"Biz ölkəmizin uzunmüddətli və dayanıqlı inkişafına nail olacağıq"

Cari ilin 6 ayında Azərbaycanın dinamik inkişafı davam edib. Təbii ki, bu uğurların əsas səbəbi həyata keçirilən düzgün iqtisadi siyasətdir. Təqdirəlayiq haldır ki, dövlət başçısının rəhbərliyi ilə ölkədə aparılan siyasət sayəsində bu inkişaf iqtisadiyyatın bütün sahələrini əhatə edir, onun neft amilindən asılılığını azaldır. Cari ilin birinci yarısında qeyri-neft sektorunda 7,2 faiz artımın əldə olunması məhz bu siyasətin sayəsində mümkün olmuşdur.

Dövlət Statistika Komitəsinin ilin 6 ayı ərzində ölkənin sosial-iqtisadi inkişafı ilə bağlı açıqladığı rəqəmlər də iqtisadiyyatın bütün parametrləri üzrə yüksəlişin mövcud olduğunu göstərir. Belə ki, ilin ilk yarısında ümumi daxili məhsulun 54,7 faizi sənayedə, 4,6 faizi kənd təsərrüfatı, meşə təsərrüfatı və balıqçılıqda, 6,9 faizi tikintidə, 7,3 faizi ticarət və nəqliyyat vasitələrinin təmiri üzrə xidmət sahəsində, 6,2 faizi nəqliyyat və anbar təsərrüfatında, 1,3 faizi mehmanxana və iaşə xidmətində, 1,7 faizi informasiya və rabitədə, 11,4 faizi isə sosial və digər xidmət sahələrində istehsal edilmişdir.

Hesabat dövründə iqtisadiyyatda xüsusi çəkiyə malik olan sənaye sahəsində fiziki şəxslərin fəaliyyəti də nəzərə alınmaqla 15,6 milyard manatlıq məhsul istehsal olunmuşdur. Ötən ilin eyni dövrü ilə müqayisədə məhsul istehsalı mədənçıxarma sənayesində 4 faiz azalsa da, emal bölməsində 3,6, elektrik enerjisi, qaz və buxar istehsalı, bölüşdürülməsi və təchizatında 9,1 faiz artmışdır. Eyni zamanda emal sektoru üzrə qida məhsulları istehsalında 5,6, içki istehsalında 20,3, toxuculuq sənayesində 21,7, geyim istehsalında 35,6, dəri və dəri məmulatları, ayaqqabı istehsalında 7,3 faiz artım qeydə alınmışdır. Bundan əlavə, digər sahələrdə, o cümlədən kimya sənayesi məhsulları istehsalında 39, metallurgiya sənayesi məhsulları istehsalında 70,6, elektrik avadanlıqlarının istehsalında 40,9, qoşqu və yarımqoşquların istehsalında 33,3 faiz artım müşahidə olunmuşdur.

Əvvəlki dövrlərdə olduğu kimi, cari ilin yanvar-iyun aylarında da tikinti sektoru dinamik inkişaf etmişdir. İlin əvvəlindən inşaat kompleksində 4,5 milyard manat vəsaitdən istifadə olunmuş və bu vəsaitin 57,2 faizi tikinti-quraşdırma işlərinin həyata keçirilməsinə yönəldilmişdir. Ötən ilin eyni dövrü ilə müqayisədə inşaat işlərinə sərf olunan vəsait qoyuluşunun həcmi 17,8 faiz artmış, həmçinin bu sahəyə yönəldilən daxili sərmayənin həcmi çoxalaraq 72,8 faizə çatmışdır. Ölkədə ilin birinci yarısında ümumi sahəsi 838,8 min kvadratmetr olan yaşayış evləri, 1956 şagirdlik ümumtəhsil məktəb binaları, 50 yerlik məktəbəqədər uşaq müəssisəsi, 140 yerlik klub, 22-dən çox sənaye, emal, sosial və infrastruktur obyektləri tikilərək istifadəyə verilmişdir.

Ölkə iqtisadiyyatının dinamik inkişafı xarici ticarət əlaqələrinə də müsbət təsir göstərir. Cari ilin 5 ayı ərzində ölkəmiz dünyanın 131 dövlətindəki tərəfdaşları ilə 14072,8 milyon dollar məbləğində ticarət əməliyyatları aparıb. Həyata keçirilən idxal-ixrac əməliyyatları nəticəsində 7093,4 milyon dollarlıq müsbət saldo yaranıb. Keçən ilin eyni dövrü ilə müqayisədə xarici ticarət dövriyyəsinin fiziki həcmi 9,9, idxal isə 42,8 faiz artıb.

Bu ilin birinci yarısı aqrar sektor üçün də uğurlu sayılmalıdır. Belə ki, ötən illə müqayisədə yazlıq bitkilərin əkin sahəsi 21,6, pambıq 12,4, dən üçün qarğıdalı 4,1 min hektar çoxalıb, bostan bitkilərinin əkin sahəsi 730, tütün əkin sahəsi isə 84 hektar artıb. Taxılçılıqda məhsuldarlıq 3,9 sentner yüksələrək 24,5 sentnerə çatıb. Keçən ilin eyni dövrü ilə müqayisədə bitkiçilik məhsullarının istehsalında 8,3, heyvandarlıqda 4,8, bütövlükdə kənd təsərrüfatı məhsullarının istehsalında isə 6,2 faiz artım müşahidə olunub.

Bununla belə, Azərbaycanda həyata keçirilən sosial-iqtisadi siyasətin özəlliyi ondadır ki, əldə olunan uğurlar yetərli sayılmır, daha böyük məqsədlər hədəf götürülür. Prezident İlham Əliyev Nazirlər Kabinetinin 2011-ci ilin birinci yarısının sosial-iqtisadi inkişafının yekunlarına həsr olunmuş iclasında bu barədə danışarkən demişdir: "Bütövlükdə sənaye inkişafımızla bağlı çox vacib addımlar atılır. Azərbaycanda bir neçə böyük sənaye mərkəzi yaradılır... Bakı şəhərində, Sumqayıtda, Gəncədə və Bakının Qaradağ rayonunda müasir sənaye komplekslərinin yaradılması nəzərdə tutulur. Bu istiqamətdə önəmli addımlar atılmışdır və ölkəmizdə sənayeləşmə siyasəti aparılır". Dövlət başçısı Sumqayıtda müasir tələblərə cavab verən kimya sənayesinin yaradılması barədə göstəriş də verdiyini bildirmiş, dünyada sənaye şəhərciklərinin inkişafına diqqət yetirildiyini, ölkəmizdə bu təcrübədən istifadə etməyin vacib olduğunu vurğulamışdır. Belə layihələrin əhəmiyyətinə diqqət çəkən dövlət başçısı qeyd etmişdir ki, bu, minlərlə yeni iş yerinin açılması deməkdir.

Prezident iclasda infrastruktur layihələrinin inkişaf etdirilməsinə də toxunmuşdur. Bildirmişdir ki, Azərbaycanda icra olunan layihələr təkcə ölkəmiz üçün deyil, bütövlükdə bölgə üçün böyük əhəmiyyətə malikdir. Hazırda tikintisi uğurla aparılan Bakı-Tbilisi-Qars dəmir yolu gələcəkdə Avropa ilə Asiya arasında etibarlı körpü rolunu oynayacaq. Buna paralel olaraq Ələt qəsəbəsində dəniz ticarət limanı tikilir. Bakı-Tbilisi-Qars dəmir yolunun inşası başa çatdıqdan sonra bu liman vasitəsilə Qərbdən Şərqə və əksinə, milyon tonlarla yük daşımaq mümkün olacaq. Həmin nəqliyyat tranzit dəhlizinin yaranması ölkəmizə iqtisadi səmərə ilə yanaşı, siyasi dividendlər də qazandıracaq.

Dövlət başçısı nitqində informasiya-kommunikasiya texnologiyaları sahəsinin, kosmik sənayenin, aqrar sektorun, regionların inkişafı, infrastruktur layihələrin davam etdirilməsinin də ölkənin qarşısında duran prioritet sahələr kimi vurğulamışdır: "Bir daha demək istəyirəm ki, ilin altı ayının nəticələri çox ümidvericidir. Başqa cür ola da bilməzdi. Biz bunu elə ilin əvvəlindən bilirdik. Çünki bütün qəbul olunmuş proqramlar ona gətirib çıxarır ki, Azərbaycan sürətlə, uğurla inkişaf edir və yaxın zamanlarda dünyanın inkişaf etmiş ölkələri sırasına daxil ediləcəkdir. Beləliklə, biz ölkəmizin uzunmüddətli və dayanıqlı inkişafına nail olacağıq".

Rüstəm KAMAL

Azərbaycan.-2011.-17 iyul.- S.1.