazidə 1600 hektar üzüm bağlarının salınması planlaşdırılıb. 6 hektar sahədə isə rayon üçün yeni olan kələm yetişdirilməsi nəzərdə tutulub.

Kənd təsərrüfatı işləri sahəsində xeyli təcrübəsi olan Adil Məmmədov bu sahənin inkişafını şərtləndirən amillərdən biri kimi, peşəkar, müasir texnologiyanın sirlərini mənimsəyə bilən yüksək ixtisaslı kadrların azlığını qeyd etməklə yanaşı, bildirdi ki, arzusu olan gəncləri Kənd Təsərrüfatı Akademiyasında təhsil almağa hazırlamaq işin xeyrinə olardı. Əlbəttə, torpaq diqqət və qayğıdan əlavə, müasir elmi yanaşma tərzi də tələb edir. O da qeyd olunmalıdır ki, kəndlərdə abad yollar salınması, müasir infrastruktur yaradılması təsərrüfat işlərində kompleks uğuru şərtləndirir. Başqa sözlə, kənd təsərrüfatı texnikasının rahat və operativ şəkildə hərəkəti, kənd adamının sosial qayğıların əlində çaş-baş qalmaması da məhsul istehsalına müsbət təsir edən amillərdəndir. Şübhəsiz ki, kənd təsərrüfatı məhsulları istehsalçısının fikri-zikri birbaşa əkində-biçində olanda daha çox uğur və mənfəət gözləmək olar.

Taxılçılığa gəldikdə isə, bu il də sahələrdən bol məhsul gözləyirlər. RİH başçısının aqrar məsələlər üzrə müavini Allahyar Atakişiyevin verdiyi məlumata görə, rayonda 2011-ci ilin məhsulu üçün 26 min hektardan artıq sahədə taxıl əkilib. Bunun da 15 min hektarı buğda, 11 min hektarı arpadır. Səpin optimal müddətdə aparıldığına, payız-qış mövsümü və yaz fəsli əkinçilik üçün əlverişli keçdiyinə görə, taxıl sahələrindən bol məhsul götürməyə inam çoxdur. Texnika biçinə vaxtında hazırlanıb. 46 taxılbiçən kombayndan 24-ü köhnə olsa da, saz vəziyyətdədir. Biçinin optimal müddətdə başa çatdırılması üçün aran rayonlarından da kombaynlar cəlb ediləcək. Mövsumun əvvəlində isə Qobustan kombaynları aran rayonlarına köməyə göndərilir. "Aqrolizinq" ASC-nin Qobustan rayon şöbəsi də əkin-biçin işlərində kəndli təsərrüfatlarına yaxından kömək edir.

Qobustanda taxılçılığın inkişafında bölgə təcrübə stansiyasının da əməyi çoxdur. Stansiyanın direktoru, biologiya elmləri namizədi Atabəy Cahangirovla sahələri gəzərkən çəkilən zəhmətin hədər getmədiyinə əmin olduq.

Qobustan bölgə təcrübə stansiyasının 483 hektar əkinə yararlı torpaq sahəsi var. Onun 245 hektarı əkilib, qalanı isə növbəlilik üçün dincə qoyulub. Sahənin 15 hektarı təcrübə üçün nəzərdə tutulub, 24 hektarında xaşa əkilib. 1 hektar sahədə kartof yetişdirilir.

Stansiyanın 40 işçisi var, 10 nəfər mövsümi işlərə cəlb edilir. Burada çalışan 5 elmi işçinin 3-nün elmlər namizədi olması işə elmi yanaşmanı şərtləndirən amillərdəndir. Kombaynı, şum traktorları və digər lazımi texnikası olan stansiyanın 500 tonluq, üçhissəli toxumsaxlama anbarından əlavə, yeni anbarın və xırmanın tikintisi də nəzərdə tutulub.

Bölgə təcrübə stansiyasının kollektivi hər il 330-350 ton yüksək reproduksiyalı toxum istehsal edir. Bu il hər hektardan 25-27 sentner məhsuldarlıq gözlənilir. Burada bölgəyə uyğun, xəstəliyə, şaxtaya və quraqlığa davamlı sortlar da yaradılır. "Qızıl buğda", həmçinin "Dəyanətli" və "Qüdrətli-48" arpa sortları artıq dövlət komissiyasına təqdim olunub.

A.Cahangirov onu da qeyd etdi ki, təcrübə stansiyasını tənəzzüldən dövlət qayğısı sayəsində xilas etmək mümkün olub. Çətinliklər xeyli arxada qalsa da, daha məsuliyyətlə işləməyə çalışırlar. Başlıca məqsəd il ərzində torpağı boş qoymamaq, növbəlilik prinsipi ilə yeni nailiyyətlər qazanmaqdır. Qobustanlı mütəxəssislər bir məqamı da xüsusi qeyd edirlər: dəmyə bölgədə kombayn taxıl sahələrinə girənə qədər taxılın dibi qurumamalıdır. Başqa sözlə, tələb olunan suvarma işləri, o cümlədən aqrotexniki qulluq qaydasında olanda, əlbəttə, sahələrdən bol məhsul götürmək mümkündür.

Telman NƏZƏRLİ

Azərbaycan.-2011.- 9 iyul.- S.6.