Gənclərin qlobal ətraf mühit kampaniyasına start verildi

Heydər Əliyev Fondunun fəaliyyəti fərqli sivilizasiyaların uğurlu dialoquna, keçmişlə gələcək arasında körpü salınmasına, insanlara yüksək mənəvi-etik dəyərlərin əxz edilməsinə yönəlmişdir.

İctimai həyatımızın ayrı-ayrı sahələrində gerçəkləşdirilən layihələr, beynəlxalq təşkilatlarla fəal əməkdaşlıq Azərbaycanın uğurlu gələcəyinin təmin olunmasına, respublikamızın sivil dünyaya inteqrasiyasına hesablanıb. Ulu öndərin siyasi kursuna sadiq qalan, onun əməllərini yaşadan və ideyalarını gerçəkləşdirən Fond səmərəli fəaliyyəti ilə ölkəmizin tərəqqisinə və dövlət quruculuğuna yeni-yeni töhfələr bəxş edir.

Ölkə gənclərinin məşğulluğunun təmin edilməsi, onların ictimai-siyasi proseslərdə yaxından iştirakının həyata keçirilməsi Heydər Əliyev Fondunun ümummilli liderin ideyalarına dəstək konsepsiyasının tərkib hissələrindən biridir. Ölkəmizdə və xaricdə təşkil olunan yüksək səviyyəli tədbirlərdə ətraf mühit problemlərinin həllində gənclərin iştirakı, onların məşğulluğuna təsir göstərən maneələrin qlobal, milli səviyyələrdə müzakirəsi daim diqqət mərkəzində olur. Beynəlxalq tədbirlərdə Heydər Əliyev Fondunun prezidenti Mehriban xanım Əliyeva Azərbaycanın gənc ölkə olduğunu diqqətə çatdıraraq ölkəmizdəki iqtisadi artım tempindən, respublikamızın sosial-iqtisadi tərəqqisindən bəhs edir. Gənc nəslin gəlirləri, bu zümrənin imkanlarının genişləndirilməsi və məşğulluğunun təmin edilməsində dünyanın ən qabaqcıl təcrübələri, məşğulluq mərkəzlərinin yaradılması, sahibkarlıqla bağlı maarifləndirmə, insan kapitalının idarə edilməsi, təhsildən kənar qalan gənclərlə iş və digər məsələlər müzakirə olunur, təkliflər səsləndirilir.

Ötən müddət ərzində qəbul edilmiş "Gənclər siyasəti haqqında" Azərbaycan Respublikası Qanunu və gənclər siyasəti sahəsində digər normativ hüquqi aktlar, habelə Azərbaycan gənclərinin forumlarının keçirilməsi gənclərlə iş sahəsinin hüquqi əsaslarını və icra mexanizmini müəyyən etmişdir. Prezident İlham Əliyev 7 iyul 2011-ci il tarixdə "Azərbaycan Gəncliyi 2011-2015-ci illərdə Dövlət Proqramı"nı təsdiq etmişdir. Dövlət Proqramının əsas məqsədi ölkədə gənclər siyasətini daha da inkşaf etdirmək, onların menecment sahəsində fəal iştirakına şərait yaratmaq, habelə gənc mütəxəssislərin işlə təminatı və digər sosial-iqtisadi problemlərin həllidir. Sərəncamda Azərbaycanda gənclər siyasətinin başlıca istiqamətləri açıqlanmış, bu təbəqəyə diqqətin artırılması üçün konkret tədbirlərin hazırlanması və sənəddən irəli gələn məsələlərin icrası Nazirlər Kabinetinə həvalə olunmuşdur. "Azərbaycan Gəncliyi 2011-2015-ci illərdə Dövlət Proqramı" indiyə qədər dövlət gənclər siyasətində qəbul edilmiş fərman və sərəncamlarla müqayisədə genişmiqyaslı aktual problemləri özündə ehtiva edir.

Heydər Əliyev Fondunun beynəlxalq əhəmiyyətli quruma çevrilməsi istiqamətində işlər son illər daha da genişlənmişdir. Fondun müxtəlif ölkələrdə filiallarının açılması bir tərəfdən təşkilatın qlobal miqyasda artan nüfuzunun ifadəsidirsə, digər tərəfdən Azərbaycanı daha yaxından təbliğ etmək, ölkə həqiqətlərini dünya arenasına çıxarmaq, habelə diaspor hərəkatının genişlənməsinə yardımçı olmaq niyyətinin təzahürüdür. Son illərdə Rusiyada, Rumıniyada, Türkiyədə, Böyük Britaniyada filiallarını açan Fond fəaliyyətini beynəlxalq müstəvidə genişləndirmək imkanı qazanmışdır. Fondun Rusiya filialının fəaliyyəti bu baxımdan daha qabarıq hiss olunur. Azərbaycanın müasir gəncliyinin ən layiqli, vətənpərvər təmsilçisi kimi bu missiyanı üzərinə götürmüş Leyla Əliyeva Fondun Rusiya filialına yüksək səviyyədə rəhbərlik edir.

Son illərdə Leyla Əliyeva Azərbaycanın milli-mənəvi dəyərlərinin, mədəniyyətinin, incəsənətinin, ədəbiyyatının təbliği, diaspor hərəkatının genişləndirilməsi istiqamətində bütün lazımi tədbirləri həyata keçirir. Rusiya ilə Azərbaycan arasında mədəni dialoqun genişləndirilməsi istiqamətində atılan addımlar da bu baxımdan təqdirəlayiqdir. Qısa müddətdə Leyla xanım Rusiyanın mədəni ictimaiyyəti ilə müxtəlif səviyyəli görüşlər keçirmiş, Azərbaycanın zəngin mədəniyyətinin təbliği istiqamətində uğurlu addımlar atmışdır.

2007-ci ilin dekabrında Leyla Əliyevanın baş redaktorluğu ilə nəşrə başlayan "Bakı" jurnalı da Azərbaycanın və onun paytaxtının təbliği baxımından xüsusi əhəmiyyətə malikdir. Rusiya oxucuları bu nəşr vasitəsilə respublikamız barədə daha dolğun məlumatları əldə edə bilirlər. Heydər Əliyev Fondunun Moskva nümayəndəliyinin rəhbəri Leyla Əliyeva azərbaycanlı gəncləri Rusiyanın ictimai-siyasi həyatında daha fəal iştirak etməyə, Rusiya cəmiyyətinə daha sıx inteqrasiyaya və bununla bərabər, Azərbaycanın milli mədəniyyətinə qayğıkeşliklə yanaşmağa, onu qoruyub saxlamağa və yaymağa çağırmışdır. Leyla xanım Əliyeva, həmçinin Rusiyanın Azərbaycanlı Gənclər Təşkilatının sədridir.

İslam Konfransı Təşkilatının gənclər forumu ilə "Xocalıya ədalət" Beynəlxalq kampaniyasına start verilməsi də Fondun Moskva filialının fəaliyyəti ilə bağlıdır. Bu kampaniya İKT Gənclər Forumunun Mədəniyyətlərarası Dialoq üzrə baş koordinatoru Leyla Əliyevanın 2008-ci il mayın 8-də irəli sürdüyü təşəbbüs əsasında həyata keçirilir. Tunisdə İSESCO-nun Baş Assambleyasının 10-cu sessiyasında imzalanmış protokol "Xocalıya ədalət" Beynəlxalq Məlumat Təşviqat kampaniyasına dəstək verilməsi və kampaniya çərçivəsində dünya miqyasında təhsil, elm və mədəniyyət sahələrində birgə tədbirlərin həyata keçirilməsini nəzərdə tutur. Təsadüfi deyildir ki, Azərbaycan diasporunun inkişafındakı xidmətlərinə görə, Leyla Əliyeva bu günlərdə Prezident tərəfindən "Tərəqqi" medalı ilə təltif edilmişdir.

Bu günlərdə Heydər Əliyev Fondu və BMT-in İnkişaf Proqramı tərəfindən Müasir İncəsənət Muzeyində "Azərbaycan əcnəbilərin gözü ilə" fotosərgisi keçirilmişdir. Qeyd edək ki, BMT-nin İnkişaf Proqramının izlədiyi insan inkişafı göstəricilərinə görə son beş ildə Azərbaycan 169 ölkə arasında ən böyük irəliləyişə nail olmuşdur. Keçmiş sovet ölkələri arasında isə Azərbaycan son 10 ildə ən yüksək insan inkişaf tempini nümayiş etdirmişdir. Leyla xanım Əliyeva tədbirdə yeni bir təşəbbüsün - gənclərin qlobal ətraf mühit kampaniyasının başlandığını elan etmişdir. Bu, İDEA, yəni "Ətraf Mühit Sahəsində Tədbirlər Haqqında Beynəlxalq Dialoq" adlanır. Bu kampaniya ətraf mühitin qorunmasını vacib hesab edən dünyanın bir çox ölkələrində minlərlə gənci səfərbər edəcəkdir. Eyni zamanda, 2011-2012-ci illərdə Heydər Əliyev Fondu BMT-nin Azərbaycan nümayəndəliyi ilə ətraf mühitə dair müxtəlif layihələr üzərində intensiv işləyəcəkdir. Ölkə miqyaslı həmin layihələrdən biri də "Ətrafıma yeni baxış" adlanan fotosərgisidir.

Ətraf mühitin qorunması ilə bağlı Fondun prezidenti Mehriban xanım Əliyevanın şəxsi təşəbbüsü ilə işlənib hazırlanmış "Hərəmiz bir ağac əkək" layihəsinin icrası görülən müsbət işlər sırasındadır. Xatırladaq ki, Azərbaycan Respublikasının Prezidenti İlham Əliyevin təşəbbüsü ilə 2010-cu il ölkəmizdə "Ekologiya ili" elan edilmişdir. Ətraf mühitin mühafizəsi və əhalinin sağlamlığı məsələlərinə daim böyük diqqət yetirən dövlət başçısının bu təklifi Yer kürəsində təbiətin xilas olunması üzrə dünya ictimaiyyətinin göstərdiyi səylər kontekstində ayrıca bir ölkə çərçivəsində çox əhəmiyyətli aksiya olmuşdur.

Göründüyü kimi, Fondun həyata keçirdiyi bütün layihələr milli xüsusiyyətlər, yerli tələb və ehtiyaclarla çulğalaşaraq olduqca maraqlı və rəngarəng forma almışdır. Fond hansısa ayrıca götürülmüş sahənin inkişafı naminə fəaliyyət göstərmir - xeyriyyəçilikdən tutmuş, ölkənin səhiyyə və təhsil sisteminin, mədəniyyət və incəsənətinin inkişafı, insan hüquqlarının qorunması, Azərbaycanın beynəlxalq aləmdəki imicinin formalaşmasına qədər müxtəlif sferalarda məhsuldar fəallıq nümayiş etdirir.

E.HACIALIYEV

Azərbaycan.- 2011.- 14 iyul.- S.5.