Biz arxamızda müstəqil Azərbaycan dövlətinin dayandığını daim hiss edirik

Dünyanın müxtəlif bölgələrində yaşayan soydaşlarımız arasında azərbaycançılıq ideologiyasına əsaslanan milli birlik Azərbaycan dövləti tərəfindən həyata keçrilən məqsədyönlü siyasət nəticəsində artıq daha möhkəm özüllər üzərində bərqərar olub. Beynəlxalq hüququn daha güclü müstəqil subyektinə çevrilən Azərbaycan isə qazandığı möhtəşəm nailiyyətlərlə hər bir azərbaycanlının qürur mənbəyinə çevrilib. Bununla yanaşı, ölkəmiz insan hüquqlarına dair beynəlxalq sənədlərdə əksini tapmış prinsipial müddəalardan çıxış edərək bütün dünyada soydaşlarımızın vətəndaş hüquqlarının qorunması üçün əməli tədbirlər görür. Eyni zamanda, xaricdə yaşayan soydaşlarımız da ölkəmizin inkişafına, qarşıya çıxan problemlərin həllinə yaxından kömək göstərməyə çalışırlar.

Dünya azərbaycanlılarının III qurultayında iştirak edən Ukrayna Azərbaycanlıları Konqresinin idarə heyətinin üzvü Fail Abidov da əsas məqsədlərinin güclü, qüdrətli Azərbaycan naminə fəaliyyət göstərməkdən ibarət olduğunu bildirdi, Dünya azərbaycanlılarının III qurultayının əhəmiyyətindən danışaraq dedi:

- Mən 2001 və 2006-cı illərdə keçirilən dünya azərbaycanlılarının qurultaylarında da iştirak etmişəm. Yenidən belə bir möhtəşəm tədbirə qatılmağımı özüm üçün böyük şərəf hesab edirəm. O da çox sevindirici haldır ki, ötən müddət ərzində dünyanın müxtəlif bölgələrində yaşayan soydaşlarımızın təşkilatlanması prosesi daha geniş vüsət alıb. Dünya azərbaycanlılarının ötən illərlə müqayisədə daha mükəmməl formada təşkilatlanmasının əsas səbəblərindən biri Azərbaycan dövləti, onun rəhbəri Prezident İlham Əliyevin həyata keçirdiyi məqsədyönlü siyasətlə birbaşa bağlıdır. Elə bu qurultay da əsası ulu öndər Heydər Əliyev tərəfindən qoyulan, cənab İlham Əliyev tərəfindən davam etdirilən azərbaycançılıq ideologiyasının, bütün dünya azərbaycanlılarının həmrəyilyinin real təzahürüdür.

Bir məqamı da xüsusi vurğulamaq istərdim ki, dünya azərbaycanlılarının qurultayı diaspor hərəkatının genişlənməsinə böyük töhfələr verir. Məsələn, təmsil etdiyim təşkilatın formalaşmasında Dünya azərbaycanlılarının I qurultayı mühüm rol onyayıb. İndi bizim Ukrayanın 26 regionunda yerli təşkilatlarımız fəaliyyət göstərir. Ukraynada olan azərbaycanlı ziyalılar, iş adamları və digər soydaşlarımızın böyük əksəriyyəti diaspor qurumlarımız ətrafında sıx birləşib. Onlar bir qüvvə kimi Azərbaycan uğrunda fəaliyyət göstərirlər.

- Ukraynadakı fəaliyyətinizi necə xarakterizə edərdiniz?

- Çalışırıq ki, fəaliyyətimizi davamlı şəkildə genişləndirək. Diaspor fəaliyyətinin genişlənməsində Azərbaycan dövlətindən davamlı dəstək görürük. Bu dəstəyin əsasını isə ümummilli lider Heydər Əliyev qoyub. O, hər dəfə Ukraynaya gələndə diaspor nümayəndələri ilə görüşür, problemləri ilə yaxından maraqlanır, onların həllinə kömək edirdi. Ondan sonra Prezident İlham Əliyev də xarici ölkələrə səfərləri çərçivəsində hər zaman Azərbaycan diasporu ilə görüşlərə vaxt ayırır, onlarla söhbətlər aparır. Dəfələrlə də bildirib ki, Azərbaycan dövlətinin möhkəm olması dünyada yaşayan azərbaycanlıların da mövqeyini möhkəmləndirir.

Sevindirici haldır ki, indi müxtəlif xarici ölkələrdə yaşayan soydaşlarımızın ictimai-siyasi fəallıq dərəcəsi olduqca yüksəkdir. Onlar yaşadıqları ölkələrdə baş verənlərə dair öz mövqelərini fəal şəkildə ifadə edirlər, Azərbaycan reallıqlarını, tarixini, mədəniyyətini dünyaya çatdırırlar. Konkret Ukraynaya gəldikdə, burada Azərbaycan diasporunun nüfuzu çox yüksəkdir. Burada mətbu orqanımız, internet saytmız var. Azərbaycanla bağlı bütün mühüm məlumatlar Ukrayna ictimaiyyətinə çatdırılır. Müxtəlif konfranslarda, tədbirlərdə Azərbaycan diaspor nümayəndələri fəal iştirak edirlər.

Ümumiyyətlə götürsək, yəhudi diasporundan sonra Ukraynada ən güclü diaspor Azərbaycan diasporudur. Həm üzvlərinin sayı, həm də fəaliyyət dairəsi və əldə olunan nəticələr baxımından. Ukraynada yaşayan soydaşlarımız həm qanunverici orqanda, həm də müxtəlif dövləti vəzifələrdə təmsil olunur. Ən əsası isə, soydaşlarımız arasında kifayət qədər sıx birlik mövcuddur.

Onu da deyim ki, Ukraynada azərbaycanlılardan ibarət güclü diasporun formalaşmasında Azərbaycan dövlətinin dəstəyi olduqca böyük rol oynayıb. Biz arxamızda daim güclü Azərbaycan dövlətinin dayandığını hiss edirik. Azərbaycan dövləti öz qüdrətini artırdıqca diaspor təşkilatlarımız da güclənir. Çünki Azərbaycan dövləti tərəfindən bizə göstərilən diqqət və qayğı olduqca yüksəkdir.

Müsahibəni apardı: Rasim BAYRAMOV

Azərbaycan.-2011.-17 iyul.- S.3.