Qarşılıqlı
səfərlərin təşkili Azərbaycan ilə rumın
xalqları arasında münasibətlərin daha da genişlənməsinə
xidmət edir
Rumıniyanın hakim Demokrat Liberal
Partiyasının ölkəmizdə səfərdə olan
nümayəndə heyəti iyulun 12-də Azərbaycan
Yazıçılar Birliyində (AYB) olmuşdur.
AzərTAc xəbər verir ki, AYB-nin sədri,
xalq yazıçısı Anar qonaqları salamlayaraq iki
ölkə arasında mövcud olan siyasi, iqtisadi, elmi və mədəni
əlaqələrdən danışmışdır.
Diqqətə
çatdırılmışdır ki, Azərbaycanın
tanınmış ədiblərinin əsərləri
Rumıniyada çap edilərək müəlliflərinə
böyük şöhrət qazandırmışdır. Eyni
zamanda, bu ölkənin də bir çox yazıçı və
şairlərinin kitablarının Azərbaycanda çap
olunması böyük maraqla qarşılanmışdır. Bu ənənə bu
gün də uğurla
davam etdirilir.
Rumıniyanın
Azərbaycanın müstəqilliyini tanıyan ilk dövlətlərdən biri
olduğunu vurğulayan
xalq yazıçısı ölkələrimiz
arasındakı əlaqələrin hazırkı yüksək
səviyyəyə çatmasında xalqımızın ümummilli lideri Heydər
Əliyevin misilsiz xidmətlərini qeyd etmişdir.
Buxarestdə Azərbaycanın
ümummilli lideri Heydər
Əliyevin, Bakıda isə görkəmli rumın bəstəkarı
Corce Eneskunun abidələrinin
ucaldılması xalqlarımız arasındakı bu münasibətlərin yüksək səviyyəsini
göstərir.
Ermənistan-Azərbaycan,
Dağlıq Qarabağ münaqişəsi
barədə qonaqlara məlumat verən
AYB sədri Azərbaycanın ərazi bütövlüyünü
dəstəklədiyinə və münaqişənin həllinə
ədalətli mövqedən yaxınlaşdığına
görə rəsmi Buxarestə və rumın xalqına təşəkkürünü bildirmişdir.
Yüksək
qonaqpərvərliyə görə minnətdarlığını
bildirən nümayəndə heyətinin rəhbəri, Buxarest şəhərinin 2-ci sektorunun
meri, Rumıniya Bələdiyyələr
Assosiasiyasının sədr müavini Nekulay Ontsanu demişdir ki, bu gün rumınlar Bəxtiyar
Vahabzadəni, Anarı, Elçini, Çingiz Abdullayevi və Azərbaycanın digər
tanınmış söz adamlarını
çox yaxşı tanıyırlar.
Qonaq xüsusi olaraq vurğulamışdır ki, Buxarestdə ümummilli
lider Heydər Əliyevin abidəsinin
ucaldılması Rumıniyada ulu öndərin
xatirəsinə böyük ehtiramın
göstəricisidir.
Dağlıq
Qarabağın əzəli Azərbaycan torpağı olduğunu xüsusi vurğulayan N.Ontsanu bildirmişdir ki,
Rumıniya bütün beynəlxalq təşkilatlarda
Azərbaycanın ərazi bütövlüyünü
birmənalı şəkildə dəstəkləyir və
münaqişənin sülh yolu ilə, beynəlxalq hüququn
norma və prinsipləri əsasında həllinə tərəfdardır.
Görüşdə
elm, mədəniyyət xadimlərinin, təhsil
sahəsində çalışan tədqiqatçıların
qarşılıqlı səfərlərinin təşkilinin
vacibliyi vurğulanmış, bu səfərlərin xalqlarımız
arasında münasibətlərin daha da möhkəmlənməsinə xidmət etdiyi bildirilmişdir.
AzərTAc
Azərbaycan.- 2011.- 13 iyul.- S.7.